ଭୁବନେଶ୍ୱର,୧୧/୦୭: ଲମ୍ବା ଅବଧି ପରେ ଉତ୍ସାହରେ ଉଛୁଳୁଛି କଂଗ୍ରେସ ଶିବିର । ଆସୁଛନ୍ତି କଂଗ୍ରେସର ସବୁଠାରୁ ଲୋକପ୍ରିୟ ନେତା ତଥା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧି ଓ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ । ଶୁକ୍ରବାର ଭୁବନେଶ୍ୱରର ବରମୁଣ୍ଡା ପଡ଼ିଆରେ ଆୟୋଜିତ ସମ୍ବିଧାନ ବଞ୍ଚାଅ ସମାବେଶରେ ଯୋଗ ଦେବେ ରାହୁଲ ଓ ଖଡ୍ଗେ ।
ସମାବେଶକୁ ସଫଳ କରିବା ପାଇଁ ପିସିସି ସଭାପତି ଭକ୍ତଚରଣ ଦାସ ଓ ତାଙ୍କ ଟିମ୍ ପୂରା ରାତି ଦିନ ଏକ କରି ଲାଗି ପଡ଼ିଛନ୍ତି । ନିର୍ବାଚନ ପରେ ଏହା ରାହୁଲଙ୍କ ପ୍ରଥମ ଓଡ଼ିଶା ଗସ୍ତ। ଏପଟେ ଭକ୍ତ ସଭାପତି ହେବା ପରେ ପ୍ରଥମ କରି ଏତେ ବଡ଼ ସମାବେଶ ଆୟୋଜନ ହୋଇଛି। ତେଣୁ ସମାବେଶକୁ ସଫଳ କରିବା ଭକ୍ତଙ୍କ ପାଇଁ ମଧ୍ୟ ବଡ଼ ଆହ୍ୱାନ ।
ଏପଟେ କଂଗ୍ରେସ ହୋର୍ଡିଂ, ପତାକାରେ ଛାଇଯାଇଛି ଭୁବନେଶ୍ୱର । ବିମାନବନ୍ଦରରୁ ଜୟଦେବବିହାର, ଜୟଦେବ ବିହାରରୁ ବରମୁଣ୍ଡା ପଡ଼ିଆ ପର୍ଯ୍ୟନ୍ତ ସବୁ ରାସ୍ତା ଯେମିତି ରାହୁଲମୟ ପାଲଟିଛି । ହାତରେ ସମ୍ବିଧାନ ଧରିଥିବା ରାହୁଲଙ୍କ ଟି-ସାର୍ଟ ପିନ୍ଧା ଫଟୋର ହୋର୍ଡିଂ ସବୁଆଡ଼େ ଲଗାଇଛି କଂଗ୍ରେସ । ନିଜେ ଭକ୍ତ କଂଗ୍ରେସ ଭବନରୁ ବରମୁଣ୍ଡା ପଡ଼ିଆ ପର୍ଯ୍ୟନ୍ତ ବୁଲିବୁଲି ପ୍ରସ୍ତୁତି ସମୀକ୍ଷା କରୁଛନ୍ତି । ସ୍ୱତନ୍ତ୍ର ଟିମ୍ ସହ ଯୁବ, ଛାତ୍ର, ମହିଳା ସଂଗଠନର କର୍ମକର୍ତ୍ତାମାନେ ଏହି କାମରେ ଲାଗିପଡ଼ିଛନ୍ତି । ଭୁବନେଶ୍ୱର ସମାବେଶକୁ ସଫଳ କରିବା ପାଇଁ ପ୍ରତ୍ୟେକ ଜିଲ୍ଲାରେ ସଂଯୋଜକ ଓ ବିଧାୟକମାନଙ୍କୁ ଦାୟିତ୍ୱ ଦିଆଯାଇଛି । ପ୍ରତି ଜିଲ୍ଲାରୁ କର୍ମୀ ଆସିବେ ।
ପିସିସି ସଭାପତି ଭକ୍ତ କହିଛନ୍ତି, କଂଗ୍ରେସର ଏହି ସମାବେଶ ଓଡ଼ିଶାରେ ଏକ ନୂଆ ରାଜନୀତିର ବାତାବରଣ ସୃଷ୍ଟି କରିବ । ଓଡ଼ିଶାବାସୀ ଆଗ୍ରହର ସହ ରାହୁଲ ଗାନ୍ଧିଙ୍କୁ ଶୁଣିବା ପାଇଁ ଅପେକ୍ଷା କରିଛନ୍ତି । ଭକ୍ତ କହିଛନ୍ତି, ଡ୍ରାଇଭର ସଂଘର ଆନ୍ଦୋଳନ ପ୍ରସଙ୍ଗରେ ରାଜ୍ୟ ସରକାରଙ୍କ ଭୂମିକା ଅନେକ ପ୍ରଶ୍ନ ଉଠାଉଛି । ଆନ୍ଦୋଳନ ଯୋଗୁ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ସଙ୍କଟ ସୃଷ୍ଟି ହେଲାଣି । ସାଧାରଣ ଲୋକେ ଗୁରୁତର ଭାବେ ପ୍ରଭାବିତ ହେଉଛନ୍ତି । ମାତ୍ର ଆନ୍ଦୋଳନକୁ ବନ୍ଦ କରିବା ପାଇଁ ସରକାର ଉଦ୍ୟମ କରୁଥିବା ମନେ ହେଉନି । କଂଗ୍ରେସର ସମାବେଶକୁ ବିଫଳ କରିବା ପାଇଁ ରାଜ୍ୟ ସରକାର ପ୍ରୟାସ କରୁଥିବା ମନେ ହେଉଛି । ରାହୁଲଙ୍କ ଗସ୍ତକୁ ନେଇ ବହୁ ଆଗରୁ ଘୋଷଣା ହୋଇଛି । ମାତ୍ର ଏହି ସମୟରେ ଉପୁଜିଥିବା ଡ୍ରାଇଭର ସଂଘର ଆନ୍ଦୋଳନକୁ ବନ୍ଦ କରିବା ପାଇଁ ସରକାର ସମାଧାନ ବାଟ ବାହାର କରୁନାହାନ୍ତି । ସରକାର କଂଗ୍ରେସ ସମାବେଶକୁ ସଫଳ ନ କରିବା ପାଇଁ ଷଡ଼ଯନ୍ତ୍ର କରୁଛନ୍ତି । ରାଜନୈତିକ ଷଡ଼ଯନ୍ତ୍ର ପାଇଁ ଓଡିଶା ଲୋକଙ୍କୁ ସରକାର ହଇରାଣ କରନ୍ତୁ ନାହିଁ । ଏଭଳି କଲେ କଂଗ୍ରେସ ଦଳ କେବେ ବରଦାସ୍ତ କରିବ ନାହିଁ । କଂଗ୍ରେସର ସମାବେଶ ଯେଭଳି ପ୍ରଭାବିତ ନ ହେବ, ସେଥିପାଇଁ ଡ୍ରାଇଭର ସଂଘକୁ ପିସିସି ସଭାପତି ନିବେଦନ କରିଛନ୍ତି ।
ସେ କହିଛନ୍ତି, ଡ୍ରାଇଭର ସଂଘ ପ୍ରତି କଂଗ୍ରେସ ଦଳର ସହାନୁଭୂତି ରହିଛି । ଆଜି ଯେତିକି ଗାଡ଼ି ସମାବେଶ ପାଇଁ ଆସିବେ, ସେମାନଙ୍କୁ ଆସିବା ପାଇଁ ଦିଆଯାଉ । ଆଜି ଗୋଟିଏ ଦିନ ପାଇଁ ଆନ୍ଦୋଳନକୁ ପ୍ରତ୍ୟାହାର କରିବା ସେ ଡ୍ରାଇଭର ସଂଘକୁ ନିବେଦନ କରିଛନ୍ତି ।
ଭକ୍ତଙ୍କ ଅଭିଯୋଗର ଜବାବ ଦେଇ ବିଜେପି ମୁଖପାତ୍ର ଅନୀଲ ବିଶ୍ୱାଳ କହିଛନ୍ତି, ଡ୍ରାଇଭର ସଂଘ ସହ ସରକାର ଆଲୋଚନା ଜାରି ରଖିଛନ୍ତି । ପ୍ରକୃତ କଥା ହେଲା, କଂଗ୍ରେସର ସମାବେଶ ପାଇଁ ଲୋକେ ଆସିବାକୁ ଆଗ୍ରହୀ ନୁହନ୍ତି । ତେଣୁ କମ୍ ଲୋକେ ଆସୁଥିବାର ଜାଣିପାରି ପିସିସି ସଭାପତି ମିଛ ଅଭିଯୋଗ କରୁଛନ୍ତି । ଖସିବାର ବାଟ ଖୋଜିବା ବାହାନାରେ ଡ୍ରାଇଭର ସଂଘ ଓ ସରକାରଙ୍କୁ ଆଗୁଆ ଦୋଷ ଦେଉଛି କଂଗ୍ରେସ ।
ଆଜି ଦିନ ୧୧ଟା ପରେ ରାହୁଲ, ଖଡଗେ ଓ କଂଗ୍ରେସ ମହାସଚିବ କେସି ଭେନୁଗୋପାଳ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ । ସେଠାରୁ ହୋଟେଲ ମେ ଫେୟାର ଯିବେ । ପରେ ବରମୁଣ୍ଡା ପଡ଼ିଆ ସମାବେଶରେ ପହଞ୍ଚିବେ । ଅପରାହ୍ନରେ କଂଗ୍ରେସ ଭବନରେ ଦଳର ବରିଷ୍ଠ ନେତୃମଣ୍ଡଳୀଙ୍କ ସହ ଆଲୋଚନା କରିବେ ରାହୁଲ ଓ ଖଡ୍ଗେ । ସନ୍ଧ୍ୟାରେ ଉଭୟ ନେତା ଦିଲ୍ଲୀ ଫେରିଯିବେ ।
