ନୂଆଦିଲ୍ଲୀ,୨୨/୦୩: ପଞ୍ଜାବ ପୋଲିସର ବଡ଼ ସଫଳତା । ଲରେନ୍ସ ବିଷ୍ଣୋଇ ଗ୍ୟାଙ୍ଗର କୁଖ୍ୟାତ ଅପରାଧିକୁ କରିଛି ଗିରଫ। ସେ ଚଣ୍ଡିଗଡ଼ ନିକଟରେ ଏକ ବଡ଼ ଘଟଣା ଘଟାଇବାକୁ ଯାଉଥିବା ବେଳେ ପୋଲିସ ଏହି ଯୋଜନାକୁ ପଣ୍ଡ କରିଛି। ପଞ୍ଜାବର ମୋହାଲିର ଜିରକପୁରରେ ଏକ ଏନକାଉଣ୍ଟର ପରେ ପଞ୍ଜାବ ପୋଲିସ ଗ୍ୟାଙ୍ଗଷ୍ଟର ଲାଭିଶ ଗ୍ରୋଭରଙ୍କୁ ଗିରଫ କରିଛି। ତେବେ ଗ୍ରୋଭରଙ୍କ ବିରୋଧରେ ହତ୍ୟା ଏବଂ ଅନେକ ମାମଲା ରୁଜୁ ହୋଇଛି।
ଏହା ମଧ୍ୟ ପଢନ୍ତୁ- ମହିଳାଙ୍କୁ ଦୁଷ୍କର୍ମ ଓ ହତ୍ୟା କରିଥିବା ଲୁଟେରାର ଏନକାଉଣ୍ଟରରେ ମୃତ୍ୟୁ , ଲକ୍ଷେ ଟଙ୍କାର ଥିଲା ପୁରସ୍କାର ଘୋଷିତ
ଅଭିଯୁକ୍ତ ଜିରକପୁରରେ ଏକ ବଡ଼ ଘଟଣା ଘଟାଇବାକୁ ଯୋଜନା କରୁଥିଲା। ପୋଲିସ ସୂଚନା ପାଇ ତାଙ୍କ ଆଡ୍ଡାରେ ପହଞ୍ଚିବା ପରେ ସେ ପୋଲିସ ଉପରେ ଗୁଳି ଚଳାଇଥିଲେ। ଏହାର ଜବାବରେ ପାଲଟା ଆକ୍ରମଣ କରିଥିଲା ପୋଲିସ। ଏଥିରେ ଅଭିଯୁକ୍ତ ଗୋଡ଼ରେ ଗୁଳି ବାଜି ଥିବା ବେଳେ ପୋଲିସ ତାଙ୍କୁ ଆହତ ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରିଥିବା ଜଣାପଡ଼ିଛି । ଅଭିଯୁକ୍ତ ବର୍ତ୍ତମାନ ଡେରାବାସିର ସିଭିଲ୍ ହସ୍ପିଟାଲରେ ଭର୍ତ୍ତି ଅଛନ୍ତି। ପୋଲିସ ଅଭିଯୁକ୍ତଙ୍କ ପାଖରୁ ତିନୋଟି ଅସ୍ତ୍ରଶସ୍ତ୍ର ଏବଂ ନିଶାଦ୍ରବ୍ୟ ଜବତ କରିଛି। ଏହି ଅସ୍ତ୍ରଶସ୍ତ୍ରଗୁଡ଼ିକ ମଧ୍ୟରୁ କିଛି ଭାରତରେ ନିଷିଦ୍ଧ। ସୂଚନା ଅନୁଯାୟୀ, ପୋଲିସ ଗତ କିଛିଦିନ ଧରି ତାଙ୍କୁ ଖୋଜୁଥିଲା। ସେ ଗତ କିଛି ଦିନ ଧରି ଜିରକପୁର ଅଞ୍ଚଳରେ ନିଜର ନେଟୱାର୍କ ଚଳାଉଥିବା ବେଳେ ଅଭିଯୁକ୍ତ ଜଣକ ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହିତ ଜଡିତ ବୋଲି କୁହାଯାଉଛି। ଅନ୍ୟପଟେ ଏସପି ଗ୍ରାମୀଣ ମନପ୍ରୀତ ସିଂହ କହିଚନ୍ତି, ଅଭିଯୁକ୍ତ ଲାଭିଶ ଲୁଧିଆନାର ବାସିନ୍ଦା ଏବଂ ଜିରକପୁରରେ ଏକ ଭଡା ଘରେ ରହୁଥିଲେ। ଅଭିଯୁକ୍ତଙ୍କ ବିରୋଧରେ ହତ୍ୟା, ଡକାୟତି ଏବଂ ଅସ୍ତ୍ରଶସ୍ତ୍ର ଆଇନ ସମେତ ୧୦ ରୁ ଅଧିକ ଅପରାଧିକ ମାମଲା ରୁଜୁ ହୋଇଛି। ଶିବ ଏନକ୍ଲେଭରେ ଲାଭିଶ ଲୁଚି ରହିଥିବା ନେଇ ପୋଲିସକୁ ଗୁପ୍ତ ସୂଚନା ମିଳିଥିଲା, ଯାହା ପରେ ସ୍ୱତନ୍ତ୍ର ଦଳ ସେହି ଅଞ୍ଚଳକୁ ଘେରି ଯାଇଥିଲା।
