ରାଉରକେଲା, ୧୭/୬ : ଥାନାରେ ଶୋଇଥିଲେ ଥାନା ବାବୁ। ନାଇଟ୍ ପାଟ୍ରୋଲିଂ କରି ଧରିଲେ ରଘୁନାଥପାଲି ବିଧାୟକ ଦୁର୍ଗା ଚରଣ ତନ୍ତୀ। ମଙ୍ଗଳବାର ରାତିରେ ରଘୁନାଥପାଲି ବିଧାୟକ ସହରରେ ସୁରକ୍ଷା ବ୍ୟବସ୍ଥାର ବାସ୍ତବ ସ୍ଥିତି ପରଖିଛନ୍ତି। ଲୋକଙ୍କୁ ସୁରକ୍ଷା ଦେବା ବଦଳରେ ରାତିରେ ପୁଲିସ ଥାନାରେ ବିଶ୍ରାମ କରୁଛି। ଏହି ଘଟଣାକୁ ନେଇ ବିଧାୟକ ବିରକ୍ତି ପ୍ରକାଶ କରିଛନ୍ତି।
ରଘୁନାଥପାଲି ବିଧାୟକ ଦୂର୍ଗା ଚରଣ ତନ୍ତୀ ରିଙ୍ଗ୍ ରୋଡର ସେକ୍ଟର-୫ ଗୁଣ୍ଡିଚା ମନ୍ଦିର ଛକରୁ ବାହାରି ସେକ୍ଟର - ୭/୧୭ ଛକ, ସେକ୍ଟର - ୮ ଛକ, ବିମାନ ବନ୍ଦର ଛକ, ଛେଣ୍ଡ ଛକ, ହନୁମାନ ବାଟିକା ଛକ ପର୍ଯ୍ୟନ୍ତ ବୁଲିଥିଲେ। କେଲେ କୌଣସି ସ୍ଥାନରେ ପୁଲିସର ପାଟ୍ରୋଲିଂ ଗାଡି କିମ୍ଵା କୌଣସି ପୁଲିସ କର୍ମଚାରୀ ନଥିଲେ। କେବଳ ପାନପୋଷ ଛକରେ ୩ ଜଣ ପୁଲିସ କର୍ମଚାରୀ ଡ୍ୟୁଟିରେ ଥିଲେ। ଲାଠି ଧରି ଠିଆ ହୋଇଥିଲେ। ଏପରିକି ଥାନଗୁଡ଼ିକର ମୁଖ୍ୟ ଗେଟ ବନ୍ଦ ଥିବାବେଳେ ଭିତରେ ପୁଲିସ ବାବୁମାନେ ବିଶ୍ରାମ କରୁଥିବା ଦେଖିଥିଲେ।
ସହରରେ ଗୋଟିଏ ପରେ ଗୋଟିଏ ଅପରାଧ ବଢ଼ି ଚାଲିଥିବା ବେଳେ ଲୋକେ ନିଜକୁ ଅସୁରକ୍ଷିତ ମନେ କରୁଛନ୍ତି। ଲୋକଙ୍କୁ ସୁରକ୍ଷା ଦେବା ବଦଳରେ ପୁଲିସ ରାତିରେ ଥାନାରେ ବିଶ୍ରାମ କରୁଛି। ଏହି ଘଟଣାକୁ ନେଇ ବିଧାୟକ ବିରକ୍ତି ପ୍ରକାଶ କରିବା ସହ ପୁଲିସ ଡିଜିଙ୍କୁ ଅବଗତ କରିବେ ବୋଲି କହିଛନ୍ତି।
