ଚନ୍ଦନେଶ୍ୱର,୧୫/୦୬: ଦୁଇ ମାସ ପରେ ହଟିଲା କଟକଣା । ମତ୍ସ୍ୟଜୀବୀଙ୍କ ମୁହଁରେ ଫୁଟିଲା ହସ। ସମୁଦ୍ରକୁ ମାଛ ଧରିବାକୁ ଗଲେ ମତ୍ସ୍ୟଜୀବୀ । ପ୍ରଥମ ଦିନରେ ଭୋଗରାଇର ୪ ପ୍ରମୁଖ ମତ୍ସ୍ୟ ଅବତରଣ କେନ୍ଦ୍ରରେ ମତ୍ସ୍ୟଜୀବୀଙ୍କ ଜାଲରେ ପଡ଼ିଛି ୫୦ କୁଇଣ୍ଟାଲରୁ ଉର୍ଦ୍ଧ୍ୱ ମାଛ । ବାଲେଶ୍ୱର ଜିଲ୍ଲା ଭୋଗରାଇ, ଉଦୟପୁର, ତାଳସାରି, ରଣସିଂହପୁର ,କୀର୍ତ୍ତନିଆ ଆଦି ମତ୍ସ୍ୟ ଅବତରଣ କେନ୍ଦ୍ରରେ ଲୁଣି ମାଛ ବିକ୍ରି ହୋଇଥିବା ସୂଚନା ରହିଛି ।
ସୂଚନା ମୁତାବକ, ୨ ମାସ ପାଇଁ ସମୁଦ୍ରରୁ ମାଛ ଧରା ଉପରେ କଟକଣା ଲାଗି ରହିଥିଲା । ସେଥିପାଇଁ ମତ୍ସ୍ୟଜୀବୀମାନେ ବିଭିନ୍ନ ସମସ୍ୟା ଦେଇ ଗତି କରୁଥିଲେ । ମାତ୍ର ଆଜି ସମୁଦ୍ର କଟକଣା ଖୋଲିବା ପରେ ୪ଟି ମତ୍ସ୍ୟ ଅବତରଣ କେନ୍ଦ୍ରରୁ ପ୍ରାୟ ୩୦୦ରୁ ଉର୍ଦ୍ଧ୍ୱ ଡଙ୍ଗା ସମୁଦ୍ରକୁ ମାଛ ଧରିବାକୁ ଯାଇ ପ୍ରଥମ ଦିନରେ ସୁରକ୍ଷା ସହିତ କୂଳକୁ ଫେରିଛନ୍ତି । ଆଗକୁ ବର୍ଷାର ପରିମାଣ ଅଧିକ ହେଲେ ସମୁଦ୍ରରେ ମତ୍ସ୍ୟଜୀବୀଙ୍କ ଜାଲରେ ଅଧିକ ପରିମାଣର ମାଛ ପଡିବ ବୋଲି ମତ୍ସ୍ୟଜୀବୀମାନେ କହିଛନ୍ତି । ସେହିପରି ପଡୋଶୀ ରାଜ୍ୟ ପଶ୍ଚିମବଙ୍ଗ ଦୀଘା ମୁହାଣରେ ମଧ୍ୟ ହଜାର ହଜାର ମାଛ ଧରା ଟ୍ରଲର ସମୁଦ୍ରକୁ ଯାଇଥିବା ସୂଚନା ମିଳିଛି।
