ଭୁବନେଶ୍ୱର ୧୨/୧୧: ସହରାଞ୍ଚଳରେ ଲୋକଙ୍କ ହାତକୁ କାମ ଯୋଗାଇଦେବା ସହିତ ସହରର ସୌନ୍ଦର୍ଯ୍ୟ ବୃଦ୍ଧି ଲାଗି କାର୍ଯ୍ୟକାରୀ ହେଉଥିବା ମୁକ୍ତା ଯୋଜନା ଏବେ ଅନିଶ୍ଚିତତା ଭିତରେ । ଏଥିରେ କାର୍ଯ୍ୟରତ କର୍ମଚାରୀଙ୍କ ଆଉ ଚାକିରି ନଥିବାବେଳେ ପ୍ରକଳ୍ପ କାର୍ଯ୍ୟ ଆଗକୁ ବଢିବ କି ନାହିଁ ସେ ସଂକ୍ରାନ୍ତରେ କିଛି ସ୍ପଷ୍ଟ ହେଉନାହିଁ । ଫଳରେ ଅନେକ ଅଧାପନ୍ତରିଆ ପ୍ରକଳ୍ପ ଏବେ ଅନିଶ୍ଚିତତା ଭିତରକୁ ଠେଲି ହୋଇଯାଇଛି ।
ରାଜ୍ୟର ୫ଟି ମହାନଗର ନିଗମ ସହିତ ମୋଟ୍ ୩୧୪ଟି ପୌରାଞ୍ଚଳରେ କାର୍ଯ୍ୟକାରୀ ହେଉଛି ମୁକ୍ତା ଯୋଜନା । ସହରାଞ୍ଚଳରେ ବୃକ୍ଷରୋପଣ ଠାରୁ ଆରମ୍ଭ କରି ବର୍ଷାଜଳ ସଂରକ୍ଷଣ, ପାର୍କ ନିର୍ମାଣ ଓ ପୁନରୁଦ୍ଧାର ଆଦି ଅନେକ ଶ୍ରମଭିତ୍ତିକ ପ୍ରକଳ୍ପ କାର୍ଯ୍ୟକାରୀ ହେଉଛି । ଏହିସବୁ ପ୍ରକଳ୍ପକୁ କାର୍ଯ୍ୟକାରୀ ପାଇଁ ପ୍ରତ୍ୟେକ ପୌରାଞ୍ଚଳରେ ଜଣେ ପ୍ରୋଗ୍ରାମ ମ୍ୟାନେଜର, ଜଣେ ଅର୍ଥ ବିଶେଷଜ୍ଞ ଓ ଜଣେ କାର୍ଯ୍ୟ ବିଶେଷଜ୍ଞଙ୍କୁ ନିୟୋଜିତ କରାଯାଇଥିଲା । ତେବେ ମହାନଗର ନିଗମରେ ଏମାନଙ୍କ ସଂଖ୍ୟା ଅଧିକ ରହିଥିଲା ।
ମୁକ୍ତା ପ୍ରକଳ୍ପରେ ସମସ୍ତ ପୌରାଞ୍ଚଳରେ ପାଖପାଖି ୪୦୦ କର୍ମଚାରୀ ନିଯୁକ୍ତ ହୋଇ ପ୍ରକଳ୍ପ କାର୍ଯ୍ୟକୁ ଆଗେଇ ନେଉଥିବାବେଳେ ଏମାନଙ୍କ ଚାକିରି ସେପ୍ଟେମ୍ବର ଶେଷରୁ ସରିଯାଇଛି । ନିଯୁକ୍ତିର ନବୀକରଣ ହେବ କି ନାହିଁ ସେଥିନେଇ କୌଣସି ସ୍ପଷ୍ଟତା ନଥିବାବେଳେ କର୍ମଚାରୀମାନେ କିନ୍ତୁ ଆଶାବାନ୍ଧି ବିନା ଦରମାରେ ଆସି କାମ କରୁଛନ୍ତି । ନିକଟରେ ଉପକୂଳ ଓଡିଶାରେ ଆସିଥିବା ବାତ୍ୟା ଦାନାର ପ୍ରକୋପ ସମୟରେ ଉପକୂଳରେ ଥିବା ପୌରାଞ୍ଚଳରେ ଏହି କର୍ମଚାରୀମାନେ ହିଁ ବାତ୍ୟା ମୁକାବିଲାର ମଙ୍ଗ ଧରିଥିଲେ ।
ତେବେ କର୍ମଚାରୀମାନେ ଅନିଶ୍ଚିତତାରେ ଥିବାରୁ ବିଭିନ୍ନ ପୌରାଞ୍ଚଳରେ ପ୍ରକଳ୍ପ କାର୍ଯ୍ୟ ବି ଆଗେଇ ପାରୁନାହିଁ । ମୁକ୍ତା ଯୋଜନାରେ ଅର୍ଥ ରହିଥିଲେ ମଧ୍ୟ କାହିଁକି କର୍ମଚାରୀମାନଙ୍କର ନିଯୁକ୍ତି ଅବଧିର ନବୀକରଣ ହେଉନାହିଁ ଏବଂ ପ୍ରକଳ୍ପ କାର୍ଯ୍ୟ ତ୍ୱରାନ୍ୱିତ ହେଉନାହିଁ ତାହାର ଉତ୍ତର କାହା ପାଖରେ ନାହିଁ । ଇତି ମଧ୍ୟରେ ମୁକ୍ତାରେ ମୋଟ୍ ୭୬୨୦ ଟି ପ୍ରକଳ୍ପ ମଞ୍ଜୁର ହୋଇଥିବାବେଳେ ଏଥିରୁ ୫୩୮୫ଟି ସମ୍ପୂର୍ଣ୍ଣ ହୋଇଛି । ୨୨୩୫ଟି ପ୍ରକଳ୍ପର କାର୍ଯ୍ୟ ଜାରି ରହିଛି । ତେବେ ଆସନ୍ତା ଡିସେମ୍ବର ସୁଦ୍ଧା ୩୦୦ ଟି ପ୍ରକଳ୍ପ ସାରିବାକୁ ଲକ୍ଷ୍ୟ ରହିଛି । ସରିଛି ମାତ୍ର ୨୫ଟି । ଅକ୍ଟୋବର ମାସରେ ୩୦ଟି ପ୍ରକଳ୍ପ ପାଇଁ ଲକ୍ଷ୍ୟ ଥିବାବେଳେ ସରିଛି ୪ଟି।
