ଚନ୍ଦନେଶ୍ଵର,୧୮/୦୬: ପଡ଼ୋଶୀ ରାଜ୍ୟ ପଶ୍ଚିମବଙ୍ଗ ତାଜପୁର ବେଳାଭୂମିରେ ବଡ଼ ଅଘଟଣ। ଗାଧୋଇବା ବେଳେ ବୁଡ଼ିଗଲେ ୩ ପର୍ଯ୍ୟଟକ । ଜଣଙ୍କୁ ଜୀବିତ ଅବସ୍ଥାରେ ଉଦ୍ଧାର କରାଯାଇଥିବା ବେଳେ ଆଉ ଜଣଙ୍କ ମୃତ୍ୟୁ ହୋଇଛି । ଏପର୍ଯ୍ୟନ୍ତ ଆଉ ଜଣେ ନିଖୋଜ ଅଛନ୍ତି । ସମସ୍ତଙ୍କ ଘର ପଶ୍ଚିମବଙ୍ଗ ବାରସାତ ଅଞ୍ଚଳର ବୋଲି ଜଣାପଡ଼ିଛି ।
ସୂଚନା ମୁତାବକ, ପଶ୍ଚିମବଙ୍ଗ ଦୀଘାକୁ ବାରସାତ ଅଞ୍ଚଳର ୩ ଯୁବକ ବୁଲିବାକୁ ଆସିଥିବା ବେଳେ ଦୀଘାରେ ଏକ ହୋଟେଲରେ ରହୁଥିଲେ । ମାତ୍ର ଦୀଘା ବେଳାଭୂମି ଏବେ ପ୍ରବଳ ଭିଡ଼ ହେଉଥିବା ବେଳେ ପାଖରେ ଥିବା ତାଜପୁର ବେଳାଭୂମିକୁ ବୁଲିବାକୁ ଯାଇଥିଲେ । ସେଠାରେ ସମୁଦ୍ରରେ ଉଚ୍ଚ ଜୁଆର ଦେଖି ଗାଧୋଇବା ପାଇଁ ୩ ଯୁବକ ଯାଇଥିଲେ । ହେଲେ ଗାଧୋଇବା ବେଳେ ୩ଜଣ ସମୁଦ୍ରରେ ଭାସି ଯାଇଥିଲେ । ସ୍ଥାନୀୟ ଅଞ୍ଚଳରେ ଥିବା ପୁଲିସ କର୍ମଚାରୀ ୨ ଜଣଙ୍କୁ ଉଦ୍ଧାର କରିଥିଲେ । ସେମାନଙ୍କ ମଧ୍ୟରୁ ଜଣଙ୍କ ମୃତ୍ୟୁ ହୋଇଥିବା ବେଳେ ଆଉ ଜଣେ ଚିକିତ୍ସାଧୀନ ଅଛନ୍ତି ଏବଂ ଆଉ ଜଣେ ଏପର୍ଯ୍ୟନ୍ତ ନିଖୋଜ ଅଛନ୍ତି । ତେବେ ଲଘୁଚାପ ପାଇଁ ସମୁଦ୍ର ଅଶାନ୍ତ ରହିଥିବା ବେଳେ ପଶ୍ଚିମବଙ୍ଗ ପ୍ରଶାସନ ପକ୍ଷରୁ ସଚେତନତା କରାଯାଇଥିଲେ ମଧ୍ୟ ପର୍ଯ୍ୟଟକ ଅମାନିଆ ହେଇଥିବାରୁ ଏଭଳି ଘଟଣା ଘଟିଛି ବୋଲି ସ୍ଥାନୀୟଲୋକ କହିଛନ୍ତି ।
