ଖଲ୍ଲିକୋଟ,୦୩/୦୬: ରାସ୍ତା ପାର୍ ହେଉଥିବା ବାଇକକୁ ଧକ୍କା ଦେଲା କାର୍। ଫଳରେ ଦୁଇ ବାଇକ୍ ଆରୋହୀ ଗୁରୁତର ହୋଇଛନ୍ତି । ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥର ନାରାୟଣୀ ଛକ ନିକଟରେ ଏହି ଦୁର୍ଘଟଣା ଘଟିଛି। ଗୁରୁତର ଦୁଇ ଜଣ ହେଲେ ବେଗୁନିଆପଡ଼ା ଥାନା ନଛିପୁର ଗ୍ରାମର ରିଙ୍କୁ ପଲେଇ ଓ ରଞ୍ଜିତ ପରିଡ଼ା ।
ସୂଚନା ମୁତାବକ, ଆଜି ଦିନ ୧୧ଟାରେ ବେଗୁନିଆପଡା ଥାନା ଅନ୍ତର୍ଗତ ନଛିପୁର ଗାଁର ରିଙ୍କୁ ପଲେଇ ଓ ରଞ୍ଜିତ ପରିଡା ଏକ ବାଇକ ଯୋଗେ ନାରାୟଣୀ ଛକରେ ରାସ୍ତା ପାର୍ ହେଉଥିଲେ। ସେହି ସମୟରେ ବ୍ରହ୍ମପୁର ପଟୁ ଆସୁଥିବା ଏକ କାର୍ ବାଇକକୁ ଧକ୍କା ଦେଇଥିଲା। ଫଳରେ ବାଇକଟି ଉପରକୁ ଉଠି ତଳେ କଚାଡି ହୋଇପଡିଥିଲା। ବାଇକଟି ସମ୍ପୂର୍ଣ୍ଣ ଭାଙ୍ଗି ଯାଇଥିବା ବେଳେ ୨ ବାଇକ ଆରୋହୀ ଗୁରୁତର ଆହତ ହୋଇଥିଲେ । ଭେଜିପୁଟ ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ୨ ଆହତଙ୍କୁ ଚିକିତ୍ସା ପାଇଁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ । ସେଠାରେ ପ୍ରାଥମିକ ଚିକିତ୍ସା ପରେ ବାଇକ ଆରୋହୀ ରିଙ୍କୁ ପଲେଇ ଓ ରଞ୍ଜିତ ପରିଡାଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ଏମକେସିଜି ହସ୍ପିଟାଲକୁ ସ୍ଥାନାନ୍ତର କରାଯାଇଛି।
