ପ୍ୟାରିସ: ଫ୍ରାନ୍ସରେ ଗତ ବୁଧବାର ରାତିରେ ତୀବ୍ର ଝଡ଼ ଓ ବର୍ଷା ତାଣ୍ଡବ ରଚିଛି। ଯାହା ଫଳରେ ଦୁଇ ଜଣଙ୍କର ମୃତ୍ୟୁ ହୋଇଛି ଏବଂ ୧୭ ଜଣ ଆହତ ହୋଇଛନ୍ତି। ଏହି ଝଡ଼ ପ୍ୟାରିସ ସମେତ ଦେଶର ଅନେକ ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟାଇଛି। ଅଧିକାଂଶ ସ୍ଥାନରେ ଗଛ ଉପୁଡ଼ି ଯିବା, ରାସ୍ତାଘାଟ ଜଳମଗ୍ନ ହେବା ସହ ବିଦ୍ୟୁତ ସେବା ବାଧାପ୍ରାପ୍ତ ହେବା ଭଳି ଘଟଣା ଘଟିଛି। ପ୍ୟାରିସରେ ଝଡ଼ର ବେଗ ଘଣ୍ଟା ପ୍ରତି ପ୍ରାୟ ୧୧୨ କିଲୋମିଟରରେ ପହଞ୍ଚିଥିଲା। ଯାହା ଏକ ଦୁର୍ଲଭ ‘ଡେରେଚୋ’ ପ୍ରକାରର ଝଡ଼ ବୋଲି କର୍ତ୍ତୃପକ୍ଷ ବର୍ଣ୍ଣନା କରିଛନ୍ତି।
ଏହି ଭୟହ୍କର ଝଡରେ ଦୁଇ ଜଣଙ୍କର ମୃତ୍ୟୁ ଘଟିଛି। ଦୁଇ ମୃତକଙ୍କ ମଧ୍ୟରେ ଜଣେ ହେଉଛନ୍ତି ଦକ୍ଷିଣ-ପଶ୍ଚିମ ଫ୍ରାନ୍ସର ତାର୍ନ-ଏଟ-ଗାରୋନେ ଅଞ୍ଚଳର ଜଣେ ୧୨ ବର୍ଷୀୟ ବାଳକ ଏବଂ ଅନ୍ୟ ଜଣେ ହେଉଛନ୍ତି ଉତ୍ତର-ପଶ୍ଚିମ ଫ୍ରାନ୍ସର ମାୟେନେରେ ଜଣେ ୫୯ ବର୍ଷୀୟ ବ୍ୟକ୍ତି, ଯିଏ ଝଡ଼ରେ ଉପୁଡ଼ି ପଡ଼ିଥିବା ଗଛ ସହ ଧକ୍କା ହେବା ଫଳରେ ମୃତ୍ୟୁବରଣ କରିଛନ୍ତି। ଏହି ଝଡ଼ରେ ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି, ଏବଂ ପ୍ରାୟ ୧,୧୦,୦୦୦ ଘରରେ ବିଦ୍ୟୁତ ସେବା ଯୋଗାଣ ବାଧାପ୍ରାପ୍ତ ହୋଇଛି।
ପ୍ୟାରିସରେ ଝଡ଼ ଓ ବର୍ଷା ଏତେ ପ୍ରବଳ ଥିଲା ଯେ ସହରର ଅନେକ ମେଟ୍ରୋ ଷ୍ଟେସନ ଜଳମଗ୍ନ ହୋଇଯାଇଥିଲା ଏବଂ ଗଛ ପଡ଼ିବା ଯୋଗୁଁ ଅନେକ ରାସ୍ତା ଅବରୋଧ ହୋଇଥିଲା। ପ୍ୟାରିସ ଅଗ୍ନିଶମ ବିଭାଗ ପ୍ରାୟ ୫୦ଟି ଗଛ ଉପୁଡି ପଡ଼ିବା ନେଇ ଆଧିକାରିକ ସ୍ତରରେ ଘୋଷଣା କରିଛି। ଏହା ସହିତ, ଫ୍ରାନ୍ସର ଜାତୀୟ ସଂସଦ (ନ୍ୟାସନାଲ ଆସେମ୍ଲି)ର ଛାତ ମଧ୍ୟ ଲିକ୍ ହୋଇଥିଲା। ଯେଉଁଠାରେ ପ୍ରଧାନମନ୍ତ୍ରୀ ଫ୍ରାଙ୍କୋଇସ ବେରୁ ମଧ୍ୟପ୍ରାଚ୍ୟ ଉପରେ ଏକ ବକ୍ତୃତା ଦେଉଥିବା ସମୟରେ ବର୍ଷା ପାଣି ଭିତରକୁ ଧସେଇ ପଶିଥିଲା। ଏହା ଦେଖି ପ୍ରଧାନମନ୍ତ୍ରୀ ମଜା କରି କହିଥିଲେ, “ଆପଣମାନେ ଦେଖିଛନ୍ତି କି ବର୍ଷା ହେଉଛି?” ସଂସଦର ଉପାଧ୍ୟକ୍ଷ ରୋଲାଣ୍ଡ ଲେସ୍କୁର ଆଲୋଚନାକୁ ଅଳ୍ପ ସମୟ ପାଇଁ ସ୍ଥଗିତ ରଖିଥିଲେ ଏବଂ ଅଗ୍ନିଶମ କର୍ମଚାରୀମାନେ ଲିକ୍ ସମସ୍ୟାକୁ ସମାଧାନ କରିଥିଲେ।
ଏହି ଝଡ଼ ପୂର୍ବରୁ ଫ୍ରାନ୍ସରେ ୩୫ ଡିଗ୍ରୀ ସେଲସିୟସରୁ ଅଧିକ ତାପମାତ୍ରା ବିଶିଷ୍ଟ ଏକ ଗରମ ପାଗ ଅନୁଭୂତ ହୋଇଥିଲା। ଝଡ଼ ସମୟରେ ପ୍ୟାରିସରେ ଆକାଶ ଏକ ଅଜଣା ହଳଦିଆ ରଙ୍ଗରେ ପରିଣତ ହୋଇଥିଲା ଏବଂ ସାକ୍ରେ-କୋଏର କ୍ୟାଥେଡ୍ରାଲ ଉପରେ ବିଜୁଳିର ଝଲକ ଦେଖାଯାଇଥିଲା। ଚାମ୍ପେନ ଅଞ୍ଚଳରେ ଗଲ୍ଫ ବଲ ଆକାରର ତୁଷାରପାତ ହେବା ଯୋଗୁଁ ଉକ୍ତ ଅଞ୍ଚଳରେ ଥିବା ଫସଲକୁ ବ୍ୟାପକ କ୍ଷତି ପହଞ୍ଚିଛି।
ଫ୍ରେଞ୍ଚ ସିଭିଲ ଡିଫେନ୍ସ ଏଜେନ୍ସି ଅନୁଯାୟୀ, ଏହି ଝଡ଼ ଦେଶରେ ବ୍ୟାପକ କ୍ଷୟକ୍ଷତି ଘଟାଇଛି। ଅନେକ ସ୍ଥାନରେ ବିଦ୍ୟୁତ ସେବା ବାଧାପ୍ରାପ୍ତ ହେବା ସହ ରେଳ ଓ ମେଟ୍ରୋ ସେବା ମଧ୍ୟ ପ୍ରଭାବିତ ହୋଇଛି। କର୍ତ୍ତୃପକ୍ଷ ଜନସାଧାରଣଙ୍କୁ ସତର୍କ ରହିବାକୁ ଏବଂ ଅଧିକ ପ୍ରତିକୂଳ ପାଗ ପାଇଁ ପ୍ରସ୍ତୁତ ରହିବାକୁ ପରାମର୍ଶ ଦେଇଛନ୍ତି।
ଫ୍ରାନ୍ସରେ ଏହି ଅପ୍ରତ୍ୟାଶିତ ଝଡ଼ ଓ ବର୍ଷା ଜନଜୀବନକୁ ଅସ୍ତବ୍ୟସ୍ତ କରିଦେଇଛି। ସରକାର ଏବଂ ଜରୁରୀ ସେବା ବିଭାଗ କ୍ଷତିଗ୍ରସ୍ତ ଅଞ୍ଚଳରେ ଉଦ୍ଧାର ଓ ପୁନର୍ବାସ କାର୍ଯ୍ୟରେ ନିୟୋଜିତ ହୋଇଛନ୍ତି।
