ଭୁବନେଶ୍ବର, ୦୧/୧୧: ସବ୍ ୱେ ଏସି ମାର୍କେଟରେ ଅଗ୍ନିକାଣ୍ଡ । ଭୂତଳ ଶାଢୀ ଦୋକାନରେ ଲାଗିଲା ନିଆଁ । ରାତି ସାଢେ ୧୧ ଟାରୁ ଆରମ୍ଭ ହୋଇ ସାଢେ ୨ ଟା ପର୍ଯ୍ୟନ୍ତ ଜଳିଲା । ସାରା ରାତି ଭୂତଳ ବଜାରରୁ ବାହାରିଲା ଧୂଆଁ । ନିଆଁ ଓ ଧୂଆଁର ବଳୟରେ ରହିଲା ରାଜମହଲରୁ ଏଜି ଛକ ରାସ୍ତା । ପାଖରେ ମାର୍କେଟ ବିଲ୍ଡିଂ, ହାଟ ଏବଂ ପେଟ୍ରୋଲ ପମ୍ପ ଥିବା ଯୋଗୁଁ ଲୋକଙ୍କ ନିରାପତ୍ତା ପାଇଁ ରାତି ତମାମ ଜଗିଲେ କ୍ୟାପିଟାଲ ଥାନାର ଅଧିକାରୀ ଓ କର୍ମଚାରୀ ସମେତ ଦୁଇ ପ୍ଲାଟୁନ ପୋଲିସ ଫୋର୍ସ।
ସୂଚନା ମୁତାବକ, ଗୁରୁବାର ରାତିରେ ୨ନମ୍ବର ମାର୍କେଟ ବିଲ୍ଡିଂ ଏବଂ ୧ନମ୍ବର ହାଟ ମଧ୍ୟରେ ଥିବା ଭୂତଳ ବଜାରର ଗୋଟିଏ ଶାଢୀ ଦୋକାନରେ ଅଗ୍ନିକାଣ୍ଡ ଘଟିଥିଲା । ତେବେ ଘଟଣାରେ ବଜାର ଭିତରେ ଥିବା ଶାଢୀ ଦୋକାନ ସମ୍ପୂର୍ଣ୍ଣ ଜଳି ଯାଇ ସେଥିରୁ ପ୍ରବଳ ମାତ୍ରାରେ ଧୂଆଁ ବାହାରିଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ କଳ୍ପନା ଏବଂ ସେକ୍ରେଟେରିଏଟ୍ ଅଗ୍ନିଶମ ବାହିନୀ ପହଞ୍ଚି ନିଆଁ ଲିଭାଇବା ପାଇଁ ଉଦ୍ୟମ କରିଥିଲେ । ନିଜେ ଡିଏଫଓ ଏବଂ ଏଏଫ୍ଓ ସହ ୩୦ଜଣ ଅଗ୍ନିଶମ କର୍ମଚାରୀ ଦୀର୍ଘ ୬ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ନିଆଁ ଓ ଧୂଆଁ ଉପରେ ନିୟନ୍ତ୍ରଣ ପାଇଥିଲେ । ତେବେ ଏହି ଘଟଣାରେ କେହି ଆହତ ହୋଇ ନଥିବା ବେଳେ ଏପରି କେମିତି ହେଲା ତାହାର ଯାଞ୍ଚ୍ କରିବ ଅଗ୍ନିଶମ ବିଭାଗ । ଏନେଇ ସୂଚନା ଦେଇଛନ୍ତି ଡିଏଫଓ ।ତେବେ ସ୍ଥାନୀୟ ଲୋକଙ୍କ ମଧ୍ୟରୁ କେହି ଏହାକୁ ସର୍ଟ ସର୍କିଟ କହିଥିବା ବେଳେ ଆଉ କେହି ଧୂପ ଏବଂ ଦୀପ ଲଗାଇ ଦୋକାନ ବନ୍ଦ କରିଥିବାରୁ ଏପରି ଅଘଟଣ ଘଟିଛି ବୋଲି କହିଛନ୍ତି ।
