ନୂଆଦିଲ୍ଲୀ: ଜୟ ଶାହ ଆଇସିସି ଅଧ୍ୟକ୍ଷ ହୋଇଥିବା ବେଳେ ଡିସେମ୍ବର ପହିଲାରୁ ଦାୟିତ୍ବ ଗ୍ରହଣ କରିବେ । ଏବେ ବିସିସିଆଇର ସଚିବ ଭାବେ କାର୍ଯ୍ୟ କରୁଛନ୍ତି ଜୟ ଶାହ । କିନ୍ତୁ ଡିସେମ୍ବର ୧ ପରେ ଜୟ ଶାହଙ୍କ ପରେ ଏହି ଦାୟିତ୍ବ କିଏ ସମ୍ଭାଳିବେ ? ଡିସେମ୍ବର ମାସ ପାଖେଇ ଆସୁଥିବାରୁ ଏନେଇ ଚର୍ଚ୍ଚା ବଢ଼ି ବଢ଼ି ଚାଲିଛି । ଏଭଳି ସମୟରେ ଆସିଥିବା ଏକ ରିପୋର୍ଟରେ ଜୟ ଶାହଙ୍କ ପରେ ବିସିସିଆଇ ସଚିବ କିଏ ହେବେ ସେନେଇ ଚର୍ଚ୍ଚା ହେଉଛି ।
ଜାତୀୟ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁସାରେ, ଦିଲ୍ଲୀ ଏବଂ ଜିଲ୍ଲା କ୍ରିକେଟ ଆସୋସିଏସନ୍ (ଡିଡିସିଏ)ର ସଭାପତି ଥିବା ରୋହନ ଜେଟଲୀ ବିସିସିଆଇର ପରବର୍ତ୍ତୀ ସଚିବ ହୋଇପାରନ୍ତି । ରୋହନ ଜେଟଲୀଙ୍କ ବ୍ୟତୀତ ଗୁଜରାଟ କ୍ରିକେଟ ଆସୋସିଏନର ସଚିବ ଅନୀଲ ପଟେଲଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି । କିନ୍ତୁ ରୋହନ ଜେଟଲୀଙ୍କ ନାଁ ଉପରେ ମୋହର ଲାଗିପାରେ ବୋଲି କୁହାଯାଉଛି ।
ରୋହନ ଜେଟଲୀ ଦିବଗଂତ ରାଜନେତା ଅରୁଣ ଜେଟଲୀଙ୍କ ପୁଅ । ଏହା ପୂର୍ବରୁ ରୋହନ ଜେଟଲୀ ବିସିସିଆଇର ସଚିବ ହୋଇପାରନ୍ତି ବୋଲି ଖବର ଆସିଥିଲା । କିନ୍ତୁ ସେ ଏଭଳି ଚର୍ଚ୍ଚାକୁ ଖଣ୍ଡନ କରିଥିଲେ । ସେପଟେ ଜୟ ଶାହଙ୍କ ସ୍ଥାନ କିଏ ନେବେ ସେନେଇ କୌଣସି ଔପଚାରିକ ବୈଠକ ହେବ ନାହିଁ ବୋଲି ଜଣାପଡ଼ିଛି । ସୂଚନାଯୋଗ୍ୟ, ଜୟ ଶାହଙ୍କୁ ଆଇସିସି ଅଧ୍ୟକ୍ଷ ନିର୍ବାଚନରେ ଭରପୂର ସମର୍ଥନ ମିଳିଥିଲା । ୧୬ରୁ ୧୫ ଜଣ ସସଦ୍ୟ ତାଙ୍କୁ ସମର୍ଥନ ଦେଇଥିଲେ । ତେବେ ଜୟ ଶାହ ୨୦୧୯ରେ ବିସିସିଆଇର ସଚିବ ହୋଇଥିଲେ । ଜୟ ଶାହ ଦାୟିତ୍ବ ନେବା ପରେ ଭାରତୀୟ କ୍ରିକେଟରେ ବହୁତ ପରିବର୍ତ୍ତନ ଆସିଛି । ଜୟ ଶାହଙ୍କ କାର୍ଯ୍ୟକୁ ଖୁବ ପ୍ରଶଂସା ବି କରିଛନ୍ତି ଖେଳପ୍ରେମୀ ।
