ନୂଆଦିଲ୍ଲୀ,୨୨/୦୩: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦେଶରେ ରହୁଥିବା  ଅବୈଧ  ପ୍ରବାସୀଙ୍କ ବିରୁଦ୍ଧରେ  ନେବାକୁ ଯାଉଛନ୍ତି ବଡ଼ କାର୍ଯ୍ୟାନୁଷ୍ଠାନ। ଏହାର ଘୋଷଣା ଆମେରିକାର ଗୃହ ସୁରକ୍ଷା ବିଭାଗ ବା DHS ଦ୍ୱାରା  କରାଯାଇଛି । ଏଥିରେ DHS କହିଛି ଯେ,  ଆମେରିକାକୁ କ୍ୟୁବା, ହାଇତି, ନିକାରାଗୁଆ ଏବଂ ଭେନେଜୁଏଲାରୁ ଆସିଥିବା ୫ ଲକ୍ଷରୁ ଅଧିକ ପ୍ରବାସୀଙ୍କୁ ଦିଆଯାଉଥିବା ଆଇନଗତ ସୁରକ୍ଷାକୁ ବନ୍ଦ କରିଦିଆଯିବ ।  ଏହି ପଦକ୍ଷେପ ପରେ  ୩୦ ଦିନ ମଧ୍ୟରେ ଅବୈଧ ବିଦେଶୀ ନାଗରିକଙ୍କ ନିର୍ବାସନର ସମ୍ମୁଖୀନ ହୋଇପାରନ୍ତି । ଯାହାକୁ ନେଇ ଚିନ୍ତାରେ ଏହି ୪ ଦେଶ । 

ଆସୋସିଏଟେଡ୍ ପ୍ରେସ୍ ରିପୋର୍ଟ ଅନୁଯାୟୀ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏହି ଆଦେଶ  ଅକ୍ଟୋବର ୨୦୨୨ରୁ ମାନବିକ ପେ-ରୋଲ୍ କାର୍ଯ୍ୟକ୍ରମ ଅଧୀନରେ ଆମେରିକାରେ ପ୍ରବେଶ କରିଥିବା ଲୋକଙ୍କୁ ପ୍ରଭାବିତ କରିବ। ଏହି କାର୍ଯ୍ୟକ୍ରମ ଅନୁଯାୟୀ, ଆମେରିକା ଆସିଥିବା ପ୍ରବାସୀମାନଙ୍କୁ ଦୁଇ ବର୍ଷ ପାଇଁ ଏଠାରେ ରହିବା ଏବଂ କାମ କରିବାର ଅନୁମତି ଦିଆଯାଇଥିଲା। DHSସଚିବ କ୍ରିଷ୍ଟି ନୋଏମ ଏକ ବିବୃତ୍ତିରେ କହିଛନ୍ତି, “ଆମେରିକା ଫେଡେରାଲ ରେଜିଷ୍ଟରରେ ବିଜ୍ଞପ୍ତି ପ୍ରକାଶିତ ହେବା ପରେ, ଉପରୋକ୍ତ ଦେଶଗୁଡ଼ିକର ପ୍ରବାସୀମାନଙ୍କ ଆଇନଗତ ସ୍ଥିତି ଏପ୍ରିଲ ୨୪ ସୁଦ୍ଧା ୩୦ ଦିନ ମଧ୍ୟରେ ସମାପ୍ତ ହୋଇଯିବ। ଡୋନାଲ୍ଡ ଟ୍ରମ୍ପଙ୍କ ଆମେରିକା ପ୍ରଶାସନର ଏହି ପଦକ୍ଷେପ କ୍ୟୁବା, ହାଇତି, ନିକାରାଗୁଆ ଏବଂ ଭେନେଜୁଏଲାର ପ୍ରାୟ ୫,୩୨ ହଜାର ଲୋକଙ୍କୁ ପ୍ରଭାବିତ କରିବ। ଯେଉଁମାନେ ପୂର୍ବତନ ଜୋ ବାଇଡେନ ପ୍ରଶାସନ ଦ୍ୱାରା କାର୍ଯ୍ୟକାରୀ ପାରୋଲ କାର୍ଯ୍ୟକ୍ରମ ଅଧୀନରେ ଆମେରିକାରେ ପ୍ରବେଶ କରିଥିଲେ ଏବଂ ଯେଉଁମାନଙ୍କୁ ଆମେରିକାରେ ଅସ୍ଥାୟୀ ମାନ୍ୟତା ଦିଆଯାଇଥିଲା।

ଏହା ମଧ୍ୟ ପଢନ୍ତୁ-  ଆହୁରି ୨୯୫ ବୈଧ ପ୍ରବାସୀ ଭାରତୀୟଙ୍କୁ ପଠାଇବ ଆମେରିକା, ସଂସଦରେ କେନ୍ଦ୍ର ସରକାରଙ୍କ ସୂଚନା

ଡୋନାଲ୍ଡ ଟ୍ରମ୍ପଙ୍କ ଏହି ନିଷ୍ପତ୍ତି ଆମେରିକାର ପ୍ରବାସ ନୀତିରେ ବ୍ୟାପକ ପରିବର୍ତ୍ତନ ପରେ ନିଆଯାଇଛି । ଯାହାର ଲକ୍ଷ୍ୟ ମାନବିକ ପାରୋଲ୍ କାର୍ଯ୍ୟକ୍ରମ ଅଧୀନରେ ଅପବ୍ୟବହାରକୁ ରୋକିବା । ଏପି ରିପୋର୍ଟ ଅନୁଯାୟୀ, ଏହି ଆଇନଗତ ଅସ୍ତ୍ର ଐତିହାସିକ ଭାବରେ ଯୁଦ୍ଧ କିମ୍ବା ରାଜନୈତିକ ଅସ୍ଥିରତା ଅନୁଭବ କରୁଥିବା ଦେଶର ନାଗରିକମାନଙ୍କୁ ଆମେରିକାରେ ଅସ୍ଥାୟୀ ଭାବରେ ପ୍ରବେଶ ଏବଂ ରହିବା ପାଇଁ ଅନୁମତି ଦେବା ପାଇଁ ବ୍ୟବହାର କରାଯାଇଛି।