ଭୁବନେଶ୍ୱର,୦୫/୧୧: ଏଥର ଜମିବ ଭୁବନେଶ୍ୱର ବାଲିଯାତ୍ରା । ଏଥିଲାଗି ଆରମ୍ଭ ହୋଇଗଲାଣି ପ୍ରସ୍ତୁତି । ଦିବ୍ୟାଙ୍ଗ ଓ ମହିଳାଙ୍କୁ ଦିଆଯିବ ବିଶେଷ ଗୁରୁତ୍ୱ । ଶାନ୍ତିଶୃଙ୍ଖଳା, ପାର୍କିଂ ବ୍ୟବସ୍ଥା ଲାଗି ପ୍ରଶାସନ କରିବ ସମ୍ପୂର୍ଣ୍ଣ ସହଯୋଗ । ଓଡିଆ ଅସ୍ମିତା, ପରମ୍ପରା ଓ କଳାର ପ୍ରଚାର ପ୍ରସାର କରାଯିବ । ଏଥର କିନ୍ତୁ ମୁଖ୍ୟ ଆକର୍ଷଣ ସାଜିବ ସ୍ମୋକି-ମଟନ୍ ମୁଢି । ସ୍ଥାନୀୟ ବାଲିଯାତ୍ରା ମେଳଣ ପଡିଆରେ ଆସନ୍ତା ୧୫ରୁ ୨୪ ତାରିଖ ପର୍ଯ୍ୟନ୍ତ ଦଶ ଦିନ ଧରି ଅନୁଷ୍ଠିତ ହେବ ଭୁବନେଶ୍ୱର ବାଲିଯାତ୍ରା ମହୋତ୍ସବ । ଏଥିଲାଗି ସୋମବାର ସ୍ଥାନୀୟ ସର୍କିଟ୍ ହାଉସରେ ଜିଲ୍ଲାପାଳ ଚଞ୍ଚଳ ରାଣାଙ୍କ ଉପସ୍ଥିତିରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ଭୁବନେଶ୍ୱର ଉତ୍ତର ବିଧାୟକ ତଥା ସଭାପତି ସୁଶାନ୍ତ କୁମାର ରାଉତ, ସମ୍ପାଦକ ସୁବାସ ପାତ୍ରଙ୍କ ସମେତ କମିଟିର କାର୍ଯକାରୀ ସଭାପତି ଯଶୋବନ୍ତ ଓଝା, କମିଟି ସଦସ୍ୟ ଏବଂ ବିଭିନ୍ନ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ ।
ଚଳିତ ବର୍ଷ ଭୁବନେଶ୍ୱର ବାଲିଯାତ୍ରାର ୬ଷ୍ଠ ସଂସ୍କରଣ ଅନୁଷ୍ଠିତ ହେବାକୁ ଯାଉଛି । ଏଥର ମହିଳା ଏବଂ ଦିବ୍ୟାଙ୍ଗ ସଶକ୍ତିକରଣକୁ ବିଶେଷ ଗୁରୁତ୍ୱ ଦିଆଯାଇଛି । ଷ୍ଟଲ୍ ବୁକିଂ ପ୍ରକ୍ରିୟାରେ ମହିଳାଙ୍କୁ ଅଗ୍ରାଧିକାର ଦିଆଯିବ । ଦିବ୍ୟାଙ୍ଗମାନଙ୍କ ଲାଗି ହ୍ୱିଲ୍ ଚେୟାର୍ ସହ ସ୍ୱେଚ୍ଛାସେବୀ ସହଯୋଗୀ ମଧ୍ୟ ଯୋଗାଇଦିଆଯିବ । ଏଥର ବାଲିଯାତ୍ରାରେ ଦିବ୍ୟାଙ୍ଗଙ୍କ ପାଇଁ ଷ୍ଟଲ୍ ଫି ମଧ୍ୟ ଛାଡ଼ କରାଯାଇଛି । କେବଳ ସେତିକି ନୁହେଁ, ମା’ ମାନଙ୍କ ପାଇଁ ସ୍ୱତନ୍ତ୍ର ସ୍ତନ୍ୟପାନ ପ୍ରକୋଷ୍ଠ କରିବାକୁ ନିଷ୍ପତ୍ତି ହୋଇଛି ।
ଦର୍ଶକଙ୍କ ପେଟ ଓ ପାଟିର ସ୍ୱାଦକୁ ଚାହିଁ ଏଥର ରାଜଧାନୀ ବାଲିଯାତ୍ରାରେ ପଡିବ ସ୍ୱତନ୍ତ୍ର ଫୁଡ୍ ଷ୍ଟଲ୍ । ଶାଳପତ୍ରରେ ବାରିପଦାର ସ୍ମୋକି ମଟନ୍ ମୁଢି ସ୍ପେଶାଲ୍ ଷ୍ଟଲ୍ ରହିଛି ଏଥରର ମୁଖ୍ୟ ଆକର୍ଷଣ । ଏଥିସହ ବାହାର ରାଜ୍ୟର ଫୁଡ ଷ୍ଟଲ ଖୋଲିବ । ଷ୍ଟଲ୍ ବୁକିଂ ପ୍ରକ୍ରିୟା ଆରମ୍ଭ ହୋଇଯାଇଥିବା ବେଳେ ସୋମବାର ସୁଦ୍ଧା ୧୭୦ରୁ ଊଦ୍ଧ୍ୱର୍ ଷ୍ଟଲ୍ ବୁକିଂ ସରିଛି । ତେବେ ଆସନ୍ତା ୧୩ ତାରିଖ ପର୍ଯ୍ୟନ୍ତ ଷ୍ଟଲ୍ ବୁକିଂ ପ୍ରକ୍ରିୟା ଜାରି ରହିବ ବୋଲି ସୂଚନା ମିଳିଛି । ଚଳିତ ବର୍ଷ ପ୍ରାୟ ରାଜ୍ୟ ତଥା ରାଜ୍ୟ ବାହାର ୧ ହଜାରରୁ ଅଧିକ ଷ୍ଟଲ୍ ପଡିବ । ବିଶେଷତଃ ଓଡିଶାର ତଥା ଅନ୍ୟ ରାଜ୍ୟର ଜିଆଇ ଟ୍ୟାଗ୍ ପ୍ରାପ୍ତ ସାମଗ୍ରୀଗୁଡିକୁ ପ୍ରଦର୍ଶନ କରାଯିବ ବୋଲି ସୂଚନା ମିଳିଛି ।
