ନୂଆଦିଲ୍ଲୀ,୨୪/୦୬: ପୂର୍ବତନ ଭାରତୀୟ କ୍ରିକେଟର ଦିଲୀପ ଦୋଷୀଙ୍କ ଦେହାନ୍ତ ହୋଇଛି। ଦିଲୀପ ଦୋଷୀ ୨୩ ଜୁନ୍ ସୋମବାର ଦିନ ଲଣ୍ଡନରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସେ ବହୁ ଦଶନ୍ଧି ଧରି ଲଣ୍ଡନରେ ରହୁଥିଲେ। ଦିଲୀପ ଦୋଷୀଙ୍କ ହୃଦଘାତରେ ମୃତ୍ୟୁ ହୋଇଛି। ସେ ୩୨ ବର୍ଷ ବୟସରେ ଟେଷ୍ଟ କ୍ରିକେଟରେ ଡେବ୍ୟୁ କରିଥିଲେ ଏବଂ ମାତ୍ର ଚାରି ବର୍ଷର କ୍ୟାରିଅରରେ ଦିଲୀପ ଦୋଷୀ ୧୦୦ ରୁ ଅଧିକ ୱିକେଟ୍ ନେଇଥିଲେ। ସେ ହଠାତ୍ ଏବଂ ଅତ୍ୟନ୍ତ ଶାନ୍ତିପୂର୍ଣ୍ଣ ଭାବରେ କ୍ରିକେଟରୁ ଅବସର ନେଇଥିଲେ। ଦିଲୀପ ଦୋଷୀ ତାଙ୍କ କ୍ରିକେଟ କ୍ୟାରିଅର ଉପରେ ଏକ ଆତ୍ମଜୀବନୀ ମଧ୍ୟ ଲେଖିଛନ୍ତି, ଯାହାର ନାମ 'ସ୍ପିନ୍ ପଞ୍ଚ।'
ଟେଷ୍ଟ କ୍ରିକେଟରେ ଦିଲୀପ ନେଇଛନ୍ତି ୧୦୦ରୁ ଅଧିକ ଓ୍ବିକେଟ:
ଦିଲୀପ ଦୋଷୀ ଭାରତର ଜଣେ ବାମହାତୀ ସ୍ପିନ୍ ବୋଲର ଥିଲେ। ସେ ୧୯୭୯ ରୁ ୧୯୮୩ ମଧ୍ୟରେ ଭାରତର ଅନ୍ତର୍ଜାତୀୟ ଦଳର ଅଂଶ ଥିଲେ। ସେ ୩୨ ବର୍ଷ ବୟସରେ ତାଙ୍କର ଟେଷ୍ଟ କ୍ୟାରିୟର ଆରମ୍ଭ କରିଥିଲେ। ସେ ତାଙ୍କ କ୍ୟାରିୟରରେ ଭାରତ ପାଇଁ ୩୩ ଟେଷ୍ଟ ଏବଂ ୧୫ ଦିନିକିଆ ଖେଳିଥିଲେ। ଦିଲୀପ ଦୋଷୀ ୩୩ ମ୍ୟାଚ୍ରେ ୧୧୪ ଟି ୱିକେଟ୍ ନେଇଥିଲେ। ସେ ଛଅ ଥର ପାଞ୍ଚଟି ଲେଖାଏଁ ୱିକେଟ୍ ନେବାର ରେକର୍ଡ ମଧ୍ୟ କରିଛନ୍ତି।
ଦିନିକିଆରେ ମଧ୍ୟ ସଫଳ କ୍ୟାରିୟର:
ଦିଲୀପ ଦୋଷୀ ତାଙ୍କ କ୍ୟାରିୟରରେ ୧୫ଟି ଦିନିକିଆ ମ୍ୟାଚ୍ ଖେଳିଥିଲେ, ଯେଉଁଥିରେ ସେ ୩.୯୬ ଇକୋନୋମି ସହିତ ବୋଲିଂ କରିଥିଲେ ଏବଂ ମୋଟ ୨୨ଟି ୱିକେଟ ନେଇଥିଲେ। ଏହା ବ୍ୟତୀତ ଦିଲୀପ ଦୋଷୀ ଫାର୍ଷ୍ଟ କ୍ଳାସ୍ କ୍ରିକେଟ ମଧ୍ୟ ଖେଳିଛନ୍ତି। ସେ ସୌରାଷ୍ଟ୍ର, ବେଙ୍ଗଲ, ବର୍କଶାୟାର ଏବଂ ନଟିଂହାମଶାୟାର ପାଇଁ ଫାର୍ଷ୍ଟ କ୍ଳାସ କ୍ରିକେଟ ମଧ୍ୟ ଖେଳିଛନ୍ତି।
ଦିଲୀପଙ୍କ ପରିବାର:
ଦିଲୀପ ଦୋଷୀଙ୍କ ପରିବାରରେ ତାଙ୍କ ପତ୍ନୀ କାଳିନ୍ଦୀ, ପୁଅ ନୟନ ଏବଂ ଝିଅ ବିଶାଖା ଅଛନ୍ତି। ଦିଲୀପ ଦୋଷୀଙ୍କ ପୁଅ ନୟନ ମଧ୍ୟ ସୌରାଷ୍ଟ୍ର ଏବଂ ସୁରେ ପାଇଁ ଫାର୍ଷ୍ଟ କ୍ଳାସ କ୍ରିକେଟ୍ ଖେଳିଛନ୍ତି। ଦିଲୀପ ଦୋଷୀ ତାଙ୍କ ପରିବାର ସହିତ ଏକ ଦଶନ୍ଧିରୁ ଅଧିକ ସମୟ ଧରି ଲଣ୍ଡନରେ ରହୁଥିଲେ।
