ନୂଆଦିଲ୍ଲୀ, ୨।୨: ଉତ୍ତରପ୍ରଦେଶର ପ୍ରୟାଗରାଜ, ଗଙ୍ଗା, ଯମୁନା ଓ ସରସ୍ୱତୀ ନଦୀର ତ୍ରିବେଣୀ ସଙ୍ଗମ କୂଳରେ ଚାଲିଆସୁଛି ବିଶ୍ୱର ସର୍ବବୃହତ୍ ଧାର୍ମିକ ମେଳା ମହାକୁମ୍ଭ ମେଳା । ସଙ୍ଗମ ସ୍ଥଳରେ ବୁଡ଼ ପକାଇବା ପ୍ରୟାଗରାଜକୁ କୋଟି କୋଟି ଶ୍ରଦ୍ଧାଳୁ ଧାଇଁ ଆସୁଛନ୍ତି । ଏହି ଧାର୍ମିକ କାର୍ଯ୍ୟକ୍ରମରେ ଅନେକ ସାଧୁସନ୍ଥ, ନାଗା ସାଧୁ ଓ ଅଘୋରୀ ସାମିଲ ହୋଇଛନ୍ତି । ଅନେକ ବାବାଙ୍କ ଦର୍ଶନ କରିବା ସହିତ ଆଶିର୍ବାଦ ମଧ୍ୟ ନେଉଛନ୍ତି । ପ୍ରୟାଗରାଜକୁ ଆସୁଥିବା ଅନେକ ବାବା ଭବିଷ୍ୟବାଣୀ ମଧ୍ୟ କରୁଛନ୍ତି । ତେବେ କୁମ୍ଭମେଳାରେ ଅଘୋରୀ କାଳପୁରୁଷଙ୍କ ଭବିଷ୍ୟବାଣୀକୁ ନେଇ ଚାରିଆଡ଼େ ଚର୍ଚ୍ଚା ଲାଗି ରହିଛି । ଏହି କୁମ୍ଭମେଳାରେ ପହଞ୍ଚିଛନ୍ତି ୯୫ ବର୍ଷୀୟ ଅଘୋରୀ ବାବା କାଳପୁରୁଷ । ବାବା କାଳପୁରୁଷ କରିଥିବା ଭବିଷ୍ୟବାଣୀ ସମସ୍ତଙ୍କୁ ଚକିତ କରିଛି । ତାଙ୍କ ଭବିଷ୍ୟବାଣୀ ସତ ହେଲେ ପ୍ରକୃତିର କରାଳ ରୂପର ସାମନା କରିବ ମଣିଷ । ମହାପ୍ରଳୟ ଘୋଟିଆସିବ ।
ଅଦ୍ଭୁତ ତାଙ୍କ ବେଶ । ମୁହଁରେ ନାଲି ରଙ୍ଗ, ଦେହରେ ପାଉଁଶ ଆଉ ହାତରେ ଧରିଛନ୍ତି ମଣିଷ ଖପୁରୀ । ସେ ହେଉଛନ୍ତି ଅଘୋରୀ ବାବା କାଳପୁରୁଷ । ଯାହାଙ୍କ ଭବିଷ୍ୟବାଣୀରେ ସମସ୍ତେ ଥରିଉଠୁଛନ୍ତି । କୁହାଯାଏ ଯେ, ସେ ହିମାଳୟ ଶିଖରରେ ବର୍ଷ ବର୍ଷ ଧରି ତପସ୍ୟା କରିଥିଲେ । ବର୍ତ୍ତମାନ ମହାକୁମ୍ଭରେ ପହଞ୍ଚିଥିବା ଏହି ବାବାଙ୍କ ଭବିଷ୍ୟବାଣୀ ଶୁଣି ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି । ତେବେ ଏହି ବାବା କାଳ ପୁରୁଷ କିଏ ଓ ସେ କେଉଁ ଭବିଷ୍ୟବାଣୀ କରିଛନ୍ତି ଆସନ୍ତୁ ଜାଣିବା । ଏହି ବାବା ପ୍ରତି ୧୨ ବର୍ଷରେ ଆୟୋଜିତ ସାତଟି ମହାକୁମ୍ଭରେ ଅଂଶଗ୍ରହଣ କରିଛନ୍ତି । ବାବା କାଳପୁରୁଷ କହିଛନ୍ତି ଯେ, ସେ ସାତଟି ମହାକୁମ୍ଭରେ ଭାଗ ନେଇସାରିଛନ୍ତି । ଚଳିତ ମହାକୁମ୍ଭରେ ସେ ବିଭିନ୍ନ ସଙ୍କେତ ଅନୁଭବ କରୁଛନ୍ତି । ଅଘୋରୀ ବାବା କାଳ ପୁରୁଷ କହିଛନ୍ତି ଯେ, ମୃତଦେହ ଦାହ ସମୟରେ କାଉମାନଙ୍କ କର୍କଶ ଶବ୍ଦ ଶୁଭୁଛି । ଶ୍ମଶାନଗୁଡ଼ିକରେ ଶବମାନେ ଅଶାନ୍ତ ହୋଇପଡ଼ୁଥିବା ଅନୁଭବ ହେଉଛି । ବାବାଙ୍କ ଭବିଷ୍ୟବାଣୀ ଅନୁଯାୟୀ, ପୃଥିବୀରେ ଆଗକୁ ଅନେକ ପରିବର୍ତ୍ତନ ହେବାକୁ ଯାଉଛି । ଆଗାମୀ ଦିନରେ ପବନ ରଙ୍ଗ କଳା ହୋଇଯିବ । ଏସବୁର ଆରମ୍ଭ ହୋଇସାରିଛି । ଆଗକୁ ଏହା ଆହୁରି ଭୟଙ୍କର ରୂପ ନେବ ବୋଲି କହିଛନ୍ତି କାଳପୁରୁଷ ବାବା ।
ଧଳା ସ୍ୱଚ୍ଛ ଆକାଶ କଳା କିଟ୍ କିଟ୍ ପଡ଼ିଯିବ । ନିଜର ଗତି ବଦଳାଇବ ସଙ୍ଗମ ନଦୀସ୍ଥଳ । ସମୟ ପରିବର୍ତ୍ତନ ହେବା ସହ ଆଗାମୀ ପିଢ଼ି ପ୍ରୟାଗରାଜ ବଦଳରେ ଏକ ନୂତନ ସ୍ଥାନରେ ବୁଡ଼ ପକାଇବେ । ଏହି କାରଣରୁ, କୁହାଯାଉଛି ଯେ ପରବର୍ତ୍ତୀ କୁମ୍ଭ ମେଲା ଏପରି ଭାବରେ ସଂଗଠିତ ହେବ ଯାହାର କେହି ଅନୁମାନ ମଧ୍ୟ କରିନଥିବେ । ଆଗକୁ ବନ୍ୟା ଆଣିବ ଗଙ୍ଗା ମାତାଙ୍କ ଅଶ୍ରୁ । ମୈଦାନ ଗଙ୍ଗା ମା’ଙ୍କ ଅଶ୍ରୁରେ ପୂରିଯିବ । ଆଗାମୀ ୪ ବର୍ଷରେ ସାରା ବିଶ୍ୱ ଏଭଳି ଭୟଙ୍କର ବିପଦର ସାମନା କରିବ ବୋଲି ବାବ ଦାବି କରିଛନ୍ତି । କ’ଣ ବାସ୍ତବରେ ବାବାଙ୍କ ଭବିଷ୍ୟବାଣୀ ସତ ହେବ ? କ’ଣ ସତରେ ଆଗକୁ ଏଭଳି ଭୟଙ୍କର ପରିସ୍ଥିତିର ସାମନା କରିବ ମଣିଷ ?
