ଭୁବନେଶ୍ୱର, ୨୫/୦୪: ବହୁଚର୍ଚ୍ଚିତ ନବ ଦାସ ହତ୍ୟା ମାମଲା । ଝାରସୁଗୁଡ଼ା ପରେ ବ୍ରହ୍ମପୁରରେ କ୍ରାଇମ୍ବ୍ରାଞ୍ଚର ଖୋଳତାଡ଼ । ଅଭିଯୁକ୍ତ ଗୋପାଳ ଦାସ ପରିବାରକୁ ଜେରା । ବଡ଼ ଭାଇ ସହ ପୁତୁରାକୁ ତଦନ୍ତକାରୀ ଟିମ୍ କରୁଛି ପଚରାଉଚରା । ୨ ଦିନ ଭିତରେ ୫ଜଣଙ୍କୁ ପଚରାଉଚରା କରାଯାଇଛି । ଗୁରୁବାର ଟାଉନ ଥାନାରେ ପଚରାଉଚରା କରିଥିବା ସୂଚନା ମିଳିଛି ।
ସୂଚନା ମୁତାବକ, ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସ ହତ୍ୟା ଘଟଣାର ପୁନଃତଦନ୍ତ ଚଳାଇଛି କ୍ରାଇମ୍ବ୍ରାଞ୍ଚ । ସେଥିପାଇଁ ଏହି ମାମଲାରେ ଗିରଫ ହୋଇଥିବା ଏକମାତ୍ର ଅଭିଯୁକ୍ତ ତଥା ପୁଲିସ ଏଏସ୍ଆଇ ଗୋପାଳ ଦାସର ମୋବାଇଲ୍ କଲ୍ ରେକର୍ଡ ଆଉ ଥରେ ଯାଞ୍ଚ କରାଯାଇଥିଲା । ହତ୍ୟାକାଣ୍ଡର ପ୍ରାୟ ୬ ମାସ ପୂର୍ବର କଲ୍ ରେକର୍ଡକୁ କ୍ରାଇମବ୍ରାଞ୍ଚ ଟିମ୍ ତନ୍ନତନ୍ନ କରି ଯାଞ୍ଚ କରିଥିଲା । ଏହି ସମୟ ମଧ୍ୟରେ ଗୋପାଳ ଦାସର କିଛି ସନ୍ଦିଗ୍ଧ କଲ୍ ଥିବା ତଦନ୍ତକାରୀ ଟିମ୍ ଆଶଙ୍କା କରିଥିଲା । ତେବେ ନବ ଦାସଙ୍କ ପରିବାର ଲୋକେ ଏହି ହତ୍ୟାକାଣ୍ଡ ପଛରେ ଦାୟୀ ଥିବା ନିର୍ଦ୍ଦିଷ୍ଟ କୌଣସି ବ୍ୟକ୍ତିର ନାଁ ତଦନ୍ତକାରୀ ଟିମ୍କୁ ଜଣାଇନାହାନ୍ତି ବୋଲି କ୍ରାଇମବ୍ରାଞ୍ଚ ସୂତ୍ରରୁ ସୂଚନା ମିଳିଥିଲା । ମାତ୍ର ଅଭିଯୁକ୍ତ ଗୋପାଳ ପଛରେ କାହାର ନା କାହାର ହାତ ଥିବା ପରିବାର ଲୋକେ ଦୃଢ଼ ଭାବେ ସନ୍ଦେହ କରୁଥିଲେ। ତେଣୁ ହତ୍ୟାକାଣ୍ଡ ପଛର ଖିଅ ଖୋଜିବାକୁ ତଦନ୍ତକାରୀ ଟିମ୍ ଗୋପାଳର କଲ୍ ରେକର୍ଡକୁ ଛାନ୍ଭିନ୍ କରିଥିଲା । ଏବେ ବ୍ରହ୍ମପୁର ଟାଉନ୍ ଥାନାକୁ ୫ ଜଣଙ୍କୁ ଡକାଇ ସେମାନଙ୍କ ବୟାନ ରେକର୍ଡ କରାଯାଇଛି । ଗୋପାଳର ପୁଅ, ବଡ଼ ଭାଇ, ବଡ଼ ଭାଇର ପୁଅକୁ ଜେରା କରାଯାଇଥିବା ନେଇ ସୂଚନା ମିଳିଛି ।
