ନୂଆଦିଲ୍ଲୀ,୧୩/୬: ଉତ୍ତରପ୍ରଦେଶର ଗଜିଆବାଦରେ ଭୟାବହ ଅଗ୍ନିକାଣ୍ଡ । ଏକ ବିଲ୍ଡିଂର ତୃତୀୟ ମହଲାରେ ନିଆଁ ଲାଗି ୫ ଜଣଙ୍କର ମୃତ୍ୟୁ ଘଟିଛି । ତେବେ ମୃତକଙ୍କ ମଧ୍ୟରେ ୨ଜଣ ଶିଶୁ ଥିବା ଜଣାପଡିଛି । ହାଜିପୁର ଗାଁରେ ରାତି ପ୍ରାୟ ୮ଟା ସମୟରେ ଘଟିଛି । ନିଆଁ ଖୁବ ଜୋରରେ ବ୍ୟାପିବା ଫଳରେ ଲୋକେ ବାହାରକୁ ବାହାରି ନ ପାରିବାରୁ ସେମାନଙ୍କର ମୃତ୍ୟୁ ହୋଇଥିବା କୁହାଯାଉଛି ।
ସୂଚନା ଅନୁଯାୟୀ, ଏହି ବିଲ୍ଡିଂର ତୃତୀୟ ମହଲାରେ ଇସ୍ତିୟାକ ଅଲି ନିଜ ପରିବାରକୁ ଧରି ରହୁଥିଲେ । ପରିବାରରେ ତାଙ୍କ ପୁଅ ସାରିକ, ସାରିକଙ୍କ ସ୍ତ୍ରୀ, ସାତ ମାସର ଶିଶୁ ଏବଂ ଭଉଣୀ ଥିଲେ । ସାରିକଙ୍କ ଅନ୍ୟ ଭଉଣୀ ନିଜ ଶିଶୁଙ୍କୁ ଧରି ତାଙ୍କ ଘରକୁ ଆସିଥିଲେ । ହେଲେ ଏହି ଭୟାବହ ଅଗ୍ନିକାଣ୍ଡରେ ସମସ୍ତଙ୍କର ମୃତ୍ୟୁ ହୋଇଛି । ତେବେ ଅଗ୍ନିକାଣ୍ଡର ପ୍ରକୃତ କାରଣ ଜଣାପଡି ନ ଥିବା ବେଳ ସର୍ଟ ସର୍କିଟ ଯୋଗୁଁ ମୃତ୍ୟୁ ହୋଇଥିବା ସୂଚନା ମିଳିଛି । ମହଲାରେ ଫୋମ ବିଜନେସ ଚାଲିଥିବା କୁହାଯାଇଛି । ସେପଟେ ଏହି ଅଗ୍ନିକାଣ୍ଡ ଘଟିବା ପରେ ଦମକଳ ବିଭାଗ ନିଆଁଲିଭା କାର୍ଯ୍ୟରେ ନିୟୋଜିତ ହୋଇଥିଲେ । ସଂକୁଚିତ ଗଳିରେ ଏହି ବିଲ୍ଡିଂ ଥିବାରୁ ଦମକଳ ବିଭାଗକୁ ନିଆଁଲିଭାରେ ଅନେକ ଅସୁବିଧାର ସମ୍ମୁଖୀନ ହେବାକୁ ପଡିଥିଲା ।