ନୂଆଦିଲ୍ଲୀ ୨୪/୦୩: ସୋସିଆଲ ମିଡିଆ ପ୍ଲାଟଫର୍ମ ଟୁଇଟର (ଏବେ ଏକ୍ସ)ର ପୁରୁଣା ଲୋଗୋ ନିଲାମରେ ବିକ୍ରି ହୋଇଛି । ଏକ ବ୍ଲୁ ବାର୍ଡ ବା ନୀଳ ରଙ୍ଗର ଚଢ଼େଇର ଏହି ଲୋଗୋ ୩୪,୩୭୫ ଡଲାର ବା ପ୍ରାୟ ୩୦ ଲକ୍ଷ ଟଙ୍କାରେ ନିଲାମ ଯାଇଛି । ୨୦୧୨ରୁ ୨୦୨୩ ପର୍ଯ୍ୟନ୍ତ ଟୁଇଟର ଅଫିସ୍ରେ ଝୁଲୁଥିବା ଏହି ବ୍ଲୁ ବାର୍ଡ ଲୋଗୋ କ୍ରେତାଙ୍କ ନାଁ ସାର୍ବଜନୀନ ହୋଇନାହିଁ । ସ୍ପେସ୍ଏକ୍ସ ମାଲିକ ଏଲନ ମସ୍କ ଟୁଇଟର କିଣିବା ପରେ ଏହାର ରି-ବ୍ରାଣ୍ଡିଂ କରିଥିଲେ । ଏଥିସହ ଟୁଇଟର ନାଁ ବଦଳାଇ ତାହାକୁ ‘ଏକ୍ସ’ ରଖିଥିଲେ । ଏହା ପରେ ବ୍ଲୁ ବାର୍ଡ ଇତିହାସ ପାଲଟିଥିଲା ।
ବିରଳ ଜିନିଷର ନିଲାମ ଡିଲ୍ କରୁଥିବା ଆର୍ଆର୍ ଅକ୍ସନ ପକ୍ଷରୁ କୁହାଯାଇଛି, ଟୁଇଟର ସାଇନବୋର୍ଡର ଓଜନ ପ୍ରାୟ ୨୫୪ କେଜି, ଉଚ୍ଚତା ୧୨ ଫୁଟ୍ ଏବଂ ଓସାର ୯ କେଜି । ଏବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଟିମ୍ରେ ଥାଇ ଡିଓଜିଇ ବିଭାଗ ସମ୍ଭାଳୁଥିବା ମସ୍କ ପୂର୍ବରୁ ମଧ୍ୟ ଟୁଇଟରର ଅନେକ ସାମଗ୍ରୀ ନିଲାମ ଡକାଇସାରିଛନ୍ତି । ସୂଚନାଯୋଗ୍ୟ ଯେ, ୨୦୨୨ ଅକ୍ଟୋବରରେ ମସ୍କ ୪୪ ବିଲିୟନ ଡଲାରରେ ଟୁଇଟର କିଣିଥିଲେ । ପରେ ଏହାର ନାଁ ଏକ୍ସ ରଖିଥିଲେ । ଏଥିରେ ମସ୍କ ଅନେକ ପରିବର୍ତ୍ତନ ଆଣିଥିଲେ । ମସ୍କଙ୍କ ତରଫରୁ ବ୍ଲୁ ସବ୍ସ୍କ୍ରିପ୍ସନ ସର୍ଭିସ୍ ପାଇଁ ୟୁଜର୍ସଙ୍କଠାରୁ ଅର୍ଥ ଦାବି କରାଯାଇଥିଲା । ଟୁଇଟର ଲୋଗୋ ମସ୍କଙ୍କୁ ପସନ୍ଦ ଆସି ନ ଥିଲା । ତେଣୁ ଏହାକୁ ବଦଳାଇ ଇଂରାଜୀ ଅକ୍ଷର ଏକ୍ସ ଚିହ୍ନର ଲୋଗୋ ବନାଇଥିଲେ ।
