ନୂଆଦିଲ୍ଲୀ: ନ୍ୟାସନାଲ୍ କାଉନସିଲ୍ ଅଫ୍ ଏଜୁକେସନାଲ୍ ରିସର୍ଚ ଆଣ୍ଡ ଟ୍ରେନିଂ (NCERT) ଭାରତର ପ୍ରତିରକ୍ଷା ରଣନୀତି ଏବଂ କୂଟନୈତିକ ପ୍ରତିକ୍ରିୟା ବିଷୟରେ ଛାତ୍ରଛାତ୍ରୀଙ୍କୁ ଶିକ୍ଷା ଦେବା ପାଇଁ ଅପରେସନ୍ ସିନ୍ଦୁର ଉପରେ ଏକ ସ୍ୱତନ୍ତ୍ର ପାଠ୍ୟକ୍ରମ ମଡ୍ୟୁଲ୍ ପ୍ରସ୍ତୁତ କରୁଛି। ଏହି ମଡ୍ୟୁଲ୍ ଦୁଇଟି ଭାଗରେ ବିଭକ୍ତ ହେବ: ପ୍ରଥମ ଭାଗ କ୍ଲାସ୍ ୩ ରୁ ୮ ପର୍ଯ୍ୟନ୍ତ ଏବଂ ଦ୍ୱିତୀୟ ଭାଗ କ୍ଲାସ୍ ୯ ରୁ ୧୨ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ପ୍ରସ୍ତୁତ ହେବ।

ସୂତ୍ରରୁ ଜଣାପଡ଼ିଛି ଯେ, ଏହି ମଡ୍ୟୁଲ୍ ୮ ରୁ ୧୦ ପୃଷ୍ଠା ମଧ୍ୟରେ ପ୍ରସ୍ତୁତ ହେବ। ଏବଂ ଏହା ଜାମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିକ୍ରିୟା ସ୍ୱରୂପ ଭାରତର ରଣନୈତିକ ସାମରିକ ପ୍ରତିକ୍ରିୟା ଉପରେ କେନ୍ଦ୍ରୀଭୂତ ହେବ। ୨୦୨୫ ମସିହା ଏପ୍ରିଲ ୨୨ ତାରିଖରେ ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ ଜଣ ପୁରୁଷଙ୍କୁ ସେମାଙ୍କ ପରିବାର ସମ୍ମୁଖରେ ହତ୍ୟା କରାଯାଇଥିଲା। ଏହାର ପ୍ରତିଶୋଧ ସ୍ୱରୂପ ଭାରତ ପାକିସ୍ତାନ ଅଧିକୃତ କାଶ୍ମୀର ଏବଂ ପାକିସ୍ତାନରେ ଥିବା ବିଭିନ୍ନ ଆତଙ୍କବାଦୀ ଠିକଣାଗୁଡ଼ିକୁ ଟାର୍ଗେଟ କରି ଅପରେସନ୍ ସିନ୍ଦୁର ଆରମ୍ଭ କରିଥିଲା। ଯାହା ଦୁଇ ଦେଶ ମଧ୍ୟରେ ଚାରି ଦିନିଆ ସଂଘର୍ଷର କାରଣ ହୋଇଥିଲା।

ଏନେଇ ଜଣେ ଅଧିକାରି ନିଜ ନାମ ଗୋପନ ରଖି କହିଛନ୍ତି ଯେ, “ଏହି ମଡ୍ୟୁଲ୍ ର ମୁଖ୍ୟ ଉଦ୍ଦେଶ୍ୟ ହେଉଛି ଛାତ୍ରଛାତ୍ରୀଙ୍କୁ ଆତଙ୍କବାଦୀ ବିପଦ ପ୍ରତି ରାଷ୍ଟ୍ରଗୁଡ଼ିକ କିପରି ପ୍ରତିକ୍ରିୟା କରେ ଏବଂ ପ୍ରତିରକ୍ଷା, କୂଟନୀତି ଏବଂ ମନ୍ତ୍ରଣାଳୟଗୁଡ଼ିକ ମଧ୍ୟରେ ସମନ୍ୱୟ ଜାତୀୟ ସୁରକ୍ଷାରେ କିପରି ଭୂମିକା ନିର୍ବାହ କରେ ତାହା ବୁଝାଇବା।” ଏହା ସହିତ, ଏହି ମଡ୍ୟୁଲ୍ ଭାରତର ସାମରିକ ଶକ୍ତି, ବୈଜ୍ଞାନିକ ଅଗ୍ରଗତି ଏବଂ ଜାତୀୟ ଗୌରବକୁ ପ୍ରୋତ୍ସାହନ ଦେବା ପାଇଁ ଉଦ୍ଦିଷ୍ଟ ବୋଲି ଜଣାପଡିଛି।

ଏହା ବ୍ୟତୀତ, ଅପରେସନ୍ ସିନ୍ଦୁର ଉପରେ ଏକ ସ୍ୱତନ୍ତ୍ର ଆଲୋଚନା ଲୋକସଭାରେ ଜୁଲାଇ ୨୮ ତାରିଖରୁ ଆରମ୍ଭ ହେବ, ଯେଉଁଥିରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଗୃହ ମନ୍ତ୍ରୀ ଅମିତ ଶାହ ଏବଂ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଅଂଶଗ୍ରହଣ କରିବେ ବୋଲି ଆଶା କରାଯାଉଛି। ଏହି ଆଲୋଚନା ୧୬ ଘଣ୍ଟା ଧରି ତିନି ଦିନ ପର୍ଯ୍ୟନ୍ତ ଚାଲିବ।

ଏହି ମଡ୍ୟୁଲ୍ ଇତିହାସ ଏବଂ ରାଜନୀତି ବିଜ୍ଞାନ ଭଳି ବିଷୟଗୁଡ଼ିକରେ ସାମିଲ ହେବ ଏବଂ ଶିକ୍ଷକମାନଙ୍କୁ ଏହା ଶିକ୍ଷା ଦେବା ପାଇଁ ସ୍ୱତନ୍ତ୍ର ତାଲିମ ପ୍ରଦାନ କରାଯିବ। DIKSHA ଭଳି ଡିଜିଟାଲ୍ ପ୍ଲାଟଫର୍ମରେ ଭିଡିଓ, କୁଇଜ୍ ଏବଂ ଇଣ୍ଟରଆକ୍ଟିଭ୍ ସାମଗ୍ରୀ ମଧ୍ୟ ଉପଲବ୍ଧ ହେବ।

ଏହି ପଦକ୍ଷେପ ଦେଶର ଭାବି ପିଢ଼ିଙ୍କୁ ଜାତୀୟ ସୁରକ୍ଷା ଏବଂ ଦେଶଭକ୍ତିର ମହତ୍ତ୍ୱ ବୁଝାଇବା ସହିତ ଭାରତର ସାମରିକ ଓ କୂଟନୈତିକ ସଫଳତାକୁ ପ୍ରଦର୍ଶନ କରିବ।