ବ୍ରହ୍ମପୁର, ୩୧/୫(ବ୍ୟୁରୋ): ବ୍ରହ୍ମପୁର ବୈଦ୍ୟନାଥପୁର ଥାନା ସୁବାସ ନଗରରେ ଅବସରପ୍ରାପ୍ତ ଆରଆଇ ହରିହର ସାହୁ(୭୨)ଙ୍କ ହତ୍ୟା ଘଟଣାର ପର୍ଦ୍ଦାଫାସ କରିଛି ପୋଲିସ । ତାଙ୍କ ଘରେ ଭଡ଼ାରେ ରହୁଥିବା ସୋରଡ଼ା ଅମୃତୁଲୁ ଅଞ୍ଚଳର ସୁଦଷ୍ଣା ଜେନା(୫୭)ଙ୍କୁ ପୋଲିସ ଗିରଫ କରିଛି। ନିଆଁ ଲଗାଇ ପୋଡି ଦେଇଥିଲେ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବ୍ରହ୍ମପୁର ଏସପି ଡ଼ା. ସରବନା ବିବେକ ଏମ।
ବ୍ରହ୍ମପୁର ବୈଦ୍ୟନାଥପୁର ଥାନା ସୁବାସ ନଗରରେ ଅବସରପ୍ରାପ୍ତ ଆରଆଇ ହରିହର ସାହୁଙ୍କ ଘରେ ସୁଦଷ୍ଣା ଭଡ଼ାରେ ରହୁଥିଲେ। ହରିହର ଉପର ମହଲାରେ ରହୁଥିବା ବେଳେ ତଳେ ସୁଦଷ୍ଣା ରହୁଥିଲେ। ଉଭୟଙ୍କ ଭିତରେ ସମ୍ପର୍କ ଗଢି ଉଠିଥିଲା। ସୁଦଷ୍ଣା ବେଙ୍ଗାଳୁରୁରେ ରହୁଥିବା ଝିଅ ପାଖକୁ ଯିବାକୁ କହୁଥିଲେ ବି ହରିହର ମନା କରୁଥିଲେ । ସୁଦଷ୍ଣା ହରିହରଙ୍କ ସମ୍ପତ୍ତି ଉପରେ ଦୃଷ୍ଟି ପକାଇଥିଲେ। ଗତ ୨୯ତାରିଖ ଭୋର ୨ଟା ରେ ହରିହରଙ୍କ ଶରୀରରେ ନିଆଁ ଲାଗିଥିବା ଦେଖି ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କ ଝିଅ ମଧୁସ୍ମିତାଙ୍କୁ ଜଣାଇଥିଲେ ସୁଦଷ୍ଣା। ହରିହରଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା। ତାଙ୍କ ବୟାନ ରେକର୍ଡ ସମୟରେ ସୁଦଷ୍ଣା କିରାସିନି ସିଞ୍ଚନ କରି ନିଆଁ ଲଗାଇଦେଇଥିବା ହରିହର କହିଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ବେଳେ ସୁଦଷ୍ଣାଙ୍କୁ କୋର୍ଟ ଚାଲାଣ କରାଯାଇଥିବା ଏସପି ସୂଚନା ଦେଇଛନ୍ତି।
