ନୂଆଦିଲ୍ଲୀ: ପଶ୍ଚିମବଙ୍ଗରେ ଭୟଙ୍କର ଟ୍ରେନ୍ ଦୁର୍ଘଟଣାରେ ୧୦ ନିରୀହ ଜୀବନ ଯାଇଥିବା ବେଳେ ଅନେକ ଆହତ ହୋଇଛନ୍ତି । ଆଉ ଏହି ଟ୍ରେନ୍ ଦୁର୍ଘଟଣାକୁ ନେଇ ଦେଶରେ ରାଜନୀତି ଜୋର ଧରିଛି । ବହୁ ବିରୋଧୀ ନେତା ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ ଇସ୍ତଫା ଦାବି କରିଛନ୍ତି । ସେପଟେ ପଶ୍ଚିମବଙ୍ଗ ଟ୍ରେନ୍ ଟ୍ରାଜେଡି ପରେ ଏନଡିଏ ନା ୟୁପିଏ ସରକାର, କିଏ ରେଳ ଦୁର୍ଘଟଣା ରୋକିବା ଦିଗରେ ବେଶି ସଫଳ ତାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି ।
ଇଣ୍ଡିଆ ଟୁଡେରେ ପ୍ରକାଶିତ ଖବର ଅନୁସାରେ, ୨୦୦୪-୨୦୧୪ ୟୁପିଏ ସରକାର ଅମଳରେ ମୋଟ ୧୭୧୧ଟି ରେଳ ଦୁର୍ଘଟଣା ଘଟିଥିଲା । କିନ୍ତୁ ୨୦୧୪ରୁ ୨୦୨୩ ମଧ୍ୟରେ ବିଜେପି ନେତୃତ୍ବାଧୀନ ଏନଡିଏ ସରକାରରେ ଏହି ସଂଖ୍ୟା ୬୩୮ । ରେଳ ଦୁର୍ଘଟଣାରେ ମୃତ୍ୟୁ ସଂଖ୍ୟା ଉପରେ ନଜର ପକାଇଲେ, ୟୁପିଏ ସରକାରରେ ୨୪୫୩ ଜଣ ପ୍ରାଣ ହରାଇଥିବା ବେଳେ ୪୪୮୬ ଆହତ ହୋଇଥିଲେ । ସେହିଭଳି ଏନଡିଏ ଶାସନରେ୨୦୧୪-୨୩ ମଧ୍ୟରେ ୭୮୧ ଜଣଙ୍କ ମୃତ୍ୟୁ ହୋଇଥିବା ବେଳେ ୧୫୪୩ ଜଣ ଆହତ ହୋଇଥିଲେ ।
ସେପଟେ ୨୦୦୨-୨୦୧୪ ମଧ୍ୟରେ ୮୬୭ଟି ଟ୍ରେନ୍ ଲାଇନଚ୍ୟୁତ ହୋଇଥିଲା । ୨୦୧୪-୨୩ ମଧ୍ୟରେ ଏନଡିଏ ସରକାରରେ ଏଭଳି ଘଟଣା ୪୨୬ଟି ଘଟିଛି । ୟୁପିଏ ସରକାରରେ ବାର୍ଷିକ ୮୬.୭ ରେଳ ଲାଇନଚ୍ୟୁତ ଘଟଣା ଘଟିଥିବା ବେଳେ ବିଜେପି ସରକାରରେ ଏହି ସଂଖ୍ୟା ୪୭.୩ । ୨୦୦୪-୧୪ ମଧ୍ୟରେ ବାର୍ଷିକ ପ୍ରାୟ ୭୧ଟି ଟ୍ରେନ୍ ଦୁର୍ଘଟଣା ଘଟିଥିଲା । ହେଲେ ୨୦୧୪-୨୩ ମଧ୍ୟରେ ରେଳ ଦୁର୍ଘଟଣା ସଂଖ୍ୟାରେ ୭୧ ପ୍ରତିଶତ ହ୍ରାସ ଘଟିଛି ।
୨୦୦୦-୨୦୦୧ରେ ୩୫୦ଟି ଟ୍ରେନ୍ ଲାଇନଚ୍ୟୁତ ହୋଇଥିବା ବେଳେ ୨୦୨୨-୨୩ରେ ଏହି ସଂଖ୍ୟା କେବଳ ୩୬ । ଅନ୍ୟପଟେ ରେଳ ଲାଇନ୍ ନବୀକରଣ ପାଇଁ ୨୦୧୫-୨୩ ମଧ୍ୟରେ ଏନଡିଏ ସରକାର ୧୦,୨୦୧ କୋଟି ଆବଣ୍ଟିତ କରିଛନ୍ତି । କିନ୍ତୁ ୨୦୦୫-୨୦୧୪ ମଧ୍ୟରେ ୟୁପିଏ ସରକାର ଏଥିପାଇଁ ୪୭୦୨ କୋଟି ଟଙ୍କା ଖର୍ଚ୍ଚ କରିଥିଲେ।