ମାଲକାନଗିରି : ଦିନକୁ ଦିନ ଜଙ୍ଗଲ ଓ ବୃକ୍ଷଲତା ଆଦି ଲୋପ ପାଇବାରେ ଲାଗିଛି। ସବୁଜ ଜଙ୍ଗଲ ବଦଳରେ କଂକ୍ରିଟ ଜଙ୍ଗଲ ସୃଷ୍ଟି ହେବାକୁ ଲାଗିଛି, ଯାହା ଫଳରେ ଜଙ୍ଗଲର ପଶୁ ପକ୍ଷୀଙ୍କ ସଂଖ୍ୟାରେ ହ୍ରାସ ଘଟିଲାଣି। ପକ୍ଷୀଙ୍କୁ କିପରି ସଂରକ୍ଷଣ କରାଯାଇ ପାରିବ ସେ ନେଇ ଇକୋ କ୍ଳବ ପକ୍ଷରୁ ବିଭିନ୍ନ ବିଦ୍ୟାଳୟ ଗୁଡିକରେ ଛାତ୍ର ଛାତ୍ରୀଙ୍କୁ ପ୍ରଶିକ୍ଷଣ ଆରମ୍ଭ କରାଯାଇଛି।
ମାଲକାନଗିରି ବ୍ଳକ ବୀର ଲକ୍ଷ୍ମଣପୁର ଆଶ୍ରମ ବିଦ୍ୟାଳୟ ଇକୋ କ୍ଳବ୍ ତରଫରୁ ଆଜି ପକ୍ଷୀ ସଂରକ୍ଷଣ ନିମନ୍ତେ ଏକ ବିଶେଷ କାର୍ଯ୍ୟକ୍ରମର ଆୟୋଜନ କରାଯାଇ ଥିଲା। ପ୍ରବଳ ଗ୍ରୀଷ୍ମ ପ୍ରବାହରୁ ପକ୍ଷୀ ମାନଙ୍କ ସୁରକ୍ଷା ନିମନ୍ତେ ବିଦ୍ୟାଳୟର ଛାତ୍ରାବାସ, ଛାତ୍ରୀନିବାସ, ଗ୍ରାମରେ ଥିବା ଗଛ, ଗ୍ରାମ ନିକଟ ଜଙ୍ଗଲର ଗଛ ଗୁଡ଼ିକରେ ଏବଂ ନିଜ ଘରେ ଶତାଧିକ ମାଟି ତିଆରି ଚଢେଇ ଘର ଖଞ୍ଜା ଯାଇ ସେଥିରେ ପକ୍ଷୀଙ୍କ ନିମନ୍ତେ ଖାଦ୍ୟ ଏବଂ ଜଳର ବ୍ୟବସ୍ଥା କରାଯାଇ ଥିଲା ।
ଏହି ମହତ କାର୍ଯ୍ୟରେ ବିଦ୍ୟାଳୟର ପ୍ରଧାନଶିକ୍ଷକ ଚନ୍ଦ୍ରଶେଖର ପତ୍ରୀ, ଶିକ୍ଷକ ସଞ୍ଜୟ କୁମାର ମାହୁନ୍ତ, ଶିକ୍ଷୟତ୍ରୀ ସନ୍ଧ୍ୟାରାଣୀ ଚନ୍ଦ୍ର, ଶ୍ରିତିରାଣୀ ମଣ୍ଡଳ, ସଂଗୀତା ଜେନା, ମେଟ୍ରନ, ପାଚିକା, ଛାତ୍ର ଛାତ୍ରୀ, ବୀରଲକ୍ଷ୍ମଣପୁର ଜଙ୍ଗଲ ସୁରକ୍ଷା କମିଟିର ସଭାପତି ଗୁରୁଖୋଲା, ସମ୍ପାଦକ ଭଗବାନ କଡ଼ା, କମିଟିର ସଦସ୍ୟ, ଗାନ୍ଧୀ ଯୁବକ ସଂଘର ସଭାପତି ଭାରତ ବିଜୟ ଖେମୁଣ୍ଡୁ ଏବଂ ସଦସ୍ୟଙ୍କ ସହ ବୀରଲକ୍ଷ୍ମଣପୁର ଗ୍ରାମର ଅନେକ ଯୁବକ ଅଂଶଗ୍ରହଣ କରିଥିଲେ। ପ୍ରଶିକ୍ଷକମାନେ ଗଛରେ ଚଢି ମାଟିରେ ନିର୍ମିତ କୃତ୍ରିମ ଚଢେଇ ବସା ଗଛ ଗୁଡିକରେ ବାନ୍ଧିଥିଲେ।