ନୂଆଦିଲ୍ଲୀ, ୧।୫: ବରିଷ୍ଠ ନାଗରିକଙ୍କ ଲାଗି ସ୍ୱାସ୍ଥ୍ୟ ବୀମା ନିୟମ କ୍ଷେତ୍ରରେ ପରିବର୍ତ୍ତନ କରିଛନ୍ତି ଭାରତୀୟ ବୀମା ନିୟାମକ ଏବଂ ବିକାଶ କର୍ତ୍ତୃପକ୍ଷ (ଆଇଆର୍ଡିଏଆଇ) । ପୂର୍ବରୁ ଏ କ୍ଷେତ୍ରରେ ବୟସ ସୀମା ୬୫ ବର୍ଷ ରହିଥିବା ବେଳେ ଏହାକୁ ଏବେ ବାଦ୍ ଦିଆଯାଇଛି । ଏବେ ୬୫ ବର୍ଷରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତିବିଶେଷ ମଧ୍ୟ ସ୍ୱାସ୍ଥ୍ୟ ବୀମା କ୍ରୟ କରିପାରିବେ । ସେହିଭଳି ପୂର୍ବ ଧାର୍ଯ୍ୟ ସର୍ତ୍ତ ପାଇଁ ଅପେକ୍ଷା ସମୟକୁ ମଧ୍ୟ ୪ ବର୍ଷ ପରିବର୍ତ୍ତେ ୩ ବର୍ଷକୁ ହ୍ରାସ କରାଯାଇଛି । ଏଭଳି ସ୍ଥିତିରେ ବରିଷ୍ଠ ନାଗରିକ ସ୍ୱାସ୍ଥ୍ୟ ବୀମା ପ୍ରିମିୟମ ୧୦%ରୁ ୧୫% ଯାଏ ବୃଦ୍ଧି ହୋଇପାରେ ବୋଲି ଆକୋର ରିଟେଲ ହେଲ୍ଥ ଉପସଭାପତି ରୁପିନ୍ଦରଜିତ ସିଂ କହିଛନ୍ତି ।
ଚଳିତ ବର୍ଷ ଏପ୍ରିଲ ପହିଲାରୁ ଏହି ନିୟମ ଲାଗୁ ହୋଇଛି । ଅଧିକ ଲୋକଙ୍କୁ ସ୍ୱାସ୍ଥ୍ୟ ବୀମା ନେବାକୁ ଏଭଳି ସୁବିଧା କରିଛନ୍ତି ବୀମା ନିୟାମକ । ସବୁ ବୟସ ବର୍ଗଙ୍କ ଲାଗି ବୀମା ଉତ୍ପାଦ ପ୍ରସ୍ତୁତ କରିବାକୁ ଏବେ ବୀମା କମ୍ପାନିଗୁଡିକୁ ନିର୍ଦ୍ଦେଶ ଦିଆଯାଇଛି । ସ୍ୱାସ୍ଥ୍ୟାବସ୍ଥା ଅନୁସାରେ ପ୍ରିମିୟମ ଧାର୍ଯ୍ୟ ହେବ । ତେବେ ହାଇ ରିସ୍କ କ୍ଷେତ୍ରରେ ବୀମା ନ ଦେବାକୁ ମଧ୍ୟ କହିପାରିବେ କମ୍ପାନି । ଅଧିକ ମେଡିକାଲ ସେବା ଆବଶ୍ୟକ କରୁଥିବା ବ୍ୟକ୍ତିବିଶେଷଙ୍କଠାରୁ ସାଧାରଣତଃ ଅଧିକ ଦେୟ ନିଅନ୍ତି ବୀମା କମ୍ପାନି । ୧୦ ଲକ୍ଷ ସ୍ୱାସ୍ଥ୍ୟ ବୀମା କଭର ଲାଗି ଜଣେ ୬୫ ବର୍ଷ ବୟସ୍କ ପ୍ରି କଣ୍ଡିସନ ଓ ମେଟ୍ରୋ ସହରରେ ରହିବା କ୍ଷେତ୍ରରେ ବାର୍ଷିକ ପ୍ରିମିୟମ ୬୩,୨୫୦ ଟଙ୍କା ରହିପାରେ ।