ନୂଆଦିଲ୍ଲୀ, ୨୫/୧୧ : ଚର୍ଚ୍ଚକୁ ଗଲେ ସାକ୍ଷାତ ଦର୍ଶନ ଦେଉଛନ୍ତି ଯୀଶୁ। ଶୁଣୁଛନ୍ତି ଲୋକଙ୍କ ଗୁହାରୀ। ପ୍ରଶ୍ନ ପଚାରିଲେ ଦେଉଛନ୍ତି ଉତ୍ତର। ସମସ୍ୟାର କରୁଛନ୍ତି ସମାଧାନ। ସମସ୍ୟା ଜଣାଇବା ବେଳେ ଭାଷାଗତ ସମସ୍ୟା ବି ରହିବନି। ଆପଣ ଯେଉଁ ଭାଷାରେ ପ୍ରଶ୍ନ ପଚାରିବେ, ସେହି ଭାଷାରେ ଉତ୍ତର ଦେବେ ସ୍ଵୟଂ ଯୀଶୁଖ୍ରୀଷ୍ଟ। କୌଣସି ଚମତ୍କାରଠୁ କମ୍ ନୁହେଁ ଏ ଖବର। 

ବର୍ତ୍ତମାନ ସମୟରେ ଆର୍ଟିଫିସିଆଲ ଇଣ୍ଟେଲିଜେନ୍ସିର ବହୁଳ ବ୍ୟବହାର ବଢିଛି। ବିଭିନ୍ନ କ୍ଷେତ୍ରରେ ଏହାକୁ ବ୍ୟବହାର କରାଯାଉଛି। ଏବେ ଧାର୍ମିକ ତଥା ଆଧ୍ୟାତ୍ମିକ କ୍ଷେତ୍ରରେ ବି AIର ବ୍ୟବହାର କରାଗଲାଣି। ସ୍ଵିଜରଲ୍ୟାଣ୍ଡ୍‌ର ଲୁସର୍ନ ସହରରେ ଥିବା ଏକ ଚର୍ଚ୍ଚରେ AIକୁ ନିଆରା ଉପାୟରେ ବ୍ୟବହାର କରାଯାଇଛି। ଏଠାରେ AI ବେସ୍‌ଡ୍ କନଫେସନ ବୁଥ୍ ଲଗାଯାଇଛି। ଯେଉଁଥିରେ ୩ଡି ଯୀଶୁଙ୍କର ଏକ ବଡ଼ ଇମେଜ୍ ଲଗାଯାଇଛି। ଏହି ଇମେଜ ଲୋକଙ୍କ ସମସ୍ୟା ଶୁଣୁଛି ଏବଂ ସମସ୍ୟାର ସମାଧାନ ପାଇଁ ଆଧ୍ୟାତ୍ମିକ ମାର୍ଗ ଦର୍ଶାଉଛି। ଏହାକୁ ‘ଡିଅସ୍ ଇନ୍ ମସିନା’ ନାମ ଦିଆଯାଇଛି। ଯାହାର ଅର୍ଥ ‘ମେସିନରେ ଈଶ୍ଵର’। ସ୍କ୍ରିନ୍‌ରେ ଯୀଶୁଖ୍ରୀଷ୍ଟଙ୍କର ଏକ ଆନିମେଟେଡ୍ ଫଟୋ ଲଗାଯାଇଛି। ଯାହାକି ପୁରାପୁରି ଜୀବନ୍ତ ଲାଗୁଛି। ଏହି ଏଆଇରେ ୧୦୦ରୁ ଉର୍ଦ୍ଧ୍ଵ ପ୍ରକାରର ଭାଷା ଉପଲବ୍ଧ ରହିଛି। ଏହି ଆନିମେଟେଡ୍ ଯୀଶୁଙ୍କ ସହ କଥା ହେବା ପୂର୍ବରୁ ଲୋକମାନଙ୍କୁ ସେମାନଙ୍କର ବ୍ୟକ୍ତିଗତ ତଥ୍ୟ ସେୟାର କରିବା ନେଇ ଚେତାବନୀ ଦିଆଯାଉଛି। ଏହି ସର୍ତ୍ତରେ ରାଜି ଥିଲେ ବୁଥ୍ରେ ପ୍ରବେଶ କରିବା ପାଇଁ ଏକ ବଟନ ଦବାଇବାକୁ ପଡିବ। ଅନୁମତି ମିଳିବା ପରେ ଯୀଶୁଙ୍କ ସହ ଆପଣ ୧୦୦ ରୁ ଉର୍ଦ୍ଧ୍ଵ ଭାଷାରେ ସିଧାସଳଖ ଯୋଗାଯୋଗ କରିପାରିବେ। ତେବେ ଅନ୍ୟ ଧର୍ମର ବ୍ୟକ୍ତି ମଧ୍ୟ ଏହି ସ୍ଥାନକୁ ଯାଇପାରିବେ। ଏହି ଏଆଇକୁ ପ୍ରଶିକ୍ଷିତ କରିବା ପାଇଁ ବାଇବେଲ ଏବଂ ଅନ୍ୟ ଧର୍ମଗ୍ରନ୍ଥର ବ୍ୟବହାର କରାଯାଇଛି।