ନୂଆଦିଲ୍ଲୀ ୧୭/୦୬: ଓଜନ କମାଇବାକୁ ଲୋକେ ଡାଏଟିଂ କରୁଛନ୍ତି । ଜିମ୍ରେ ଘଣ୍ଟା ଘଣ୍ଟା ଧରି ଝାଳ ବୁହାଉଛନ୍ତି । ବିଭିନ୍ନ ପ୍ରକାର ଚିକିତ୍ସା ମଧ୍ୟ କରାଉଛନ୍ତି । କିନ୍ତୁ ବୈଜ୍ଞାନିକମାନେ ଏକ ମାଗଣା ଉପାୟ କହିଛନ୍ତି, ଯାହା ଦ୍ୱାରା ଆପଣ ଓଜନ ନିୟନ୍ତ୍ରଣ କରିପାରିବେ ଏବଂ ପତଳା ରହିପାରିବେ । ଖାଇବା ପୂର୍ବରୁ ଭୋଜନକୁ ଶୁଂଘିବା ଦ୍ୱାରା ଆପଣଙ୍କ ଓଜନ କମିବ ଏବଂ ଆପଣଙ୍କୁ ପତଳା ରଖିବାରେ ସହାୟକ ହୋଇପାରିବ । ଖାଇବା ପୂର୍ବରୁ ଖାଦ୍ୟକୁ ଶୁଂଘିବା ଦ୍ୱାରା ପେଟ ପୂରିବାର ଅନୁଭବ ହୁଏ । ଏହା ଲୋକଙ୍କୁ ଅଧିକ ଖାଇବାରୁ ଅଟକାଏ । ଜର୍ମାନୀର ଗବେଷକମାନେ ଏହି ଅଧ୍ୟୟନ କରିଛନ୍ତି ।
ଭୋଜନର ବାସ୍ନା ପ୍ରତି ମୂଷାଙ୍କ ପ୍ରତିକ୍ରିୟା ଆଧାରରେ ସେମାନଙ୍କ ମସ୍ତିଷ୍କକୁ ସ୍କାନ୍ କରାଯାଇଥିଲା । ଗବେଷକମାନେ ମସ୍ତିଷ୍କ କୋଷିକାଗୁଡ଼ିକର ଏଭଳି ଖାସ୍ ସମୂହକୁ ଚିହ୍ନଟ କଲେ, ଯାହାର ନାକ ସହ ସିଧା ସମ୍ପର୍କ ରହିଛି । ସେମାନେ ଜାଣିବାକୁ ପାଇଲେ, ଭୋଜନ ପୂର୍ବରୁ ଏହି କୋଷିକାଗୁଡ଼ିକୁ ସକ୍ରିୟ କରାଯିବା ପରେ ମୂଷା କମ୍ ଖାଦ୍ୟ ଖାଇଲେ । କିନ୍ତୁ କେବଳ ଭୋଜନ ପୂର୍ବରୁ ଖାଦ୍ୟର ବାସ୍ନା ସଂସ୍ପର୍ଶରେ ସେମାନଙ୍କୁ ଆଣିବା ପରେ ଏହା ଲକ୍ଷ୍ୟ କରାଗଲା । ଗବେଷକଙ୍କ ଅନୁସାରେ, ଭୋକକୁ ଦବାଇବା ପାଇଁ ଖାଦ୍ୟ ଶୁଂଘିବାର ଏହି ପ୍ରକ୍ରିୟା ମଣିଷଙ୍କ ଉପରେ କାମ କରିପାରେ ବୋଲି ଜଣାପଡ଼ିନାହିଁ । ତଥାପି ସେମାନେ ଜାଣିବାକୁ ପାଇଲେ, ମଣିଷ ମସ୍ତିଷ୍କରେ ମଧ୍ୟ ମୂଷାଙ୍କ ଭଳି କୋଷିକାଗୁଡ଼ିକର ଅବିକଳ ଗ୍ରୁପ୍ ଅଛି, ଯାହା ପ୍ରତିକ୍ରିୟା ପାଇଁ ଦାୟୀ । କିନ୍ତୁ ପୂର୍ବରୁ ଅଧିକ ଓଜନର ବ୍ୟକ୍ତିଙ୍କ ପାଇଁ ଏହା ଓଜନ କମାଇବାର ଉପାୟ ହେବ ନାହିଁ ।
ଭୋଜନର ବାସ୍ନା ଆସିବା ପରେ ମୋଟା ମୂଷାଙ୍କ ମସ୍ତିଷ୍କର ପ୍ରତିକ୍ରିୟା ସମାନ ନ ଥିଲା । କିନ୍ତୁ ଯେଉଁ ମୂଷାଙ୍କ ଓଜନ କମ୍ ଥିଲା, ସେମାନଙ୍କର ଖୁବ୍ ଲାଭ ହେଲା । ଅଧ୍ୟୟନକର୍ତ୍ତାଙ୍କ ଅନୁସାରେ, ମେଦବହୁଳତା ଯୋଗୁ ଗନ୍ଧ ବାରିବାର କ୍ଷମତା କମିଯାଏ । ଏହି ପ୍ରକ୍ରିୟା ମୂଷାଙ୍କ ଭଳି ମନୁଷ୍ୟଙ୍କଠାରେ ମଧ୍ୟ ସମାନ ଭାବେ ହୁଏ । ଅଧ୍ୟୟନର ଲେଖିକା ଓ ନ୍ୟୁରୋସାଇଣ୍ଟିଷ୍ଟ୍ ସୋଫି ଷ୍ଟେକୁଲୋରମ୍ କହିଛନ୍ତି, ଦୈନନ୍ଦିନ ଖାଦ୍ୟପେୟର ଅଭ୍ୟାସ ଭୋଜନର ବାସ୍ନା ଦ୍ୱାରା କେତେ ପ୍ରଭାବିତ ହୁଏ, ତାହା ଆମ ଅଧ୍ୟୟନ ଦର୍ଶାଇଛି । କ୍ଷୁଧା ନିୟନ୍ତ୍ରଣ ମେଦ ବୃଦ୍ଧିରେ ଖାଦ୍ୟର ବାସ୍ନା ଉପରେ ବିଚାର କରିବା କେତେ ଜରୁରି ହୋଇପାରେ ଅଧ୍ୟୟନରୁ ଜଣା ପଡ଼ିଛି । ଏହି ଉପାୟ ପତଳା ମୂଷାଙ୍କ କ୍ଷୁଧା କମ୍ କରେ କିନ୍ତୁ ମୋଟା ମୂଷାଙ୍କର ନୁହେଁ । ପୂର୍ବରୁ ମଧ୍ୟ ଅନେକ ଅଧ୍ୟୟନରେ କୁହାଯାଇଛି ଯେ ଭୋଜନ ପୁର୍ବରୁ କିଛି ଖାଦ୍ୟର ବାସ୍ନା ଶୁଂଘିବା ଦ୍ୱାରା ଲୋକଙ୍କ ଭୋକ କମିପାରେ । ଏକ ଆମେରିକୀୟ ଅନୁସନ୍ଧାନ ଅନୁସାରେ, ସେଓ, ପୁଦିନା ଓ ନାଶପାତିର ବାସ୍ନାରୁ ଲୋକେ ଦିନ ତମାମ ଖାଦ୍ୟ ଖାଇବାରୁ ବଞ୍ଚନ୍ତି ।
