ନବରଙ୍ଗପୁର ୦୩/୦୬: ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ପଡ଼ାଲଗୁଡ଼ା ଗାଁରେ ଅଭାବନୀୟ ଘଟଣା । ପାଇଖାନା ଟାଙ୍କି ସଫା ବେଳେ ଶ୍ୱାସରୁଦ୍ଧ ହୋଇ ଚାଲିଗଲା ୪ ଜଣ ଶ୍ରମିକଙ୍କ ଜୀବନ । ମୃତ ଶ୍ରମିକମାନେ ପଡ଼ାଲଗୁଡ଼ା ଗାଁର ଏମ୍.ସନ୍ତୁ(୩୩), ଆମିର ଖରା( ୩୧), ଲାଲୁ ରଣା (୩୨) ଓ ତ୍ରିଲୋଚନ ଭତ୍ରା ( ୩୦)।ଏହାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ଅଗ୍ନିଶମ କର୍ମଚାରୀ ଏବଂ ପୁଲିସ ପହଞ୍ଚି ମୃତଦେହ ଉଦ୍ଧାର କରି ନବରଙ୍ଗପୁର ଜିଲ୍ଲାମୁଖ୍ୟ ଚିକିତ୍ସାଳୟକୁ ପଠାଯାଇଛି।
ସୂଚନା ଅନୁଯାୟୀ, ମଙ୍ଗଳବାର ସକାଳ ପ୍ରାୟ ୯ଟା ବେଳେ ମୋହନ ନାଗଙ୍କ ନିର୍ମାଣଧିନ ପାଇଖାନା ସଫା କରିବାକୁ ୪ ଶ୍ରମିକ ନିୟୋଜିତ ହୋଇଥିଲେ। ଟାଙ୍କିରେ ସେଟରିଙ୍ଗ ପଡିଥିବା ବେଳେ ଭିତରେ ପାଣି ଜମି ରହିଥିଲା। ଏହି ପାଣି କାଢ଼ିବା ଲାଗି ପ୍ରଥମରେ ୨ ଜଣ ଶ୍ରମିକ ଭିତରକୁ ଯାଇଥିଲେ। ସେମାନେ ନବାହାରିବାରୁ ପରେ ଆଉ ୨ଜଣ ତଳକୁ ଓହ୍ଲାଇଥିଲେ। ପାଇଖନା ଟାଙ୍କି ଭିତରେ ହଠାତ୍ ଶ୍ୱାସରୁଦ୍ଧ ହୋଇଶ୍ରମିକ ଗୁରୁତର ହୋଇଥିଲେ। ଦୀର୍ଘ ସମୟ ପର୍ଯ୍ୟନ୍ତ କେହି ନବାହାରିବାରୁ ଅଗ୍ନିଶମ ବିଭାଗ ଓ ପୁଲିସକୁ ସୂଚନା ଦିଆଯାଇଥିଲା। ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ୪ ଶ୍ରମିକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ। ୪ ଶ୍ରମିକଙ୍କୁ ଉଦ୍ଧାର କରି ନବରଙ୍ଗପୁର ଜିଲ୍ଲାମୁଖ୍ୟ ଚିକିତ୍ସାଳୟ ପଠାଇଥିଲେ। ସେଠାରେ ଡାକ୍ତର ୪ ଜଣଙ୍କୁ ମୃତ ଘୋଷଣା କରିଥିଲେ। ଶବ ବ୍ୟବଚ୍ଛେଦ ପରେ ମୃତ୍ୟୁର ସଠିକ୍ କାରଣ ସ୍ପଷ୍ଟ ହେବ ବୋଲି ଡାକ୍ତର କହିଥିଲେ। ୪ ଜଣ ଶ୍ରମିକଙ୍କ ମୃତ୍ୟୁକୁ ନେଇ ଅଞ୍ଚଳରେ ଶୋକର ଛାୟା ଖେଳିଯାଇଛି।
