ନୂଆଦିଲ୍ଲୀ: ଦେଶରେ ଆଜି ଦ୍ବିତୀୟ ପର୍ଯ୍ୟାୟ ଲୋକସଭା ନିର୍ବାଚନ ଜାରି ରହିଛି । ୧୩ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ୮୮ଟି ଆସନରେ ମତଦାନ ଚାଲିଛି । କେରଳ ସବୁ ଲୋକସଭା ଆସନରେ ନିର୍ବାଚନ ହେଉଥିବା ବେରେ ରାଜସ୍ଥାନ ଏବଂ ଉତ୍ତର ପ୍ରଦେଶରେ କେତେକ ଆସନରେ ଭୋଟିଂ ହେଉଛି । ସେହିଭଳି କର୍ଣ୍ଣାଟକର ୧୪, ମଧ୍ୟପ୍ରଦେଶର ୭, ଆସାମ ଓ ବାହାରରେ ୭ଟି ଲେଖାଏଁ ଆସନ, ପଞ୍ଚିମବଙ୍ଗ ଓ ଛତିଶଗଡ଼ରେ ୩ଟି ଲେଖାଏଁ ଆସନରେ ମତସାବ୍ୟସ୍ତ କରୁଛନ୍ତି ମତଦାତା । ଏହା ସହ ଜାମ୍ମୁକାଶ୍ମୀରରେ ଗୋଟିଏ, ମଣିପୁର ୧ ଏବଂ ତ୍ରିପୁରାରେ ଗୋଟିଏ ଆସନରେ ନିର୍ବାଚନ ଜାରି ରହିଛି ।

ଦେଶର ୮୮ ଲୋକସଭା ଆସନରେ ଦିନ ୧୧ଟା ସୁଦ୍ଧା ୨୫.୧ ପ୍ରତିଶତ ଭୋଟିଂ ହୋଇଥିବା ଜଣାପଡ଼ିଛି । ଦ୍ବିତୀୟ ପର୍ଯ୍ୟାୟ ନିର୍ବାଚନରେ ମୋଟ ୮୯ ଆସନରେ ନିର୍ବାଚନ ହେବାକୁ ଥିଲା । କିନ୍ତୁ ମଧ୍ୟପ୍ରଦେଶ ବେତୁଲରେ ବିଏସପି ପ୍ରାର୍ଥୀଙ୍କ ମୃତ୍ୟୁ ହୋଇଯିବା ପରେ ଏହି ଆସନରେ ନିର୍ବାଚନ ସ୍ଥଗିତ ରହିଛି । ବେତୁଲରେ ତୃତୀୟ ପର୍ଯ୍ୟାୟ (ମେ ୭)ରେ ନିର୍ବାଚନ ହେବ । 

ଦ୍ବିତୀୟ ପର୍ଯ୍ୟାୟ ନିର୍ବାଚନରେ ବହୁ ହେଭିଓ୍ବେଟ ମୈଦାନରେ ଅଛନ୍ତି । କଂଗ୍ରେସ ନେତା ରାହୁଲ ଗାନ୍ଧୀ,  କେସି ବେଣୁଗୋପାଳ, ଭୁପେଶ ବାଘେଲ ଏବଂ ଅଶୋକ ଗେହଲଟଙ୍କ ପୁଅ ବୈଭବ ଗେହଲ, ଶଶି ଥରୁର, ବିଜପେିର ରାଜୀବ ଚନ୍ଦ୍ରଶେଖୀର, ତେଜସ୍ବୀ ସୂର୍ଯ୍ୟା, ଓମ ବିର୍ଲା, ଅଭିନେତ୍ରୀ ହେମା ମାଳିନୀ ଏବଂ ଅରୁଣ ଗୋଭିଲଙ୍କ ଲାଗି ଭୋଟ ପଡ଼ୁଛି । 

ଲୋକସଭା ନିର୍ବାଚନର ପରବର୍ତ୍ତୀ ପର୍ଯ୍ୟାୟ ଅର୍ଥାତ ତୃତୀୟ ପର୍ଯ୍ୟାୟ ନିର୍ବାଚନ ମେ ୭ରେ ଅନୁଷ୍ଠିତ ହେବ । ଶେଷ ପର୍ଯ୍ୟୟ ନିର୍ବାଚନ ବା ସପ୍ତମ ପର୍ଯ୍ୟାୟ ନିର୍ବାଚନ ଜୁନ୍‌ ୧ରେ ହେବାକୁ ଥିବା ବେଳେ ଫଳାଫଳ ଜୁନ ୪ରେ ପ୍ରକାଶ ପାଇବ ।