ବରଗଡ଼,୧୭/୦୬: ଦିନକ ପରେ ଅର୍ଥାତ୍ ଆସନ୍ତା ୧୮ ଜୁନ୍ରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବରଗଡ଼ ଜିଲ୍ଲା ଗସ୍ତରେ ଆସିବେ ବୋଲି ବିଜେପି ଦଳୀୟ କାର୍ଯ୍ୟାଳୟ ସୂତ୍ରରୁ ଜଣାପଡ଼ିଛି । ଏନେଇ ସରକାରୀ ଭାବେ କୌଣସି ସୂଚନା ମିଳି ନ ଥିଲେ ବି ବରଗଡ଼ ବିଜେପିର ପ୍ରସ୍ତୁତି ବୈଠକ ସହ ପୁଲିସ ଇନ୍କ୍ୱାରୀ ତଥା ପ୍ରଶାସନିକ ତତ୍ପରତା ସାଧାରଣରେ ଉତ୍କଣ୍ଠା ଖେଳାଇଛି । ବରଗଡ଼ ବିଧାୟକଙ୍କ ସହିତ ଜିଲ୍ଲାପାଳ ଓ ଏସ୍ପି ଏନେଇ ଆଲୋଚନା କରିଛନ୍ତି । ପୁଲିସ୍ ଅଧିକାରୀମାନେ ସମ୍ଭାବ୍ୟ ସଭାସ୍ଥଳ ଜର୍ଜ ହାଇସ୍କୁଲ ପଡ଼ିଆ ଚାରିପଟ ବସ୍ତିରେ କୌଣସି ବାହାରିଆ ଲୋକ ରହୁଛନ୍ତି କି ନାହିଁ ତଥ୍ୟ ସଂଗ୍ରହ କରୁଥିବାରୁ ମୁଖ୍ୟମନ୍ତ୍ରୀଙ୍କ ଗସ୍ତ ଚୂଡ଼ାନ୍ତ ଥିବା ଅନୁମାନ କରାଯାଉଛି ।
ନବନିର୍ବାଚିତ ମୁଖ୍ୟମନ୍ତ୍ରୀ ଶ୍ରୀ ମାଝୀ ଓଡ଼ିଶାର ଭାତହାଣ୍ଡି ବରଗଡ଼ ଜିଲ୍ଲାରେ ଉପସ୍ଥିତ ରହି ଏହାର ଲୋକାର୍ପଣ କରିବା ସହ ହିତାଧିକାରୀଙ୍କୁ ସହାୟତା ବଣ୍ଟନ କରିବେ ବୋଲି ବିଜେପି ପଦାଧିକାରୀଙ୍କ ସୂତ୍ରରୁ ଜଣାପଡ଼ିଛି । ମୁଖ୍ୟମନ୍ତ୍ରୀ ଚାଷୀମାନଙ୍କୁ ସହାୟତା ବଣ୍ଟନ କରିବାକୁ ଆସୁଥିବାରୁ ଧାନର କ୍ୱିଣ୍ଟାଲ ପ୍ରତି ଦର ୩୧୦୦ ହେବା ପକ୍କା ହେବା ସମ୍ଭାବନା ଚାଷୀଙ୍କୁ ଆଶ୍ୱସ୍ତି ଦେଇଛି।