ନୂଆଦିଲ୍ଲୀ: ଚାରି ରାଜ୍ୟରେ ପାଞ୍ଚଟି ବିଧାନସଭା ଆସନରେ ଜୁନ ୧୯ ତାରିଖରେ ଅନୁଷ୍ଠିତ ହୋଇଥିବା ଉପ-ନିର୍ବାଚନର ଫଳାଫଳ ଘୋଷିତ ହୋଇଛି। ଆମ ଆଦମୀ ପାର୍ଟି (ଆପ) ପଞ୍ଜାବର ଲୁଧିଆନା ପଶ୍ଚିମ ଓ ଗୁଜରାଟର ବିସାବଦର ଆସନ ଜିତିଛି। କଂଗ୍ରେସ କେରଳର ନିଲାମ୍ବୁର ଆସନ ନିଜ ଅକ୍ତିଆରକୁ ନେଇଥିବା ବେଳେ, ବିଜେପି ଗୁଜରାଟର କଡ଼ି ଆସନରେ ଜୟଜୁକ୍ତ ହୋଇଛି ଏବଂ ତୃଣମୂଳ କଂଗ୍ରେସ (ଟିଏମସି) ପଶ୍ଚିମବଙ୍ଗର କାଲିଗଞ୍ଜରେ ବିଜୟୀ ହୋଇଛି।
କଂଗ୍ରେସ ନେତୃତ୍ଵାଧୀନ ୟୁଡିଏଫର ପ୍ରାର୍ଥୀ ଆର୍ଯ୍ୟାଦାନ ଶୌକତ ନିଲାମ୍ବୁର ଆସନରେ ସିପିଆଇ(ଏମ)ର ଏମ ସ୍ୱରାଜଙ୍କୁ ୧୧,୦୭୭ ଭୋଟରେ ପରାସ୍ତ କରିଛନ୍ତି। ଏହି ବିଜୟକୁ ୨୦୨୬ କେରଳ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ପାଇଁ ଏକ ବଡ଼ ଉତ୍ସାହ ବୋଲି ବିବେଚନା କରାଯାଉଛି। ଏହି ଆସନ ସିପିଆଇ(ଏମ) ସମର୍ଥିତ ସ୍ୱାଧୀନ ବିଧାୟକ ପି.ଭି. ଅନଭାରଙ୍କ ଇସ୍ତଫା ପରେ ଖାଲି ହୋଇଥିଲା। ଅନଭାର ଟିଏମସି ସମର୍ଥନରେ ପୁଣି ପ୍ରତିଦ୍ୱନ୍ଦ୍ୱିତା କରି ୧୯,୭୬୦ ଭୋଟ ପାଇଥିଲେ, କିନ୍ତୁ ବିଜେପିର ମୋହନ ଜର୍ଜ ମାତ୍ର ୮,୫୬୨ ଭୋଟ ପାଇ ପଛରେ ରହିଥିଲେ।
ଆପର ସଞ୍ଜୀବ ଅରୋରା କଂଗ୍ରେସର ଭାରତ ଭୂଷଣ ଆଶୁଙ୍କୁ ୧୦,୬୩୭ ଭୋଟରେ ପରାସ୍ତ କରି ଲୁଧିଆନା ପଶ୍ଚିମ ଆସନ ଜିତିଛନ୍ତି। ଅରୋରା ୩୫,୧୭୯ ଭୋଟ ପାଇଥିବା ବେଳେ ଆଶୁ ୨୪,୫୪୨ ଭୋଟ ପାଇଥିଲେ। ବିଜେପିର ଜୀବନ ଗୁପ୍ତା ୨୦,୩୨୩ ଭୋଟ ଓ ଶିରୋମଣି ଅକାଲୀ ଦଳର ପରୁପକାର ସିଂ ଘୁମାନ ୮,୨୦୩ ଭୋଟ ପାଇଥିଲେ। ଏହି ଉପ-ନିର୍ବାଚନ ଆପ ବିଧାୟକ ଗୁରପ୍ରୀତ ବାସି ଗୋଗୀଙ୍କ ମୃତ୍ୟୁ ପରେ ଆବଶ୍ୟକ ହୋଇଥିଲା।
ଆପର ଗୋପାଳ ଇଟାଲିଆ ବିଜେପିର କିରୀଟ ପଟେଲଙ୍କୁ ୧୭,୫୫୪ ଭୋଟରେ ପରାସ୍ତ କରି ବିସାବଦର ଆସନ ଜିତିଛନ୍ତି। ଇଟାଲିଆ ୭୫,୯୪୨ ଭୋଟ ପାଇଥିବା ବେଳେ କଂଗ୍ରେସର ନୀତିନ ରଣପରୀୟା ତୃତୀୟ ସ୍ଥାନରେ ରହିଛନ୍ତି। ଏହି ଆସନ ଆପ ବିଧାୟକ ଭୂପେନ୍ଦ୍ର ଭାୟାଣୀଙ୍କ ବିଜେପିରେ ଯୋଗଦାନ ପରେ ଖାଲି ପଡିଥିଲା।
ବିଜେପିର ରାଜେନ୍ଦ୍ର ଚାଭଡ଼ା କଂଗ୍ରେସର ରମେଶ ଚାଭଡ଼ାଙ୍କୁ ୩୯,୪୫୨ ଭୋଟରେ ପରାସ୍ତ କରି କଡ଼ି ଆସନର ମଙ୍ଗ ଧରି ରଖିଛନ୍ତି। ଏହି ଆସନ ବିଜେପି ବିଧାୟକ କର୍ସନ ସୋଲାଙ୍କୀଙ୍କ ମୃତ୍ୟୁ ପରେ ଖାଲି ହୋଇଥିଲା। ସେହିଭଳି ଟିଏମସିର ଆଲିଫା ଆହମେଦ ବିଜେପିର ଅଶୀଷ ଘୋଷଙ୍କୁ ୫୦,୦୪୯ ଭୋଟରେ ପରାସ୍ତ କରି ପଶ୍ଚିମବଙ୍ଗଦର କାଲିଗଞ୍ଜ ଆସନ ନିଜ ନାମରେ କରିଛନ୍ତି।
ଆପ ନେତା ଅରବିନ୍ଦ କେଜରିଓ୍ଵାଲ ଏହି ବିଜୟକୁ ୨୦୨୭ର ସେମିଫାଇନାଲ ବୋଲି କହିଛନ୍ତି। ଯାହା ଗୁଜରାଟ ଓ ପଞ୍ଜାବରେ ଆପର ଶକ୍ତିଶାଳୀ ଉପସ୍ଥିତିକୁ ସୂଚାଇଛି। କଂଗ୍ରେସର ନିଲାମ୍ବୁର ବିଜୟ ୱାୟାନାଡରେ ପ୍ରିୟଙ୍କା ଗାନ୍ଧୀଙ୍କ ନେତୃତ୍ଵକୁ ଆହୁରି ଦୃଢ଼ କରିଛି। ଏହି ଫଳାଫଳ ୨୦୨୬ରେ କେରଳ ଓ ପଶ୍ଚିମବଙ୍ଗରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ରାଜନୈତିକ ଦୃଶ୍ୟପଟକୁ ପ୍ରଭାବିତ କରିବ ବୋଲି ଅନୁମାନ କରାଯାଉଛି।
