ସୁରଟ, ୬/୧୧ : ସୁରଟର ୯ ବର୍ଷୀୟା ରିୟା ବବି ମିଶ୍ର ନିଜର ଡାହାଣ ହାତକୁ ଅନ୍ୟ ଜଣେ ଝିଅକୁ ଦାନ କରିଛନ୍ତି । ଏହା ଜରିଆରେ ସେ ଦେଶର ପ୍ରଥମ ତଥା ସର୍ବକନିଷ୍ଠ ହାତ ଦାତା ହୋଇଛନ୍ତି । ଡୋନେଟ୍ ଲାଇଫ୍ ଅର୍ଗାନାଇଜେସନ୍ ଜରିଆରେ ଏହି ମହତ କାର୍ଯ୍ୟ ସମ୍ପାଦିତ ହୋଇଛି । ଗତ ସେପ୍ଟେମ୍ବରରେ କିରନ ହସ୍ପିଟାଲରେ ରିୟାଙ୍କୁ ବ୍ରେନ୍ ଡେଡ୍ ଘୋଷଣା କରାଯାଇଥିଲା । ଏହା ପରେ ତାଙ୍କ ପରିବାର ରିୟାଙ୍କ ହାତ, ଫୁସ୍ଫୁସ୍, ଯକୃତ, କିଡ୍ନୀ ଓ ଚକ୍ଷୁ ଦାନ କରିବାକୁ ନିଷ୍ପତ୍ତି ନେଲେ । ରିୟାଙ୍କ ପାଇଁ ୭ ଜଣଙ୍କୁ ନୂଆ ଜୀବନ ମିଳିଛି । ତାଙ୍କ ଡାହାଣ ହାତ ମୁମ୍ବାଇର ଗୋରେଗାଓଁ ବାସିନ୍ଦା ଜଣେ ୧୫ ବର୍ଷୀୟା ବାଳିକାଙ୍କଠାରେ ପ୍ରତିରୋପଣ କରାଯାଇଛି । ସ୍ଥାନୀୟ ଗ୍ଲୋବାଲ ହସ୍ପିଟାଲରେ ଡା. ନିଲେଶଙ୍କ ନେତୃତ୍ୱାଧୀନ ଟିମ୍ ହାତ ପ୍ରତିରୋପଣ କରିଥିଲେ । କାନ୍ଧଠୁ ହାତର ଶେଷ ପର୍ଯ୍ୟନ୍ତ ଏହା ଦେଶର ପ୍ରଥମ ପ୍ରତିରୋପଣ ଥିଲା । ରିୟାଙ୍କ ହାତ ପାଇଥିବା ଅନନ୍ତା ଅହମଦ ବର୍ତ୍ତମାନ ମୁମ୍ବାଇରେ ୧୧ଶ ଶ୍ରେଣୀରେ ଅଧ୍ୟୟନ କରୁଛନ୍ତି ।
୨୦୨୨ ମସିହା, ଅକ୍ଟୋବର ୩୦ ତାରିଖରେ ଉତ୍ତରପ୍ରଦେଶର ଅଲିଗଡ଼ଠାରେ ନିଜର ଜଣେ ସମ୍ପର୍କୀୟଙ୍କ ସହ ସେ ଖେଳୁଥିଲେ । ଅଜାଣତରେ ୧୧,୦୦୦ କେଭି ବିଦ୍ୟୁତ୍ ତାରକୁ ଧରି ପକାଇବା ଯୋଗୁ ତାଙ୍କର ଦୁଇ ହାତ ଜଳିଗଲା । ଗ୍ୟାଙ୍ଗରିନ୍ (ସଂକ୍ରମଣ) ଯୋଗୁ ତାଙ୍କ ଡାହାଣ ହାତକୁ ବାହୁଠୁ କାଟିବାକୁ ପଡ଼ିଲା । ଏକାଧିକ କ୍ଷତ ଯୋଗୁ ବାମ ହାତ ଧୀରେ ଧୀରେ କାର୍ଯ୍ୟ ବନ୍ଦ କରିଦେଲା । ରିୟାଙ୍କଠୁ ଡାହାଣ ହାତ ପାଇବା ପରେ ଅନନ୍ତା କହିଛନ୍ତି, ଦୁର୍ଘଟଣାରେ ଡାହାଣ ହାତ ହରାଇବା ପରେ ମଧ୍ୟ ମୁଁ ସାହାସ ହରାଇ ନଥିଲି । ନୃତ୍ୟ, ପହଁରା, ଲୋକଙ୍କୁ ପ୍ରେରିତ କରିବା ଭଳି ଅନେକ କାର୍ଯ୍ୟରେ ମୁଁ ନିଜକୁ ବ୍ୟସ୍ତ ରଖିଲି । ଦିନେ ହସ୍ପିଟାଲରେ ହାତ ପ୍ରତିରୋପଣ ଜରିଆରେ ମୋତେ ନୂଆ ହାତ ମିଳିବ ବୋଲି କୁହାଗଲା । ସେବେଠୁ ମୋ ଭିତରେ ନୂଆ ଆଶା ଉଙ୍କିମାରିଲା । ମୁଁ ଜାଣିଥିଲି, ଦିନେ ମୋତେ ହାତ ଦାତା ମିଳିବେ । କାନ୍ଧରୁ ହୋଇଥିବା ଏହି ପ୍ରତିରୋପଣ ପରେ ମୋର ଆତ୍ମବିଶ୍ୱାସ ବଢ଼ିଛି । ଏହା ମୋ ଜୀବନରେ ନୂଆ ଖୁସି ଆଣିଛି । ରିୟାଙ୍କ ପରିବାର ଏବେ ମୋ ପରିବାର ଭଳି । ରିୟାଙ୍କ ପାଇଁ ମୋର ଡାହାଣ ହାତ ପ୍ରତିରୋପଣ ହୋଇପାରିଛି । ଆସନ୍ତା ବର୍ଷ ରକ୍ଷାବନ୍ଧନରେ ମୁଁ ରିୟାଙ୍କ ଭାଇକୁ ରାଖି ବାନ୍ଧିବି ।’ ଅନନ୍ତାଙ୍କ ମା’ବାପା ରିୟାଙ୍କ ପରିବାରକୁ ଏଥିପାଇଁ କୃତଜ୍ଞତା ଜଣାଇଛନ୍ତି । ଏହି ପ୍ରୟାସ ପାଇଁ ଡୋନେଟ୍ ଲାଇଫ୍ ଅର୍ଗାନାଇଜେସନ୍କୁ ମଧ୍ୟ ସେମାନେ କୃତଜ୍ଞତା ଜଣାଇଛନ୍ତି ।
