ଖଲ୍ଲିକୋଟ, ୨୬/୭ : ବ୍ରହ୍ମପୁରରୁ କୋଲକାତା ଅଭିମୁଖେ ଯାଉଥିବା ଖମ୍ବେଶ୍ବରୀ ବସରୁ ୫୦କେଜି ରୂପା ଚୋରି ହୋଇଥିବା ଭେଜିପୁଟ ଫାଣ୍ଡିରେ ଅଭିଯୋଗ ହୋଇଛି । ବ୍ରହ୍ମପୁରରୁ କୋଲକାତା ଅଭିମୁଖେ ଯାଉଥିବା ଖମ୍ବେଶ୍ବରୀ ବସର ଯାତ୍ରୀମାନେ ଜଳଖିଆ ଖାଇବା ପାଇଁ ଆଜି ସନ୍ଧ୍ୟା ୭ଟାରେ ଭେଜିପୁଟ ନିକଟରେ ଅଟକିଥିଲେ ।
ପ୍ରାୟ ସମସ୍ତ ଯାତ୍ରୀ ଜଳଖିଆ ଖାଇବା ପାଇଁ ତଳକୁ ଓଲ୍ହାଇ ଯାଇଥିଲେ । ବସ ଭିତରେ ଅଳ୍ପ କିଛି ଯାତ୍ରୀ ଥିଲେ। ଏହି ସମୟରେ ହଠାତ ୩ରୁ ୪ ଜଣ ଯୁବକ ବସ୍ ଭିତରେ ପଶି ଦୁଇଟି ବ୍ୟାଗ ନେଇ ଚାଲି ଯାଇଥିଲେ। କିଛି ସମୟ ପରେ ଜଳଖିଆ ଖାଇ ଯାତ୍ରୀମାନେ ବସ ଭିତରକୁ ଫେରିଥିଲେ । ହଠାତ ଜଣେ ଯାତ୍ରୀ ଚିତ୍କାର କରିଥିଲେ ମୋର ରୂପା ଭର୍ତ୍ତି ଦୁଇଟି ବ୍ୟାଗ ନାହିଁ।
କୋଲକାତାର ରୁପା ବ୍ୟବସାୟୀ ଅଭିଷେକ ମନ୍ଦା ବ୍ରହ୍ମପୁରରୁ ରୂପା ନେଇ ଖମ୍ବେଶ୍ବରୀ ବସରେ କୋଲକାତା ଯାଉଥିଲେ । ବ୍ରହ୍ମପୁରରୁ ଏକ କାର୍ ଯୋଗେ ୩ ରୁ ୪ ଜଣ ଯୁବକ ବ୍ରହ୍ମପୁରରୁ ବସର ପିଛା କରି ଆସିଥିଲେ। ସୁଯୋଗ ପାଇ ଭେଜିପୁଟରୁ ବ୍ୟାଗ ନେଇ ଭୁବନେଶ୍ୱର ଆଡ଼େ ପଳେଇ ଯାଇଥିବା ଜଣାପଡ଼ିଛି । ଖବରପାଇ ଖଲ୍ଲିକୋଟ ଥାନା ଏବଂ ଭେଜିପୁଟ ଫାଣ୍ଡି ପୋଲିସ ତଦନ୍ତ ଆରମ୍ଭ କରିଛି । ଆଖପାଖର ସିସିଟିଭି ଫୁଟେଜ ଯାଞ୍ଚ କରି କାରକୁ ଧରିବା ପାଇଁ ଉଦ୍ୟମ ଆରମ୍ଭ କରିଛି ପୋଲିସ । ଦୁଇଟି ବ୍ୟାଗରେ ରୂପା ସହ ନଗଦ ୪ ଲକ୍ଷ ୭୨ ହଜାର ଟଙ୍କା ଥିବା ମଧ୍ୟ ଅଭିଯୋଗ କରିଛନ୍ତି ରୂପା ବ୍ୟବସାୟୀ ଅଭିଷେକ ମନ୍ଦା।