କୋକସରା, ୦୩/୦୬ : ବହୁମୂଖୀ ଇନ୍ଦ୍ରାବତୀ ଜଳ ସେଚନ ପ୍ରକଳ୍ପର ବାମ କେନାଲ ରାସ୍ତା ଦୀର୍ଘ ବର୍ଷ ହେବ ଶୋଚନୀୟ ହୋଇ ପଡ଼ି ରହିଥିଲା। ମଙ୍ଗଳପୁର ବ୍ୟାରେଜ୍ ଠାରୁ ଦୀର୍ଘ ୫୧ କି.ମି ରାସ୍ତା ଖରାପ ଥିବାରୁ ଚାଷୀମାନେ ହନ୍ତସନ୍ତ ହେଉଥିଲେ। ଅନ୍ୟ ରାସ୍ତା ଦେଇ ଯାତାୟାତ କରୁଥିଲେ । ଏହାର ପୁନଃଉଦ୍ଧାର ହେଉନଥିବାରୁ ଚାଷୀଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇ ଆସୁଥିଲା। ବିଭିନ୍ନ ସମୟରେ ରାସ୍ତା ନିର୍ମାଣ ନେଇ ଉପର ଇନ୍ଦ୍ରାବତୀ ବାମ କେନାଲ କୁସୁମଖୁଣ୍ଟି ଡିଭିଜନ ଅଧିକ୍ଷଣ ଯନ୍ତ୍ରୀ ତ୍ରୁପ କୁମାର ପାତ୍ର ଉପରିସ୍ଥ ଅଧିକାରୀଙ୍କୁ ଅବଗତ କରାଇଥିଲେ। ଇନ୍ଦ୍ରାବତୀ ବିଭାଗୀୟ ଅଧିକାରୀ ରାସ୍ତା ନିର୍ମାଣ ପାଇଁ ରାଜ୍ୟ ସରକାରଙ୍କୁ ଇଷ୍ଟିମେଟ୍ କରି ଅନୁମୋଦନ ଓ ଅନୁଦାନ ପାଇଁ ଚିଠି ଲେଖିଥିଲେ। ଚାଷୀଙ୍କ ବୃହତ ସ୍ୱାର୍ଥକୁ ଦୃଷ୍ଟିରେ ରଖି କେନ୍ଦ୍ର ଓ ରାଜ୍ୟ ସରକାରଙ୍କ କମ୍ପାସ୍ ଯୋଜନାରେ ୫୧ କିମି ରାସ୍ତା ନିର୍ମାଣ ପାଇଁ ଅନୁଦାନ ପ୍ରଦାନ କରି ଟେଣ୍ଡର ଆହ୍ୱାନ କରାଗଲା। ଏହି ଟେଣ୍ଡର ଓସିସି କମ୍ପାନୀ ପାଇଥିଲା। ପରବର୍ତ୍ତୀ ସମୟରେ ମଙ୍ଗଳପୁର ଡ୍ୟାମ୍ ୦ କିଲୋମିଟରରୁ ୫୧ କିଲୋମିଟର ପର୍ଯ୍ୟନ୍ତ ରାସ୍ତା କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଆରମ୍ଭ ହୋଇ ଏବେ ଶେଷ ପର୍ଯ୍ୟାୟରେ ପହଞ୍ଚିଛି ।
ଜୟପାଟଣା ବ୍ଲକ୍ ମଙ୍ଗଳପୁର ଡ୍ୟାମ ଠାରୁ ବାଞ୍ଜିବାହାଲ, ପ୍ରତାପପୁର, ସର୍ଗିଗୁଡା, ଭଇରିପାଳି, ବିମଳା, ମୋହନଗୁଡା, କନ୍ଦାବୁଟ୍ରା, କାଶିବାହଲ, କୁସୁମଖୁଣ୍ଟି, ପୋଡବେଡା, ତରାପୁର, ନନ୍ଦିଗାଁ, ବୋଡେ଼ନ, କାଶିବାହଲ, ଧର୍ମଗଡ଼, ଖଇର ପଦର କେନାଲର ଶେଷ ମୁଣ୍ଡ ପର୍ଯ୍ୟନ୍ତ ରାସ୍ତା ନିର୍ମାଣ କରାଯାଇଛି । ଏହି ଅଞ୍ଚଳର ଚାଷୀ ଓ ଜନସାଧାରଣ ଉପକୃତ ହୋଇଛନ୍ତି । ଦୀର୍ଘ ବର୍ଷର ବ୍ୟବଧାନ ପରେ ବାମ କେନାଲ ଉପରେ ଚକାଚକ ରାସ୍ତା ହୋଇଥିବାରୁ ଲୋକେ ସୁବିଧାରେ ଗମନାଗମନ କରୁଛନ୍ତି । କୁସୁମଖୁଣ୍ଟି ବାମ କେନାଲ ଡିଭିଜନ ଅଧିକ୍ଷଣ ଯନ୍ତ୍ରୀଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ନିର୍ମିତ ଏହି ରାସ୍ତା କାର୍ଯ୍ୟ ସମ୍ପୂର୍ଣ୍ଣ ହୋଇଛି।
