ନୂଆଦିଲ୍ଲୀ,୨୩/୧: ନେତାଜୀ ସୁଭାଷ ଚନ୍ଦ୍ର ବୋଷ ଜଣେ ପ୍ରେରଣାର ଆଲୋକବର୍ତ୍ତିକା । ତାଙ୍କ ନାମ ଉଚ୍ଚାରଣ କଲେ ମନରେ ଆତ୍ମବିଶ୍ବାସ ଆପେ ଆପେ ଆସିଯାଏ । ଶିହରି ଉଠେ ଶରୀର ସୃଷ୍ଟି ହୁଏ ଅଦ୍ୟମ ଉତ୍ସାହ । ଆଗକୁ ବଢିବାକୁ ମିଳେ ସାହସ । ଇଂରେଜ ସରକାରଙ୍କ ବିରୋଧରେ ରଣହୁଙ୍କାର ଦେଇଥିବା ନେତାଜୀ ସୁଭାଷ ଚନ୍ଦ୍ର ବୋଷଙ୍କର ଆଜି ୧୨୮ତମ ଜନ୍ମ ଜୟନ୍ତୀ । ଏହି ଅବସରରେ ସାରା ଦେଶ ପାଳନ କରୁଛି ପରାକ୍ରମ ଦିବସ । ପରାକ୍ରମୀ ଯୁଗ ପୁରୁଷ ନେତାଜୀଙ୍କୁ ମନେ ପକାଉଛି ଭାରତ ।
ସୁଭାଷ ବୋଷଙ୍କ ବିଷୟରେ- ୧୮୯୭ ଜାନୁଆରୀ ୨୩ରେ କଟକରେ ଜନ୍ମଗ୍ରହଣ କରିଥିଲେ ନେତାଜୀ ସୁଭାଷ ବୋଷ । ତାଙ୍କ ପିତାଙ୍କ ନାମ ଜାନକୀନାଥ ବୋଷ ଓ ମା 'ଙ୍କ ନାମ ପ୍ରଭାବତୀ ଦତ୍ତ । ବାପରିଷ୍ଟ ପ୍ରୋଟେଷ୍ଟାଣ୍ଟ ୟୁରୋପିଆନ୍ ସ୍କୁଲରୁ ପ୍ରାଥମିକ ଶିକ୍ଷା ହାସଲ କରିଥିଲେ । ରେଭେନ୍ସା କଲିଜିଏଟରୁ ସ୍କୁଲ ଶିକ୍ଷା ପରେ କୋଲକାତାର ପ୍ରେସିଡେନସି କଲେଜରୁ ଉଚ୍ଚଶିକ୍ଷା ହାସଲ କରିଥିଲେ । ଉଚ୍ଚଶିକ୍ଷା ପରେ ସେ ୧୯୧୯ରେ ଭାରତୀୟ ସିଭିଲ ସର୍ଭିକ ପରୀକ୍ଷାରେ କୃତିତ୍ବ ହାସଲ କରିଥିଲେ । କିନ୍ତୁ ଦେଶପ୍ରେମ ତାଙ୍କୁ ଉଦବୁଧ କରିଥିଲା । ଦେଶମାତୃକାର ସେବା କରିବାକୁ ସଂକଳ୍ପ ନେଇଥିଲେ । ତେଣୁ ସେ ଆଇ.ସି.ଏସରୁ ଇସ୍ତଫା ଦେଇଥିଲେ । ୧୯୨୧ରେ 'ସ୍ବରାଜ' ନାମକ ଏକ ସମ୍ବାଦପତ୍ର ପ୍ରକାଶନ ଆରମ୍ଭ କରିଥିଲେ । ଯାହାର ଉଦ୍ଦେଶ୍ୟ ଥିଲା ଲୋକଙ୍କ ମନରେ ଦେଶପ୍ରେମ ଆଣିବା । ଓଡିଶା ମାଟିରେ ଜନ୍ମ ଶିକ୍ଷାଲାଭ କରି ଜର୍ମାନ, ଜାପାନ ଭଳି ଦେଶକୁ ଯାଇ ଗୋରା ସରକାର ବିରୋଧରେ ରଣହୁଙ୍ଗାର ଦେଇଥିଲେ ନେତାଜୀ । ଆଜି ତାଙ୍କର ୧୨୮ତମ ଜନ୍ମ ଜୟନ୍ତୀ । ଏହି ଅବସରରେ ଦେଶ ପାଳନ କରୁଛି ପରାକ୍ରମ ଦିବସ ।
ନେତାଜୀଙ୍କ ବିଚାର: 'ମୋତେ ରକ୍ତ ଦିଏ, ମୁଁ ତୁମକୁ ସ୍ବାଧୀନତା ଦେବି' ଏ ପକ୍ତିଟି ଯେବେ ମନକୁ ଆସେ ମନେ ପଡିଯାଆନ୍ତି ପରାକ୍ରମୀ ପୁରୁଷ ସୁଭାଷ ବୋଷ । ନେତାଜୀଙ୍କର ଏହି ଆହ୍ବାନ ସର୍ବତ୍ର ବେଶ୍ ପରିଚିତ । ସେ ବିଶ୍ବାସ କରୁଥିଲେ ବାସ୍ତବ ସ୍ବାଧୀନତା କେବଳ କଥା ନୁହେଁ ଏ ନେଇ କାର୍ଯ୍ୟପନ୍ଥା ଗ୍ରହଣ କରିବା ଆବଶ୍ୟକ । ମହାନ ଭାରତୀୟ କ୍ରାନ୍ତିକାରୀ କହୁଥିଲେ ସ୍ବାଧୀନତା ଦିଆଯାଏ ନାହିଁ ନିଆଯାଏ । ଆଜାଦ୍ ହିନ୍ଦ ଫୌଜ ଗଠନ କରିଥିଲେ ସୁଭାଷ ବୋଷ । ଯାହା ପ୍ରଥମେ ବ୍ରିଟିଶ ଶାସନାଧୀନ ଭାରତ ଭୂଇଁରେ ତ୍ରିରଙ୍ଗା ଉଡାଇଥିଲେ । ସୁଭାଷ ଚନ୍ଦ୍ର ବୋଷଙ୍କ ନାମ ଶ୍ରବଣ ହିଁ ଦେଶପ୍ରେମର ଭାବନା ଜାଗ୍ରତ କରେ । ଦେଶମାତୃକା ପାଇଁ ସାହସ ଓ ଆତ୍ମବଳିଦାନ ନିମନ୍ତେ ପ୍ରେରଣା ଦିଏ ।
