ଉମରକୋଟ, ୦୫/୦୮: ଝୁଲି ପଡ଼ିଲେ ନିଃସନ୍ତାନ ଦମ୍ପତି। ଘର ଭିତରେ ଝୁଲୁଛନ୍ତି ସ୍ତ୍ରୀ, ଘର ବାହାରେ ତେନ୍ତୁଳି ଗଛରେ ଝୁଲୁଛି ସ୍ଵାମୀଙ୍କ ଶବ। ନବରଙ୍ଗପୁର ଝରିଗାଁ ବ୍ଲକ ଉମରକୋଟ ଥାନା ସାନଭୀମାଗୁଡା ଗାଁରେ ଦେଖିବାକୁ ମିଳିଛି ଏଭଳି ହୃଦୟବିଦାରକ ଦୃଶ୍ୟ। ମୃତକ ଦୁଇ ଜଣ ହେଲେ ଉକ୍ତ ଗାଁର ସୁତମ ଭତରା (୩୨ ବର୍ଷ) ଓ ଫୁଲମଣି ଭତରା (୨୭ ବର୍ଷ)।
ସୂଚନାନୁଯାୟୀ, ସୋମବାର ରାତିରେ ସୁତମ ଓ ଫୁଲମଣି ଖାଇପିଇ ଶୋଇବାକୁ ଯାଇଥିଲେ। ମଙ୍ଗଳବାର ସକାଳେ ପରିବାର ଲୋକେ ଘର ଭିତରେ ଲୁହା ପାଇପରେ ଫୁଲମଣିଙ୍କ ଝୁଲନ୍ତା ମୃତଦେହ ଦେଖିଥିଲେ। ଏହାପରେ ଘର ନିକଟରେ ଥିବା ଏକ ତେନ୍ତୁଳି ଗଛରେ ସୁତମଙ୍କ ମୃତଦେହ ଝୁଲୁଥିବା ଦେଖିଥିଲେ। ଏନେଇ ପରିବାର ଲୋକେ ଉମରକୋଟ ଥାନାରେ ଲିଖିତ ଅଭିଯୋଗ କରିଥିଲେ। ଏହାପରେ ପୁଲିସ ଘଟଣାସ୍ଥଳରେ ପହଞ୍ଚି ଶବ ବ୍ୟବଚ୍ଛେଦ ପାଇଁ ସ୍ଥାନୀୟ ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ସୁତମ ଓ ଫୁଲମଣି ଗତ ୧୦ ବର୍ଷ ତଳେ ବିବାହ କରିଥିଲେ। ସେମାନଙ୍କର କୌଣସି ସନ୍ତାନ ସନ୍ତତି ନଥିଲା। ଏହି ନିଃସନ୍ତାନ ଦମ୍ପତିଙ୍କ ଆତ୍ମହତ୍ୟାର କାରଣ ଅସ୍ପଷ୍ଟ ରହିଛି।
