ଫୁଲବାଣୀ,୨୮/୭ :  କୋଟଗଡ ଥାନା ଅଞ୍ଚଳର ଜଣେ ନାବାଳିକା ଛାତ୍ରୀଙ୍କୁ ଅସଦାଚରଣ  କରିବା ମାମଲାର  ବିଚାର କରି ଫୁଲବାଣୀ ପୋକସୋ ଅଦାଲତ ଅଭିଯୁକ୍ତ ପ୍ରଧାନ ଶିକ୍ଷକ ଜଗନ୍ନାଥ ପଣ୍ଡାଙ୍କୁ ୩ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ଅଭିଯୁକ୍ତଙ୍କୁ   ୧୦ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି କୋର୍ଟ l ଜରିମାନା ଅନାଦେୟ   ଅଧିକ ୪ ମାସ ଜେଲ ଭୋଗିବାକୁ ପଡିବ ବୋଲି ଅଦାଲତ ତାଙ୍କ  ରାୟରେ ଉଲ୍ଲେଖ କରିଛନ୍ତି।

 ସୂଚନା ମୁତାବକ ୨୦୧୪ ମସିହା ଜାନୁଆରୀ ୬ ତାରିଖ ସନ୍ଧ୍ୟା ୭ ଟା ସମୟରେ ପ୍ରଧାନ ଶିକ୍ଷକ ଶ୍ରୀ ପଣ୍ଡା ଛାତ୍ରୀ ଜଣଙ୍କୁ  ନିଜ ଘରକୁ ଡାକି ଥିଲେ l ତାଙ୍କୁ ଘରୋଇ କାମ କରାଇବା ସହିତ ତାଙ୍କୁ ଅସଦାଚରଣ  କରିଥିଲେ। ଛାତ୍ରୀ ଜଣକ ପ୍ରତିବାଦ କରିବାରୁ ପ୍ରଧାନ ଶିକ୍ଷକ ତାଙ୍କୁ ଛାଡି ଦେଇଥିଲେ । ୧୩ ତାରିଖରେ ପିଡିତା ଛାତ୍ରୀ ଜଣକ ନିଜ ଘରକୁ ଆସି  ପରିବାର ଲୋକଙ୍କୁ ଘଟଣା ସମ୍ପର୍କରେ  କହିଥିଲେ। ସେହି ଦିନ ହିଁ ପରିବାର ଲୋକଙ୍କ ସହ କୋଟଗଡ ଥାନାକୁ ଯାଇ ପିଡିତା  ଲିଖିତ ଅଭିଯୋଗ କରିଥିଲେ। ଅଭିଯୋଗ ଆଧାରରେ କୋଟଗଡ  ପୁଲିସ ୩/୧୪ ରେ ଏକ ମାମଲା ରୁଜୁ  କରିଥିଲା। ଆଜି ଏହି ମାମଲାର ଶୁଣାଣୀ କରି ପୋକସୋ କୋର୍ଟ ବିଚାରପତି ରାଜେଶ ଦାସ ୧୬ ଜଣ ସାକ୍ଷୀ ଏବଂ ପିଡିତାଙ୍କ ବୟାନକୁ ଭିତ୍ତିକରି ପ୍ରଧାନ ଶିକ୍ଷକଙ୍କୁ ଦୋଷୀସାବ୍ୟସ୍ତ କରିବା ସହ ଉପରୋକ୍ତ ଦଣ୍ଡାଦେଶ ପ୍ରଦାନ କରିଛନ୍ତି। ମାମଲାଟିକୁ ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଅସୀମ ପ୍ରହରାଜ ପରିଚାଳନା କରୁଥିଲେ।