ବିଶେଷଜ୍ଞଙ୍କ ମତରେ, ଫଳ ଖାଇବାର ସର୍ବୋତ୍ତମ ସମୟ ହେଉଛି ଯେତେବେଳେ ଆପଣଙ୍କ ପାଚନ ତନ୍ତ୍ର ସବୁଠାରୁ ସକ୍ରିୟ ଥାଏ ଏବଂ ଶରୀରକୁ ତୁରନ୍ତ ଶକ୍ତିର ଆବଶ୍ୟକତା ଥାଏ । ଫଳଗୁଡ଼ିକରେ ପ୍ରାକୃତିକ ଚିନି (ଫ୍ରୁକ୍ଟୋଜ୍), ଫାଇବର ଏବଂ ଅନ୍ୟାନ୍ୟ ପୋଷକ ତତ୍ତ୍ୱ ଥାଏ, ଯାହା ହଜମ କରିବାକୁ ସାହାଯ୍ୟ କରିଥାଏ ।
ଗବେଷଣାରୁ ଜଣାପଡିଛି ଯେ, ସକାଳେ ଖାଲି ପେଟରେ ଫଳ ଖାଇବା ସବୁଠାରୁ ଲାଭଦାୟକ। ସାରା ରାତି ଭୋକିଲା ରହିବା ପରେ, ଶରୀରକୁ ଶକ୍ତି ଏବଂ ପୁଷ୍ଟିକର ତତ୍ତ୍ୱର ଆବଶ୍ୟକତା ପଡ଼ିଥାଏ। ପାଚନ କ୍ରିୟାକାରୀ ଏନଜାଇମଗୁଡ଼ିକ ସକାଳେ ସବୁଠାରୁ ସକ୍ରିୟ ଥାଏ, ଯାହା ଫଳରେ ଫଳ ସହଜରେ ହଜମ ହୁଏ। ସକାଳେ ଫଳ ଖାଇବା ଦ୍ୱାରା ମେଟାବୋଲିଜିମ୍ ଉନ୍ନତ ହୁଏ, ଯାହା ସାରା ଦିନ ଶକ୍ତିକୁ ଅକ୍ଷୁର୍ଣ୍ଣ ରଖେ।
ମଧ୍ୟାହ୍ନ ଭୋଜନର ୩୦ ମିନିଟ୍ ପୂର୍ବରୁ ଫଳ ଖାଇବା ମଧ୍ୟ ଲାଭଦାୟକ । ଏହି ସମୟ ପାଚନ ପ୍ରକ୍ରିୟାକୁ ଉତ୍ତେଜିତ କରିଥାଏ ଏବଂ ମଧ୍ୟାହ୍ନ ଭୋଜନ ସମୟରେ ଅତ୍ୟଧିକ ଖାଇବାକୁ ରୋକିଥାଏ। ଗବେଷଣା ଅନୁଯାୟୀ, ଭୋଜନ ପୂର୍ବରୁ ଫଳ ଖାଇବା ଦ୍ୱାରା ଫାଇବର ପରିମାଣ ବୃଦ୍ଧି ପାଏ, ଯାହା ପାଚନ ପ୍ରକ୍ରିୟାକୁ ଉନ୍ନତ କରେ ଏବଂ ରକ୍ତରେ ଶର୍କରାକୁ ନିୟନ୍ତ୍ରଣ କରେ।
ସନ୍ଧ୍ୟା ୪ଟାରୁ ୬ଟା ମଧ୍ୟରେ ହାଲୁକା ଖାଦ୍ୟ ଭାବରେ ଫଳ ଖାଇବାକୁ ମଧ୍ୟ ଭଲ ବୋଲି ବିବେଚନା କରାଯାଏ। ଏହି ସମୟ ଶରୀରକୁ ଅତିରିକ୍ତ ଶକ୍ତି ଦେଇଥାଏ ଏବଂ ରାତ୍ରି ଭୋଜନ ପୂର୍ବରୁ ଭୋକ ନିୟନ୍ତ୍ରଣ କରିଥାଏ। ତଥାପି, ରାତିରେ ଶୋଇବା ପୂର୍ବରୁ ଫଳ ଖାଇବାରୁ ଦୂରେଇ ରହିବା ଉଚିତ । କାରଣ ଏହି ସମୟରେ ମେଟାବୋଲିଜିମ୍ ଧୀର ହୋଇଯାଏ, ଯାହା ଫ୍ରୁକ୍ଟଜ୍କୁ ହଜମ କରିବା କଷ୍ଟକର ହୋଇପାରେ।
ଫଳ ଖାଇବା ସ୍ୱାସ୍ଥ୍ୟ ପାଇଁ ବହୁତ ଲାଭଦାୟକ। ପ୍ରକୃତରେ, ଫଳଗୁଡ଼ିକରେ ଥିବା ଫାଇବର ପାଚନ କ୍ରିୟାକୁ ସୁସ୍ଥ ରଖେ। ଏହା କୋଷ୍ଠକାଠିନ୍ୟ, ଅର୍ଶ ଏବଂ ଅନ୍ୟାନ୍ୟ ପାଚନ ସମସ୍ୟାକୁ ରୋକିବାରେ ସାହାଯ୍ୟ କରେ। ପାଚିଲା ଅମୃତଭଣ୍ଡା, ସେଓ ଏବଂ ନାସପାତି ପରି ଫଳ ପାଚନ ପ୍ରକ୍ରିୟାକୁ ଉନ୍ନତ କରିବାରେ ବିଶେଷ ପ୍ରଭାବଶାଳୀ। ଏହି ଫଳଗୁଡ଼ିକ ଭିଟାମିନ୍ ସି, ଏ ଏବଂ ଆଣ୍ଟିଅକ୍ସିଡାଣ୍ଟରେ ଭରପୂର । ଯାହା ରୋଗ ପ୍ରତିରୋଧକ ଶକ୍ତିକୁ ଦୃଢ଼ କରେ। କମଳା, କିୱି ଏବଂ ବିଭିନ୍ନ ପ୍ରକାରର ଫଳ ଥଣ୍ଡା ଏବଂ ଅନ୍ୟାନ୍ୟ ସଂକ୍ରମଣକୁ ରୋକିବାରେ ସାହାଯ୍ୟ କରେ। ଏଥିରେ ଥିବା ଫାଇବର, ପୋଟାସିୟମ ଏବଂ ଆଣ୍ଟିଅକ୍ସିଡାଣ୍ଟ କୋଲେଷ୍ଟ୍ରଲକୁ ହ୍ରାସ କରେ ଏବଂ ରକ୍ତଚାପକୁ ନିୟନ୍ତ୍ରଣ କରେ। ସେଓ, ଅଙ୍ଗୁର ଏବଂ ଡାଳିମ୍ବ ପରି ଫଳ ହୃଦରୋଗର ଆଶଙ୍କାକୁ ୨୦ରୁ ୩୦ ପ୍ରତିଶତ ହ୍ରାସ କରିପାରେ।
