ଭୁବନେଶ୍ଵର, ୧୪/୦୨ : ମଞ୍ଚରେ ଅଭିନୟ କରୁକରୁ ହୋଇଗଲା ପ୍ରେମ। ଆଉ ତାପରେ ସଂସାର ଗଢିବା ପାଇଁ ନେଲେ ସଂକଳ୍ପ। ହୋମ ନିଆଁକୁ ସାକ୍ଷୀ ରଖି ପଡ଼ିଲା ହାତଗଣ୍ଠି। ସାତ ଜନ୍ମ ପାଇଁ ହୋଇଗଲେ ସାଥୀ। ଏବେ ରିୟଲ ଲାଇଫ୍ରେ ଏମାନେ ସ୍ଵାମୀ ସ୍ତ୍ରୀ। ଦିନେ ମଞ୍ଚରେ ସ୍ୱାମୀ-ସ୍ତ୍ରୀ ଭୂମିକାରେ ଅଭିନୟ କରି ଦର୍ଶକଙ୍କ ପ୍ରିୟ ହୋଇଥିଲେ... ଆଉ ଆଜି ସତରେ ଏମାନେ ଜୀବନସାଥୀ।
ଅଭିନୟରୁ ସଂସାର ଗଢିବା ପାଇଁ ସଂକଳ୍ପ ନେଇଥିବା ଏହି ଯାତ୍ରା ଯୋଡି ହେଲେ ସିଂହବାହିନୀର କାହ୍ନା ସ୍ୱାଇଁ ଓ ଟିକି। ଏମାନେ ରାମ ବନବାସ କାହାଣୀ ଶେଷ, ଆଖି ତୋର ଲୁହ ମୋର, ବାବୁ ମୋତେ ଭୁଲିଗଲ, ଗାନ୍ଧି ଭୂମିକାରେ କହ୍ନେଇ ଦାସ ଭଳି ନାଟକରେ ଦର୍ଶକଙ୍କ ହୃଦୟ ଜିତିଛନ୍ତି। ଶିବାନୀର ଏହି ଲୋକପ୍ରିୟ ଯୋଡି ଚଳିତବର୍ଷ ଯାତ୍ରା ସିଂହବାହିନୀରେ ସେମାନଙ୍କ ଭାଗ୍ୟ ପରୀକ୍ଷା କରୁଛନ୍ତି। ସେହିପରି ଆଉ ଏକ ଚର୍ଚ୍ଚିତ ଯୋଡ଼ି ହେଲେ କୋଣାର୍କ ଗଣନାଟ୍ୟର ରତିକାନ୍ତ ଓ ମିଟୁନା । ୨୦୦୨ରେ କୋଣାର୍କରୁ ରତି ତାଙ୍କର ଯାତ୍ରା ଜୀବନ ଆରମ୍ଭ କରିଥିଲେ । ପରେ ସେ କଳିଙ୍ଗ, ରଙ୍ଗମହଲ ଭଳି ପାର୍ଟିରେ କାମ କରି ପୁଣି କୋଣାର୍କକୁ ଫେରିଛନ୍ତି । ୧୯୯୪ରେ ମିଟୁନା ଜୟଦୁର୍ଗା ଗଣନାଟ୍ୟରେ କ୍ୟାରିଅର ଆରମ୍ଭ କରିଥିଲେ । ସେ ମଡର୍ଣ୍ଣ ଅପେରା, ପାର୍ବତୀ, ଧଉଳି, କଳିଙ୍ଗ ଓ ରଙ୍ଗମହଲରେ ମଧ୍ୟ ସାମିଲ ହୋଇଛନ୍ତି । ଏହି ଦମ୍ପତି କଉଡ଼ି ଖେଳ, ଦୁଃଖ ଦେଇଗଲା ଦରଦିବନ୍ଧୁ, ଜଗା ଧରିଛି ଜୀବନ ପଘା ଓ ଦଇତାରୀ ପଣ୍ଡା ବାହା ହେଉଛି ଭଳି ନାଟକରେ ଏକା ସାଙ୍ଗରେ ଅଭିନୟ କରିଛନ୍ତି ।
ସେହିପରି ଯାତ୍ରାରୁ ଜୀବନସାଥୀ ହୋଇଥିବା ଆଉ କିଛି ଆଗଧାଡ଼ିର କଳାକାରମାନେ ହେଲେ ପ୍ରତାପ-ଜିତା, ବିନୋଦ-ବେବିନା, ବାବୁଲି-ତୃପ୍ତି, ମୁନା-ନମିତା, ରାଜୁ-ରୀନା, ଶୁଭେନ୍ଦୁ-କୁନି, ବବିନା-ଶ୍ରାବଣୀ, ଅପୁ-ଅଜୁ, ଗୌର-ଶୁକାନ୍ତି, ଶୁଭେନ୍ଦୁ-ଟିକିନା, ନିଶିକାନ୍ତ-ମାମା, ରିଙ୍କି-ଅଶୋକ, ରଞ୍ଜି-କୁନା, କେଳୁ-ନଳିନୀ । ଏହି ଚର୍ଚ୍ଚିତ ଯୋଡ଼ି ଯାତ୍ରା ଜଗତରେ ମିଛି ମିଛିକା ଅଭିନୟ କରୁ କରୁ ପରସ୍କରକୁ ମନ ଦେଇ ବସିଲେ। ଆଉ ସାରା ଜୀବନ ପାଇଁ ସ୍ୱାମୀ-ସ୍ତ୍ରୀ ସମ୍ପର୍କରେ ବାନ୍ଧି ହୋଇଗଲେ।
