ନୂଆଦିଲ୍ଲୀ : ଉତ୍ତର ପ୍ରଦେଶର ପ୍ରୟାଗରାଜରେ ଆଜି ସକାଳୁ ( ୧୩ ଜାନୁଆରୀ) ଆରମ୍ଭ ହୋଇଛି ମହାକୁମ୍ଭ ମେଳା। ଏଥିରେ ୫୦ଲକ୍ଷରୁ ଅଧିକ ଲୋକ ସଙ୍ଗମରେ ପ୍ରଥମ ପବିତ୍ର ବୁଡ଼ ଦେବେ। ସଙ୍ଗମ ସେହି ସ୍ଥାନ ,ଯେଉଁଠି ଗଙ୍ଗା ,ଯମୁନା ଓ ପୌରାଣିକ ସରସ୍ୱତୀ ନଦୀର ମିଳନ ହୋଇଛି। ବିଶ୍ୱରେ ମାନବତାର ସବୁଠୁ ବଡ଼ ସମାଗମ କୁହାଯାଇ ଥିବା ହଜାର ହଜାର ବର୍ଷ ପୁରୁଣା କୁମ୍ଭମେଳାରେ ,ପ୍ରୟାଗରାଜରେ ୪୦ କୋଟିରୁ ଅଧିକ ଲୋକଙ୍କ ଆସିବାର ଆଶା ରହିଛି , ଯାହା ଆମେରିକା ଓ ରୁଷ୍ର ଜନସଂଖ୍ୟା ଠାରୁ ଅଧିକ।
୧୨ ବର୍ଷ ପରେ ଆୟୋଜିତ ହେଉଥିବା ଏହି ଆୟୋଜନ ପାଇଁ ପାଖାପାଖି ୪ହଜାର ହେକ୍ଟର କ୍ଷେତ୍ରରେ ଆୟୋଜନ କରାଯାଇଥିବା ଏହି ମେଳା ୧୬ ଫେବ୍ରୁଆରୀଯାଏ ଚାଲିବ। ଏଥିରୁ ଭାରତର ସବୁଠୁ ଜନସଂଖ୍ୟା ଥିବା ରାଜ୍ୟ ଉତ୍ତର ପ୍ରଦେଶର ରାଜସ୍ୱରେ ପ୍ରଚୁର ବୃଦ୍ଧି ହେବାର ଆଶା କରାଯାଉଛି। ୪୫ ଦିନ ଯାଏ ଚାଲିବାକୁ ଥିବା ଏହି ବିଶାଳ ମେଳା ପାଇଁ ପାଖାପାଖି ୭୦୦୦କୋଟି ଟଙ୍କାର ବଜେଟ୍ ଆବଣ୍ଟନ କରାଯାଇଛି।
ମହାକୁମ୍ଭ ୨୦୨୫ରୁ ଉତ୍ତର ପ୍ରଦେଶକୁ ୨ ଲକ୍ଷ କୋଟି ଟଙ୍କା ଯାଏ ଆର୍ଥିକ ବୃଦ୍ଧି ହେବାର ଅନୁମାନ କରାଯାଉଛି। ଏହା ମୁତାବିକ , ଯଦି ୪୦ କୋଟି ଆଗନ୍ତୁକଙ୍କ ମଧ୍ୟରୁ ପ୍ରତ୍ୟେକ ହାରାହାରି ୫ହଜାର ଟଙ୍କା ଖର୍ଚ୍ଚ କରନ୍ତି ତ , ଏହି ଆୟୋଜନରେ ୨ ଲକ୍ଷ କୋଟି ଟଙ୍କାର ଆୟ ହୋଇପାରେ।
ନ୍ୟୁଜ୍ ଏଜେନ୍ସି ଆଇଏନଏସ୍ ଉଦ୍ୟୋଗ ଜଗତର ଆକଳନ ଅନୁସାରେ, ପ୍ରତି ବ୍ୟକ୍ତିର ହାରାହାରି ବ୍ୟୟ ୧୦,୦୦୦ଟଙ୍କା ଯାଏ ବୃଦ୍ଧି ହୋଇ ପାରେ ଏବଂ ମୋଟ ଆର୍ଥିକ ପ୍ରଭାବ ୪ ଲକ୍ଷ କୋଟି ଟଙ୍କା ଯାଏ ପହଞ୍ଚି ପାରେ। ଏଥିରୁ ନାମମାତ୍ର ଓ ବାସ୍ତବିକ ଜିଡିପି ଉଭୟରେ ୧ ପ୍ରତିଶତରୁ ଅଧିକ ବୃଦ୍ଧି ହେବାର ଆଶା ରହିଛି। ଉତ୍ତର ପ୍ରଦେଶର ମୁଖମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ, ୨୦୧୯ରେ ପ୍ରୟାଗରାଜର ଅର୍ଦ୍ଧ କୁମ୍ଭମେଳା ରାଜ୍ୟର ଅର୍ଥବ୍ୟବସ୍ଥାରେ ୧.୨ ଲକ୍ଷ କୋଟି ଟଙ୍କାର ଯୋଗଦାନ ଦେଇଥିଲା । ୨୦୧୯ରେ ଅର୍ଦ୍ଧ ବା ଅଧା କୁମ୍ଭମେଳାରେ ପାଖାପାଖି ୨୪ କୋଟି ତୀର୍ଥ ଯାତ୍ରୀ ଆସିଥିଲେ।
ସେ ନିକଟରେ ଏକ ନ୍ୟୁଜ୍ ଚ୍ୟାନେଲକୁ କହିଛନ୍ତି , ଏହି ବର୍ଷ ୪୦ କୋଟି ଶ୍ରଦ୍ଧାଳୁଙ୍କ ଆସିବାର ଆଶା ରହିଛି, ତଥା ମହାକୁମ୍ଭରୁ ୨ ଲକ୍ଷ କୋଟି ଟଙ୍କା ଯାଏ ଆର୍ଥିକ ବୃଦ୍ଧି ହେବାର ଅନୁମାନ ରହିଛି।
