ବରଗଡ଼,୨୪/୦୭ : ନୃସିଂହନାଥ ଦର୍ଶନ ସାରି ଗନ୍ଧମାର୍ଦ୍ଦନ ପର୍ବତ ଉପରେ ରହିଥିବା କପିଳଧାରକୁ ଚଢ଼ିଥିଲେ ପର୍ଯ୍ୟଟକ। ପାହାଡ଼ିଆ ପାଦଚଲା ରାସ୍ତାରେ ଯାଉଥିବା ବେଳେ ହୋଇଗଲେ ବାଟବଣା। ଗନ୍ଧମାର୍ଦ୍ଦନର ଘଞ୍ଚ ଜଙ୍ଗଲରେ ଫସିଗଲେ ଛତିଶଗଡ଼ର ୧୭ ପର୍ଯ୍ୟଟକ। ଦୀର୍ଘ ୧୫ ଘଣ୍ଟା ପରେ ଉଦ୍ଧାର କଲେ ରେସ୍କ୍ୟୁ ଟିମ୍। ସମସ୍ତ ପର୍ଯ୍ୟଟକ ଏବେ ସୁରକ୍ଷିତ ଅଛନ୍ତି। ସମସ୍ତଙ୍କୁ ଉଦ୍ଧାର କରାଯାଇ ବରଗଡ଼ ଅଣାଯାଇଥିବା ସୂଚନା ମିଳିଛି।
ସୂଚନାନୁଯାୟୀ, ଛତିଶଗଡ଼ର ୧୭ ଜଣିଆ ପର୍ଯ୍ୟଟକ ଦଳ ପଶ୍ଚିମ ଓଡ଼ିଶାର ବିଭିନ୍ନ ଦର୍ଶନୀୟ ସ୍ଥାନ ବୁଲିବାକୁ ଆସିଥିଲେ । ବୁଧବାର ପୂର୍ବାହ୍ଣ ସାଢ଼େ ୧୦ଟାରେ ନୃସିଂହନାଥରୁ ଦର୍ଶନ ସାରି ହରିଶଙ୍କର ଅଭିମୁଖେ ଯାଉଥିଲେ । ଘଞ୍ଚ ଗନ୍ଧମାର୍ଦ୍ଦନର ପାହାଡ଼ିଆ ରାସ୍ତା ଦେଇ ଯାଉଥିବାବେଳେ ସେମାନେ ବାଟବଣା ହୋଇଯାଇଥିଲେ । ସମୟ ଗଡ଼ିବା ସହିତ ରାତି ବଢିଥିଲା ଓ ଦେଖୁ ଦେଖୁ ଚାରିଆଡ଼େ ଛାଇ ଯାଇଥିଲା କଳା ବାଦଲ ସାଙ୍ଗକୁ ପ୍ରବଳ ବର୍ଷା। ଶେଷରେ ଫେରିବା ବାଟ ନପାଇ ପାଣି ଘେରରେ ଫସି ରହିଥିଲେ ସମସ୍ତେ। ରାତି ପ୍ରାୟ ୯ଟାରେ ପର୍ଯ୍ୟଟକମାନେ ଯେକୌଣସି ମତେ ସ୍ଥାନୀୟ ପ୍ରଶାସନକୁ ଟୋଲ ଫ୍ରି ନମ୍ବର ସାହାଯ୍ୟରେ ଯୋଗାଯୋଗ କରିଥିଲେ। ଖବର ପାଇବା ମାତ୍ରେ ୪୦ ଜଣିଆ ଟିମ୍ ଉଦ୍ଧାର କାର୍ଯ୍ୟରେ ବାହାରି ଯାଇଥିଲେ। ରାତି ତମାମ ପର୍ବତ ଉପରେ ଜଙ୍ଗଲ ମଧ୍ୟରେ ଖୋଜାଖୋଜି କରିଥିଲେ। ଡିଭିଏଫ୍ ଫୋର୍ସ, ଅଗ୍ନିଶମ ବାହିନୀ, ବନ କର୍ମଚାରୀ, ପୁଲିସ୍ ପ୍ରଶାସନର ଅଧିକାରୀମାନେ ଏହି ଟିମ୍ରେ ସାମିଲ ଥିଲେ। ବର୍ଷା ବିତ୍ପାତ ଏବଂ ହାତୀଭୟ ଉଦ୍ଧାର କାର୍ଯ୍ୟରେ ଅଡୁଆ ସୃଷ୍ଟି କରିଥିଲା। ଶେଷରେ ମୋବାଇଲ୍ ଟ୍ରାକ୍ କରି ସମସ୍ତ ୧୭ ପର୍ଯ୍ୟଟକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ସୂଚନା ମିଳିଛି।
