ବେଙ୍ଗାଲୁରୁ,୨୨/୦୪: ଝଗଡ଼ା ଏତେ ବଢିଗଲା ଯେ ଜଘନ୍ୟକାଣ୍ଡ ଘଟାଇଲେ ପତ୍ନୀ । ପ୍ରଥମେ ଆଖିକୁ ଲଙ୍କାଗୁଣ୍ଡ ପକାଇଲେ । ଏହାପରେ ୧୦ରୁ ୧୨ ଥର ଛୁରୀ ଭୁସିଲେ । ରାକ୍ଷସକୁ ମାରି ଦେଇଥିବା ନେଇ ସାଙ୍ଗକୁ ମେସଜ କଲେ । ଏପରି ବର୍ବରତା କର୍ଣ୍ଣାଟକରେ ହୋଇଛି । ପୂର୍ବତନ ପୁଲିସ ଡିଜି ଓମ୍ ପ୍ରକାଶଙ୍କ ହତ୍ୟା ମାମଲାରେ ସୋମବାର ତାଙ୍କର ପତ୍ନୀ ପଲ୍ଲବୀ ଓ ଝିଅ କ୍ରିତିଙ୍କୁ ଗିରଫ କରାଯାଇଛି । ପୁଅ କାର୍ତ୍ତିକେଶ(୩୮)ଙ୍କ ଅଭିଯୋଗ ଆଧାରରେ ସେମାନଙ୍କ ବିରୋଧରେ ମାମଲା ରୁଜୁ ହେବା ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ରବିବାର ୧୯୮୧ ବ୍ୟାଚ୍ର ଆଇପିଏସ୍ ଅଧିକାରୀ ଓମ୍ ପ୍ରକାଶଙ୍କ ମୃତଦେହ ତାଙ୍କର ବେଙ୍ଗାଲୁରୁସ୍ଥିତ ବାସଭବନରୁ ରକ୍ତ ଜୁଡୁବୁଡୁ ଅବସ୍ଥାରେ ମିଳିଥିଲା ।
ପୁଲିସ ଅନୁସାରେ, ଗତକାଲି ପୂର୍ବତନ ଡିଜିପି ଖାଉଥିବାବେଳେ ପତ୍ନୀ ପଲ୍ଲବୀଙ୍କ ସହିତ ତାଙ୍କର ଝଗଡ଼ା ହୋଇଥିଲା । ଝଗଡ଼ା ଏତେ ବଢ଼ି ଯାଇଥିଲା ଯେ ପଲ୍ଲବୀ ତାଙ୍କୁ ହତ୍ୟା କରିଥିଲେ । ପ୍ରଥମେ ପଲ୍ଲବୀ ତାଙ୍କ ଉପରକୁ ଲଙ୍କା ଗୁଣ୍ଡ ଫିଙ୍ଗିଥିଲେ । ଅସହ୍ୟ ଜ୍ୱାଳାରେ ଅତିଷ୍ଠ ହୋଇ ପୂର୍ବତନ ଡିଜିପି ଏପଟ ସେପଟ ଦୌଡୁଥିବାବେଳେ ପଲ୍ଲବୀ ତାଙ୍କ ଗଳା, ଛାତି, ପେଟରେ ୧୦-୧୨ ଥର ଛୁରୀରେ ଆକ୍ରମଣ କରିଥିଲେ । ସେଥିଯୋଗୁ ତାଙ୍କର ମୃତ୍ୟୁ ଘଟିଥିଲା । ଏହି ସମୟରେ ଝିଅ କ୍ରିତି ବି ସେଠାରେ ଉପସ୍ଥିତ ଥିଲେ ।
ପ୍ରାଥମିକ ତଦନ୍ତରୁ ଆହୁରି ସାମ୍ନାକୁ ଆସିଛି ଯେ, ହତ୍ୟାକାଣ୍ଡ ପରେ ପଲ୍ଲବୀ ଅନ୍ୟ ଜଣେ ଆଇପିଏସ୍ ଅଧିକାରୀଙ୍କ ପତ୍ନୀଙ୍କୁ ମେସେଜ୍ ପଠାଇଥିଲେ । ସେଥିରେ ସେ ଜଣେ ରାକ୍ଷସଙ୍କୁ ଶେଷ କରିଦେଇଥିବା ଲେଖିଥିଲେ । ପରେ ପଲ୍ଲବୀ ତାଙ୍କୁ ଓମ୍ ପ୍ରକାଶଙ୍କ ହତ୍ୟା କରିଥିବା କହିଥିଲେ । ଏହାପରେ ସେହି ଆଇପିଏସ୍ ଅଧିକାରୀ ହିଁ ପୁଲିସକୁ ସୂଚନା ଦେଇଥିଲେ ।
ସେପଟେ ପୁଅ କାର୍ତ୍ତିକେଶଙ୍କ ଅନୁସାରେ, ତାଙ୍କର ମା’ ପଲ୍ଲବୀ ବିଗତ ଏକ ସପ୍ତାହ ହେଲା ବାପାଙ୍କୁ ହତ୍ୟା କରିବାକୁ ଧମକ ଦେଉଥିଲେ । ସେହି ଧମକ ଯୋଗୁ ବାପା ନିଜ ଭଉଣୀଙ୍କ ଘରେ ରହିବାକୁ ପଳାଇଥିଲେ । ୨ ଦିନ ପୂର୍ବରୁ ସାନ ଭଉଣୀ କ୍ରିତି ସେଠାକୁ ଯାଇ ବାପାଙ୍କ ଇଚ୍ଛା ବିରୋଧରେ ତାଙ୍କୁ ନେଇ ଆସିଥିଲା । ଏଭଳିସ୍ଥଳରେ ସେ ମା’ ଓ ଭଉଣୀଙ୍କ ବିରୋଧରେ ବାପାଙ୍କୁ ହତ୍ୟା କରିବାର ଅଭିଯୋଗ ଆଣିଛନ୍ତି । ମା’ ମାନସିକ ରୋଗରେ ପୀଡି଼ତ ଥିବା ମଧ୍ୟ ସେ ଦର୍ଶାଇଛନ୍ତି ।
ଅନ୍ୟ ଏକ ରିପୋର୍ଟ ଅନୁସାରେ, ଓମ୍ ପ୍ରକାଶ ଓ ପଲ୍ଲବୀଙ୍କ ମଧ୍ୟରେ ରାଜ୍ୟର ଦାନ୍ଦେଲିରେ ଥିବା ଏକ ସମ୍ପତ୍ତିକୁ ନେଇ ବିବାଦ ଥିଲା । ଓମ୍ ପ୍ରକାଶ ନିଜର ଜଣେ ସଂପର୍କୀୟଙ୍କୁ ସମ୍ପତ୍ତି ହସ୍ତାନ୍ତର କରିଥିଲେ । ସେଥିଯୋଗୁ ଅଧିକାଂଶ ସମୟରେ ଦମ୍ପତିଙ୍କ ମଧ୍ୟରେ ଝଗଡ଼ା ହେଉଥିଲା । ତେବେ ଏହି ହତ୍ୟାକାଣ୍ଡରେ ଝିଅ କ୍ରିତିଙ୍କର କୌଣସି ଭୂମିକା ଅଛି କି ନାହିଁ ତାହା ପୁଲିସ ତଦନ୍ତ କରୁଛି ।
