ନୂଆଦିଲ୍ଲୀ,୨୦/୦୭: ସୋନମ୍, ମୁସକାନ୍ ପରେ ସସ୍ମିତା । ପୁଣି ପ୍ରେମ ପାଇଁ ରକ୍ତାକ୍ତ ହେଲେ ଆଉ ଜଣେ ସ୍ୱାମୀ । ନିଜ ହାତରେ ପୋଛିଲେ ସିନ୍ଦୂର । ଦିଅର ସହିତ ପ୍ରେମ ସମ୍ପର୍କକୁ ନେଇ ସ୍ୱାମୀକୁ ହତ୍ୟା କରିଛି ସ୍ତ୍ରୀ । ଖାଇବାରେ ନିଦ ବଟିକା ଦେଇ ସବୁ ଦିନ ପାଇଁ ସାତ ଜନ୍ମର ସାଥୀକୁ ଶୁଆଇ ଦେଇଛି ସ୍ତ୍ରୀ । ଦିଲ୍ଲୀରୁ ଏପରି ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି ।
୩୬ ବର୍ଷୀୟ କରନ ଦେବଙ୍କୁ ତାଙ୍କ ସ୍ତ୍ରୀ ଏବଂ ସମ୍ପର୍କୀୟ ଭାଇ ମିଶି ହତ୍ୟା କରିଛନ୍ତି । ସେ ବିଦ୍ୟୁତ ଆଘାତର ଶିକାର ହୋଇଥିବା ଦାବି କରିବା ସହ ତାଙ୍କୁ ଅତ୍ୟନ୍ତ ଗୁରୁତର ଅବସ୍ଥାରେ ତାଙ୍କ ପତ୍ନୀ ସୁସ୍ମିତା ମାତା ରୁପରାଣୀ ମାଗୋ ହସ୍ପିଟାଲରେ ଭର୍ତ୍ତି କରିଥିଲେ । କିନ୍ତୁ ହସ୍ପିଟାଲରେ ତାଙ୍କୁ ମୃତ ଘୋଷଣା କରାଯାଇଥିଲା । ପରିବାର ଲୋକ ଏହା ଏକ ଦୁର୍ଘଟଣା ବୋଲି ବିଶ୍ୱାସ କରିନଥିଲେ । ପୁଲିସ ମୃତକଙ୍କ ବୟସ ଏବଂ ମୃତ୍ୟୁ ଯେଉଁ ପରିସ୍ଥିତିରେ ହୋଇଛି ତାହା ଦେଖିବା ପରେ ବ୍ୟବଚ୍ଛେଦ ପାଇଁ ଦାବି କରିଥିଲେ ।
ଘଟଣା ଘଟିବାର ତିନି ଦିନ ପରେ ମୃତକଙ୍କ ସାନ ଭାଇ ପୁଲିସକୁ କହିଥିଲେ ଯେ, କରନଙ୍କୁ ତାଙ୍କ ପତ୍ନୀ ଓ ସାନ ଭାଇ ମିଶି ମାରି ଦେଇଛନ୍ତି । ଏହାର ପ୍ରମାଣ ମଧ୍ୟ ଦେଇଥିଲେ । ଇନଷ୍ଟାଗ୍ରାମ ଚାଟ୍ରେ ସୁସ୍ମିତା ଏବଂ ରାହୁଲ ହତ୍ୟା ଯୋଜନା ନେଇ ଆଲୋଚନା କରିଥିବା ସେ ପ୍ରମାଣ ପାଇଥିବା କହିଥିଲେ । ସେମାନଙ୍କ ମଧ୍ୟରେ ହୋଇଥିବା କଥାବାର୍ତ୍ତାରୁ ଜଣାପଡିଛି କି, କରନଙ୍କ ପତ୍ନୀ ଏବଂ ସମ୍ପର୍କୀୟ ଭାଇ ତାଙ୍କୁ ଖାଇବାରେ ୧୫ଟି ନିଦ ବଟିକା ଦେଇଥିଲେ । ସେ ଅଚେତ୍ ହେବା ପର୍ଯ୍ୟନ୍ତ ଅପେକ୍ଷା କରିଥିଲେ । ଏହି ସ୍ଲିପିଂ ପିଲ୍ ଖାଇଲେ ମୃତ୍ୟୁ ହେବାକୁ କେତେ ସମୟ ଲାଗିବ ବୋଲି ଗୁଗ୍ଲରେ ସର୍ଚ୍ଚ କରିଥିଲେ । ପୀଡିତଙ୍କ ନିଶ୍ୱାସ ଚାଲୁଥିବାରୁ ପତ୍ନୀ ତାଙ୍କୁ ଇଲେକ୍ଟ୍ରି ସକ୍ ଦେଇଥିଲେ । ପୁଲିସ୍ ଉକ୍ତ ମହିଳାଙ୍କୁ ଗିରଫ କରି ଜେରା କରୁଛି । ଅଭିଯୁକ୍ତ ସୁସ୍ମିତା ମଧ୍ୟ ସ୍ୱାମୀଙ୍କୁ ହତ୍ୟା କରିଥିବା ସ୍ୱୀକାର କରିଛନ୍ତି ।
ପଚରାଉଚରା ବେଳେ ସୁସ୍ମିତା କହିଛନ୍ତି ଯେ, ତାଙ୍କ ସ୍ୱାମୀ 'କରୱାଚୌଥ'ର ଗୋଟିଏ ଦିନ ପୂର୍ବରୁ ତାଙ୍କୁ ଚାପୁଡ଼ା ମାରିଥିଲେ ଏବଂ ଦୁର୍ବ୍ୟବହାର କରିଥିଲେ । ତାଙ୍କୁ ପ୍ରାୟ ଟଙ୍କା ମାଗୁଥିଲେ, ଯାହା ଫଳରେ ମାନସିକ ଏବଂ ଶାରୀରିକ କଷ୍ଟ ହେଉଥିଲା । ପ୍ରାଥମିକ ତଦନ୍ତକୁ ଆଧାର କରି, ଉପଯୁକ୍ତ ଧାରା ଅନୁଯାୟୀ ମାମଲା ରୁଜୁ କରାଯାଇଛି। ତଦନ୍ତ ପ୍ରକ୍ରିୟା ଚାଲିଛି । ଏକ ବିସ୍ତୃତ ପୋଷ୍ଟମର୍ଟମ୍ ରିପୋର୍ଟ ପାଇଁ ଅପେକ୍ଷା କରିଛୁ ବୋଲି କହିଛନ୍ତି ଦ୍ୱାରିକା ପୁଲିସ ଡେପୁଟି କମିଶନର ଅଙ୍କିତ ସିଂହ ।
