ଝରିଗାଁ,୧୫/୧୧ : ଧାନ ଗଦାରେ ନିଆଁ ଲାଗି ପ୍ରାୟ ଦୁଇ ଏକର ଧାନ ଜଳି ଯାଇଛି । ଏହି ଦୃଶ୍ୟ ଦେଖିବାକୁ ମିଳିଛି ଝରିଗାଁ ବ୍ଲକ, ପାଲିଆ ପଞ୍ଚାୟତ ସାନରାମାସା ଗ୍ରାମରେ । ସୂଚନା ଅନୁସାରେ ଗୋଟିଏ ପରିବାରର ୫ ଏକର ଧାନ କାଟି ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ସମୁଖରେ ଥିବା ଖଳାରେ ୧୦ଟି ଧାନ ଗଦା ରହିଥିଲା । ଆଜି ଅପରାହ୍ନ ୩ ଟା ସମୟରେ କୌଣସି କାରଣରୁ ଧାନ ଗଦାରେ ନିଆଁ ଲାଗି ପ୍ରାୟ ଦୁଇ ଏକର ଧାନ ନଷ୍ଟ ହୋଇଥିବା କହିଛନ୍ତି କ୍ଷତିଗ୍ରସ୍ତ ହୋଇଥିବା ଚାଷୀ ।
କ୍ଷତିଗ୍ରସ୍ତ ଚାଷୀ ହେଲେ ରୂପସିଂ ଗୌଡ଼, ଡମୁ ଗୌଡ଼, ଲଛମନ ଗୌଡ଼। ରୁପ ସିଂ ଗୌଡ଼ଙ୍କ ଗୋଟିଏ ଧାନ ଗଦା ସମ୍ପୂର୍ଣ୍ଣ ଜଳି ନଷ୍ଟ ହୋଇଥିବାବେଳେ ଲଛମନ ଗୌଡ଼ଙ୍କ ଧାନ ଗଦାର ପ୍ରାୟ ୫୦ପ୍ରତିଶତ ଜଳି ନଷ୍ଟ ହୋଇ ଯାଇଛି । ପ୍ରାୟ ଦୁଇ ଏକର ଧାନ ପୋଡି ଯାଇଥିବା କହିଛନ୍ତି ଚାଷୀ । ନିଆଁ ଲାଗିବା କ୍ଷଣି ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଯୋଗାଯୋଗ କରିଥିଲେ । ଅଗ୍ନିଶମ ଗାଡି ପହଞ୍ଚିବାରେ ବିଳମ୍ବ ହେବାରୁ ସ୍ଥାନୀୟ ଲୋକେ ହାଣ୍ଡି ମାଠିଆ ବାଲ୍ଟିରେ ପାଣି ଆଣି ନିଆଁ ଲିଭାଇବାରେ ଲାଗି ପଡ଼ିଥିଲେ ।
ଭଲ ଥିବା ଧାନକୁ ତୁରନ୍ତ ନିଆଁ କବଳରୁ ଛାଟି ଛାଟି ଅଲଗା କରି ନିଆଁକୁ ଆୟତ୍ତ କରିଥିଲେ। ପରେ ଅଗ୍ନିଶମ ବିଭାଗ କର୍ମଚାରୀ ଓ ଦମକଳ ଗାଡି ଘଟଣାସ୍ଥଳରେ ପହଞ୍ଚିବା ପରେ ନିଆଁକୁ ସମ୍ପୂର୍ଣ୍ଣ ଲିଭା ଯାଇଥିଲା । ନଷ୍ଟ ହୋଇଥିବା ପ୍ରାୟ ଦୁଇ ଏକର ଧାନ ୫୦ହଜାର ଟଙ୍କାରୁ ଊର୍ଦ୍ଧ୍ବ ହେବ ବୋଲି କ୍ଷତିଗ୍ରସ୍ତ ଚାଷୀ ରୂପସିଂ ଗୌଡ଼, ଲଛମନ ଗୌଡ଼ ଓ ଡ଼ମୁଁ ଗୌଡ଼ କହିଛନ୍ତି । ଧାର୍ କରଜ ଓ ହାଡ଼ଭଙ୍ଗା ପରିଶ୍ରମ କରି ଚାଷ କରିଥିବା ଗରିବ କ୍ଷୁଦ୍ର ଚାଷୀ ଏହି କ୍ଷତି ନେଇ ଚିନ୍ତାରେ ପଡ଼ିଛନ୍ତି । ପ୍ରଶାସନ ପକ୍ଷରୁ କ୍ଷତିଗ୍ରସ୍ତ ଏହି ଗରିବ ଚାଷୀ ପରିବାରକୁ କ୍ଷତିପୂରଣ ଯୋଗାଇଦେବାକୁ ସ୍ଥାନୀୟଲୋକେ ଦାବି କରିଛନ୍ତି।
