ଲକ୍ଷ୍ନୌ ୧୩/୦୬: ସମାଜବାଦୀ ପାର୍ଟି(ସପା)ର ମୁଖ୍ୟ ଅଖିଳେଶ ଯାଦବ ଉତ୍ତରପ୍ରଦେଶର କରହଲ ବିଧାନସଭା ଆସନ ଓ ବିରୋଧୀ ଦଳର ନେତା ପଦରୁ ଇସ୍ତଫା ଦେଇଛନ୍ତି । ଏବେ ସେ ଲୋକସଭାରେ କନୌଜ ଆସନକୁ ପ୍ରତିନିଧିତ୍ୱ କରିବେ ।
୨୦୨୨ରେ ଅଖିଳେଶ ମୈନପୁରୀର କରହଲ ବିଧାନସଭା ଆସନରୁ ନିର୍ବାଚନ ଲଢ଼ି ଜିତିଥିଲେ । ତେବେ ଚଳିତ ଲୋକସଭା ନିର୍ବାଚନରେ କନୌଜ ଆସନରୁ ଜିତିବା ପରେ କରହଲ ଆସନରୁ ସେ ଇସ୍ତଫା ଦେଇଛନ୍ତି । ବର୍ତ୍ତମାନ ଖାଲି ହୋଇଥିବା କରହଲ ଆସନରେ ହେବାକୁ ଥିବା ଉପନିର୍ବାଚନରେ ସପା ପକ୍ଷରୁ ତେଜ ପ୍ରତାପ ସିଂହ ଯାଦବଙ୍କୁ ପ୍ରାର୍ଥୀ କରାଯାଇପାରେ ବୋଲି ଚର୍ଚ୍ଚା ଚାଲିଛି । ସେ ଆର୍ଜେଡି ନେତା ଲାଲୁ ଯାଦବଙ୍କର ଜ୍ୱାଇଁ । ବର୍ତ୍ତମାନ ସମୟରେ ତେଜ ପ୍ରତାପ ହେଉଛନ୍ତି ଅଖିଳେଶଙ୍କ ପରିବାରର ଏକମାତ୍ର ସଦସ୍ୟ ଯିଏକି ରାଜନୀତିରେ ସକ୍ରିୟ ଥିଲେ ବି ସାଂସଦ କିମ୍ବା ବିଧାୟକ ପଦରେ ନାହାନ୍ତି । ସପା ନେତା ରାମ ଗୋପାଳ ଯାଦବଙ୍କର ଭଣଜା ଅରବିନ୍ଦ ଯାଦବ, ପୂର୍ବତନ ବିଧାୟକ ସୋବରନ୍ ସିଂହ ଯାଦବଙ୍କ ନାମ ମଧ୍ୟ ଏଥିଲାଗି ଚର୍ଚ୍ଚାରେ ରହିଛି । ସେପଟେ ଅଖିଳେଶଙ୍କ ସହିତ ଅଯୋଧ୍ୟା ସାଂସଦ ଅବଧେଶ ପ୍ରସାଦ ମଧ୍ୟ ବିଧାୟକ ପଦ ଛାଡ଼ିଛନ୍ତି । ସେ ମିଲ୍କିପୁର ବିଧାନସଭା କ୍ଷେତ୍ରରୁ ବିଧାୟକ ଥିଲେ ।