ଭୁବନେଶ୍ୱର,୨୧/୧୦: ମାଷ୍ଟରକ୍ୟାଣ୍ଟିନ ଛକରେ ମାତିଛନ୍ତି ଲେଡି ଲୁଟେରା । ସେକ୍ସ ଆଳରେ ଯାତ୍ରୀଙ୍କୁ ଲୁଟ୍ପାଟ କରୁଛନ୍ତି । ରବିବାର ଭୋର ୩ଟାରେ ଜଣେ ଯୁବକଙ୍କୁ ସେକ୍ସ ଆଳରେ ଡ଼ାକି ୩ ହଜାର ଟଙ୍କା ଓ ମୋବାଇଲ ଲୁଟି ନେଇଥିବା ଜଣାପଡ଼ିଛି ।
ମିଳିଥିବା ଅଭିଯୋଗ ଅନୁଯାୟୀ, କୋଳଥିଆ ସତ୍ୟସାଇ ଏନ୍କ୍ଲେଭ୍ ଅଞ୍ଚଳର ଅମନ କୁମାର ପାଲ୍ଟାସିଂହ ଆଜି ଭୋର ୩ଟା ବେଳେ ଟ୍ରେନ୍ରୁ ଓହ୍ଲାଇ ମାଷ୍ଟରକ୍ୟାଣ୍ଟିନ ଛକରେ ଅଟୋକୁ ଅପେକ୍ଷା କରିଥିଲେ । ଏହି ସମୟରେ କିଛି ଦୂରରୁ ୨ ଯୁବତୀ ତାଙ୍କୁ ହାତଠାରି ଡ଼ାକିଥିଲେ । ଅମନ ସେମାନଙ୍କ ନିକଟରେ ପହଞ୍ଚିବା ପରେ ଜଣେ ଯୁବତୀ ତାଙ୍କ ୨ ହାତକୁ ଜୋର୍ରେ ଧରିପକାଇବା ବେଳେ ଅନ୍ୟଜଣେ ତାଙ୍କ ପକେଟରୁ ମନିପର୍ସ ଓ ମୋବାଇଲ ଛଡ଼ାଇଥିଲା । ଅମନ ପ୍ରତିବାଦ କରିବାରୁ ସେମାନେ ଅସଦାଚରଣର ଭୟ ଦେଖାଇ ପୁଲିସରେ ଧରାଇ ଦେବାକୁ ଧମକ ଦେଇଥିଲେ । ତେଣୁ ଅମନ ନିରୂପାୟ ହୋଇ ଛିଡ଼ା ହୋଇଥିଲେ । ୨ ଯୁବତୀ ଲୁଟ୍ପାଟ କରିବା ପରେ ସେଠାରୁ ଦୌଡ଼ି ପଳାଇଥିଲେ । ମନିପର୍ସରେ ୩ ହଜାର ଟଙ୍କା ଥିଲା । ତେବେ ଲୋକଲଜ୍ଜା ଭୟରେ ଅମନ ଏନେଇ ପୁଲିସରେ ଅଭିଯୋଗ କରି ନଥିବା କହିଛନ୍ତି ।
ସୂଚନା ଥାଉକି, ମାଷ୍ଟରକ୍ୟାଣ୍ଟିନରେ ଲେଡି ଲୁଟେରାମାନେ ସେକ୍ସ ଆଳରେ ବାରମ୍ବାର ଲୁଟ୍ପାଟ କରୁଛନ୍ତି । କିଛିଦିନ ତଳେ ଖାରବେଳନଗର ଥାନା ପୁଲିସ ୨ ଲେଡି ଲୁଟେରାଙ୍କୁ ଗିରଫ କରି ଜେଲ୍ ପଠାଇଥିଲା । ତଥାପି ଲେଡି ଲୁଟେରାଙ୍କ ଆତଙ୍କ ଜାରି ରହିଛି।