ଧର୍ମଶାଳା,୨୭/୦୭: ଖାଇବାକୁ ବାଢ, ମୁଁ ସାଙ୍ଗେ ସାଙ୍ଗେ ଆସୁଛି ନଈରୁ ଗାଧୋଇକି। ସବୁ ଦିନ ପରି ଆଜି ବି ଘର ନିକଟସ୍ଥ ବ୍ରାହ୍ମଣୀ ନଈକୁ ଗାଧୋଇବାକୁ ଯାଇଥିଲେ। କିନ୍ତୁ ଆଉ ଖାଇବାକୁ ଫେରି ନଥିଲେ। ନଦୀରେ ବୁଡ଼ି ଯାଇଥିଲେ ଅବସରପ୍ରାପ୍ତ ଶିକ୍ଷକ । ମୃତକ ଜଣଙ୍କ ହେଲେ ଧର୍ମଶାଳା ଥାନା ଚହଟା ପଞ୍ଚାୟତ ଚହଟା ଗ୍ରାମର ଅବସରପ୍ରାପ୍ତ ଶିକ୍ଷକ ପୂର୍ଣ୍ଣଚନ୍ଦ୍ର ମହାନ୍ତି(୭୪ ବର୍ଷ)। ଯାଜପୁର ଜିଲ୍ଲା ଧର୍ମାଶାଳା ଅଞ୍ଚଳରେ ଆସିଛି ଏଭଳି ଦୁଃଖଦ ଖବର ।
ସୂଚନା ମୁତାବକ, ରବିବାର ସକାଳ ୯ ଟାରେ ଘର ନିକଟସ୍ଥ ବ୍ରାହ୍ମଣୀ ନଦୀକୁ ଗାଧୋଇବାକୁ ଯାଇଥିଲେ ପୂର୍ଣ୍ଣଚନ୍ଦ୍ର । ନଈରେ ଗାଧୋଇବା ବେଳେ ଅସାବଧାନତା ବଶତଃ ପାଣି ଭିତରେ ଗୋଡ ଖସି ଯାଇଥିଲା । ସେ ବହୁ ସମୟ ଧରି ପାଣି ଭିତରେ ବୁଡ଼ି ରହିଥିଲେ। ସେହି ସମୟରେ ଉକ୍ତ ନଦୀ ବନ୍ଧ ରାସ୍ତାରେ ଯାଉଥିବା ଜଣେ ଅଟୋ ଚାଳକ ଦେଖି ତାଙ୍କୁ ଉଦ୍ଧାର କରିବା ସହିତ ପରିବାର ଲୋକଙ୍କୁ ଖବର ଦେଇଥିଲେ । ତାଙ୍କୁ ସଙ୍ଗେ ଧର୍ମଶାଳା ମେଡିକାଲ ଅଣା ଯାଇଥିଲା । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୂର୍ଣ୍ଣଚନ୍ଦ୍ର ମହାନ୍ତି ଜଣେ ଆଦର୍ଶ ଶିକ୍ଷକ ଭାବରେ ଗତ କିଛି ବର୍ଷ ତଳେ ଚାକିରିରୁ ଅବସର ନେଇଥିଲେ। ସେ ଜଣେ ଭଲ ଯାତ୍ରା କଳାକାର ଭାବରେ ସୁନାମ ଅର୍ଜନ କରିଥିଲେ। ତାଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
