ନାକଟିଦେଉଳ, ୧୮/୧୧: ବାର୍‌ହା ଶିକାର ପାଇଁ ବିଛା ଯାଇଥିବା ବିଦ୍ୟୁତ ଫାଶରେ ତିନି ହାତୀଙ୍କ ମୃତ୍ୟୁ ହୋଇଛି । ସମ୍ୱଲପୁର ଜିଲ୍ଲା ନାକଟିଦେଉଳ ରେଞ୍ଜ ଘୋଷରାମାଳ ସେକ୍ସନର ବୁରୋମାଳରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ସୋମବାର ଭୋରରୁ ବୁରୋମାଳ ଗାଁର କିଛି ବ୍ୟକ୍ତି ରାସ୍ତାର ଅଳ୍ପ ଦୂରରେ ତିନି ହାତୀ ମରି ପଡିଥିବା ଦେଖିବାକୁ ପାଇଥିଲେ। ତିନୋଟି ଯାକ ମାଈ ହୋଇଥିବା ବେଳେ ସେମାନଙ୍କ ମଧ୍ୟରୁ ଗୋଟିଏ ଶାବକ ରହିଛି । ସମସ୍ତଙ୍କ ଗୋଡରେ ବିଦ୍ୟୁତ ତାର ଗୋଡେଇ ହୋଇଥିବା ଦେଖିବାକୁ ମିଳିଛି । ବାରହା ଶିକାର ପାଇଁ ବିଛା ଯାଇଥିବା ତାର ସଂସ୍ପର୍ଶରେ ଆସି ଏମାନଙ୍କ ମୃତ୍ୟୁ ହୋଇଥିବା ସ୍ପଷ୍ଟ ହୋଇଛି। ଏହା ଦେଖି ଲୋକେ ତୁରନ୍ତ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ ଆରମ୍ଭ କରିଛନ୍ତି ।

ତେବେ ଘଟଣାସ୍ଥଳକୁ ଲାଗି ଧାନ ବିଲ ରହିଛି । ଏହି ହାତୀ ପଲ ଧାନ ଖାଇବାକୁ ଆସିଥିବା ବେଳେ ବିଦ୍ୟୁତ ଫାଶରେ ପଡିଛନ୍ତି । ସେପଟେ ଆଉ ଏକ ମାଈ ହାତୀ ନିକଟବର୍ତ୍ତୀ ଅଞ୍ଚଳରେ ଘୂରି ବୁଲୁଥିବା ବେଳେ ତାହା ମୃତ ଶାବକର ମା ବୋଲି ସନ୍ଦେହ କରାଯାଉଛି।