ନୂଆଦିଲ୍ଲୀ,୧୭/୦୬: ଇରାନ୍ ଉପରେ ଆକ୍ରମଣ କରିବ କି ଆମେରିକା ? ଇରାନ୍- ଇସ୍ରାଏଲ ମଧ୍ୟରେ ଉତ୍ତେଜନା ଭୟଙ୍କର ହେଉଥିବା ବେଳେ ଆମେରିକା ରାଷ୍ଟ୍ରପତି ବଡ଼ ବୟାନ ଦେଇଛନ୍ତି । ପରମାଣୁ ଅସ୍ତ୍ର ନେଇ ଇରାନ୍କୁ ଚେତବାନୀ ଦେଇଛନ୍ତି ଡୋନାଲ୍ଡ ଟ୍ରମ୍ପ । ତୁରନ୍ତ ସମସ୍ତେ ତେହେରାନ ଛାଡ଼ିବା ଉଚିତ୍ ବୋଲି କହିଛନ୍ତି ଆମେରିକା ରାଷ୍ଟ୍ରପତି । ଅନୁମାନ କରାଯାଉଛି କି ଇରାନ୍-ଇସ୍ରାଏଲ୍ ଯୁଦ୍ଧ ଭିତରେ ଆମେରିକା ସିଧାସଳଖ ହସ୍ତକ୍ଷେପ କରିପାରେ ।
ମଧ୍ୟପ୍ରାଚ୍ୟର ଦୁଇ ବଡ଼ ଦେଶ ଇରାନ୍- ଇସ୍ରାଏଲ ମଧ୍ୟରେ ଉତ୍ତେଜନା ଚରମ ସ୍ଥିତିରେ ପହଞ୍ଚିଛି । ୪ଦିନ ହେବ ଦୁଇଦେଶ ପରସ୍ପର ଉପରେ ଏୟାର ଷ୍ଟ୍ରାଇକ୍ କରୁଛନ୍ତି । ଇସ୍ରାଏଲ୍ର ମିସାଇଲ ମାଡ଼ରେ ଇରାନ୍ର ୨୪୪ଜଣଙ୍କର ମୃତ୍ୟୁ ହୋଇଛି । ଇରାନ୍- ଇସ୍ରାଏଲ ଯୁଦ୍ଧ ପରିସ୍ଥିତିରେ ତେଲ ଅଭିଭରେ ଥିବା ଆମେରିକା ଦୂତାବାସ ଉପରକୁ ଇରାନ୍ ଆକ୍ରମଣ କରିଥିଲା । ଏହାକୁ ନେଇ ଆକ୍ସନ ମୁଡକୁ ଆସିଛି ଆମେରିକା । ଏ ବାବଦରେ ଆଲୋଚନା କରିବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ୍କୁ ପରାମର୍ଶ ଦେଇଥିଲେ । ପରମାଣୁ ଅସ୍ତ୍ର ନେଇ ଇରାନ୍କୁ କଡ଼ା ଚେତାବନୀ ଦେଇଛନ୍ତି ଟ୍ରମ୍ପ । ସେ କହିଛନ୍ତି, ''ଇରାନ୍ ପରମାଣୁ ଅସ୍ତ୍ର ରଖିପାରିବ ନାହିଁ ମୁଁ ବାରମ୍ବାର କହିଛି । ଇରାନ୍ ଚୁକ୍ତିନାମରେ ସ୍ୱାକ୍ଷର କରିବା ଉଚିତ୍ ହୋଇଥାନ୍ତା । ଏହା ମାନବ ଜୀବନର ଅପଚୟ ଏବଂ ଲଜ୍ଜାର କଥା । ସମସ୍ତେ ତୁରନ୍ତ ତେହରାନ୍ ଛାଡ଼ିଦେବା ଉଚିତ୍ ।''
ହ୍ୱାଇଟ୍ ହାଉସ୍ ସ୍ପଷ୍ଟ କରିଛି କି, ମଧ୍ୟପ୍ରାଚ୍ୟ ଦୁଇ ଦେଶ ମଧ୍ୟରେ ଉତ୍ତେଜନା ଚରମ ସ୍ଥିତିରେ ପହଞ୍ଚିଛି । ତେଣୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜି-୭ ଶିଖର ସମ୍ମିଳନୀରୁ ଫେରିବେ । ଏହା ପୂର୍ବରୁ ଟ୍ରମ୍ପ ତୁରନ୍ତ ତେହରାନ ଖାଲି କରିବାକୁ କହିଛନ୍ତି । ଇରାନ୍ - ଇସ୍ରାଏଲ ଯୁଦ୍ଧକୁ ନେଇ ଜାତୀୟ ସୁରକ୍ଷା ପରିଷଦ ବୈଠକ ଡାକିଛନ୍ତି ଟ୍ରମ୍ପ । ଯାହାକୁ ନେଇ ହଲଚଲ ଦେଖିବାକୁ ମିଳିଛି । ସେପଟେ ଜି-୭ ଶିଖର ସମ୍ମିଳନୀରେ ଇସ୍ରାଏଲକୁ ସମର୍ଥନ କରିଛନ୍ତି ଜି-୭ ନେତା । ଇରାନ୍ ପାଖରେ କେବେ ବି ପରମାଣୁ ଅସ୍ତ୍ର ରହିବ ନାହିଁ ବୋଲି କହିଛନ୍ତି ।
