ପାଟନା: ବିହାର ଲୋକସେବା ଆୟୋଗ (ବିପିଏସ୍ସି) ବିରୋଧରେ ଚାଲିଥିବା ଆନ୍ଦୋଳନର ତୀବ୍ରତା ବଢ଼ୁଛି । ଏହାରି ମଧ୍ୟରେ ବିହାରର ଲୋକପ୍ରିୟ ଶିକ୍ଷାବିତ୍ ଏବଂ ୟୁଟ୍ୟୁବର ଖାନ୍ ସାର ବଡ଼ ମନ୍ତବ୍ୟ ଦେଇଛନ୍ତି । ବିପିଏସ୍ସି ଅଧ୍ୟକ୍ଷଙ୍କୁ ପଦଚ୍ୟୁତ କରିବାକୁ ଦାବି କରିଛନ୍ତି ଖାନ୍ ସାର । ନିକଟରେ ବିହାରରେ ଅନୁଷ୍ଠିତ ହୋଇଥିବା ସିଭିଲ ସେବା ପରୀକ୍ଷାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରି ପରୀକ୍ଷାର୍ଥୀମାନେ ପୁନଃ ପରୀକ୍ଷା କରାଇବାକୁ ଜିଦ ଧରି ବସିଛନ୍ତି ।
ପରୀକ୍ଷାର୍ଥୀଙ୍କ ଏହି ଦାବିକୁ ଜନ ସୁରାଜ ପାର୍ଟିର ମୁଖ୍ୟ ପ୍ରଶାନ୍ତ କିଶୋରଙ୍କ ସମେତ ବହୁ ଲୋକପ୍ରିୟ ଶିକ୍ଷାବିତ ମଧ୍ୟ ସମର୍ଥନ କରିଛନ୍ତି । ଏହି ତାଲିକାରେ ଖାନ ସାର ସାମିଲ ଅଛନ୍ତି । ଏଏନଆଇକୁ ପ୍ରତିକ୍ରିୟା ଦେଇ ଖାନ୍ ସାର କହିଛନ୍ତି, ‘ବିପିଏସସିରେ କିଛି ଲୋକ ଅଛନ୍ତି ଯେଉଁମାନେ ରାଜ୍ୟ ସରକାରଙ୍କ ଛବି ଖରାପ କରିବାକୁ ଚେଷ୍ଟା କରୁଛନ୍ତି । ବିପିଏସସି ଅଧ୍ୟକ୍ଷଙ୍କୁ ବାହାର କରିଦେବା ଦରକାର ।’
ଏହା ପୂର୍ବରୁ ବିପିଏସ୍ସି ପ୍ରଶାନ୍ତ କିଶୋର ଏବଂ ଖାନ ସାରଙ୍କ ସମେତ ଅନ୍ୟମାନଙ୍କୁ ଲିଗାଲ (ଆଇନଗତ) ନୋଟିସ୍ ଜାରି କରିଛି । ବିପିଏସସି ଏହି ନୋଟିସ ପଠାଇ ପରୀକ୍ଷାର୍ଥୀଙ୍କ ଆନ୍ଦୋଳନକୁ ସମର୍ଥନ କରୁଥିବା ବ୍ୟକ୍ତିମାନଙ୍କ ପାଖରୁ ପରୀକ୍ଷାରେ କଥିତ ଅନିୟମିତତା ସଂପର୍କରେ ପ୍ରମାଣ ମାଗିଛି । ୭୦ ତମ ସିସିଇ ପରୀକ୍ଷାରେ ଅନିୟମିତତା ନେଇ ଯେଉଁ ଅଭିଯୋଗ ହୋଇଛି ତାର ପ୍ରମାଣ ୭ ଦିନ ଭିତରେ ମାଗିଛି ବିପିଏସ୍ସି । ନିକଟରେ ପ୍ରଶାନ୍ତ କିଶୋର କହିଥିଲେ, ପିଲାଙ୍କ ଚାକିରି ୧ କୋଟି କିମ୍ବା ଦେଢ଼ କୋଟିରେ ବିକ୍ରି ହୋଇଛି । ଏହି ଭଳି ୧୦୦୦ କୋଟି ଟଙ୍କାର ଦୁର୍ନୀତି ହୋଇଛି ।
ଡିସେମ୍ବର ୧୩ରେ ବିପିଏସ୍ସି ପରୀକ୍ଷା ଆୟୋଜିତ ହୋଇଥିଲା । ଏହି ପରୀକ୍ଷାରେ ପ୍ରଶ୍ନପତ୍ର ଲିକ୍ ହୋଇଥିବା ନେଇ ଅଭିଯୋଗ ପରେ ଆନ୍ଦୋଳନ ତୀବ୍ର ରୂପ ଧାରଣ କରିଛି । କିନ୍ତୁ ଏହି ଅଭିଯୋଗଗୁ ବିପିଏସ୍ସି ପକ୍ଷରୁ ଖଣ୍ଡନ କରାଯିବା ସହ ୧୨ ହଜାର ପରୀକ୍ଷାର୍ଥୀଙ୍କ ପାଇଁ ପୁନଃ ପରୀକ୍ଷା ପାଇଁ କୁହାଯାଇଥିଲା । ତେବେ ଏହାକୁ ବିରୋଧ କରିବା ସହ ସବୁ ୫ ଲକ୍ଷ ପରୀକ୍ଷାର୍ଥୀଙ୍କ ପାଇଁ ପୁଣି ଥରେ ପରୀକ୍ଷା ଆୟୋଜନ ହେଉ ବୋଲି ଆନ୍ଦୋଳନରତ ପରୀକ୍ଷାର୍ଥୀ ଦାବି କରିଛନ୍ତି ।
