ଭୋଗରାଇ,୧୬।୬(ଆ.ପ୍ର): ନିଜ ଘରେ ଖରାପ୍ ହୋଇଯାଇଥିବା ବିଦ୍ୟୁତ୍ ଲାଇନ୍ ଓ ସୁଇଚ୍ ବୋର୍ଡକୁ ସଜାଡ଼ିବା ବେଳେ ହଠାତ୍ ବିଦ୍ୟୁତ୍ ସଂସ୍ପର୍ଶରେ ଆସି ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ଏଭଳି ଘଟଣା ଘଟିଛି ବାଲେଶ୍ଵର ଜିଲ୍ଲା ଭୋଗରାଇ ବ୍ଲକ ଅନ୍ତର୍ଗତ କୁଶୁଡା ଗ୍ରାମରେ । ମୃତକ ଜଣକ ହେଉଛନ୍ତି ସେହି ଗ୍ରାମର ସ୍ବର୍ଗତ କିଣାରାମ ଜେନାଙ୍କ ବଡ଼ପୁଅ ଶଙ୍କର ଜେନା (୫୫) ।
ଶଙ୍କର ଜଣେ ଦାଦନ ଶ୍ରମିକ ଭାବରେ ଦୀର୍ଘ ଦିନ ବାହାର ରାଜ୍ୟରେ କାମ କରି ପରିବାର ପ୍ରତିପୋଷଣ କରୁଥିଲେ । କିଛିଦିନ ପୂର୍ବରୁ ଘରକୁ ଫେରି ଚାଷ କାମରେ ମଧ୍ୟ ମନୋନିବେଶ କରିଥିଲେ । ସୋମବାର ସନ୍ଧ୍ୟାରେ ଘରର ବିଦ୍ୟୁତ୍ ତାର ଓ ସୁଇଚ୍ ବୋର୍ଡରେ ସମସ୍ୟା ଉପୁଜିଥିବା ଦେଖି ଶଙ୍କର ଏହାକୁ ସଜାଡ଼ିବା ପାଇଁ ଯାଇଥିଲେ । ତେବେ ସୁଇଚ୍ ବୋର୍ଡରେ ହାତମାରିବା କ୍ଷଣି ତାଙ୍କୁ ବିଦ୍ୟୁତ୍ ଆଘାତ ଲାଗିବା ସହିତ ସେ ତଳେ ପଡିଯାଇଥିଲେ । ସଙ୍ଗେ ସଙ୍ଗେ ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଜଳେଶ୍ଵରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଇଥିଲେ। ଡ଼ାକ୍ତର ସେଠାରେ ତାଙ୍କୁ ମୃତ ବୋଲି ଘୋଷଣା କରିଥିଲେ । ଏ ବାବଦରେ ମୃତ ଶଙ୍କରଙ୍କ ସାନଭାଇ ପଦ୍ମଲୋଚନ ଜେନା ପୁଲିସକୁ ଜଣାଇବା ପରେ ଖବରପାଇ କମର୍ଦ୍ଦା ଥାନା ପୁଲିସ୍ ଡାକ୍ତରଖାନାରେ ପହଞ୍ଚି ଏକ ଅପମୃତ୍ୟୁ ମାମଲା ରୁଜ୍ଜୁ କରିବା ସହିତ ଶବକୁ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିବା ଜଣାପଡିଛି ।
