ନୂଆଦିଲ୍ଲୀ,୧୨/୦୧: ୨୦୨୫ରେ ବିଶ୍ୱ ଅଭିବୃଦ୍ଧି ସ୍ଥିର ରହିବ । ଏହି ସମୟରେ ଭାରତୀୟ ଅର୍ଥନୀତି ସାମାନ୍ୟ ଦୁର୍ବଳ ରହିବ ବୋଲି ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ପରିଚାଳନା ନିର୍ଦ୍ଦେଶିକା କ୍ରିଷ୍ଟାଲିନା ଜର୍ଜିଭା କହିଛନ୍ତି । ଆମେରିକାର ବାଣିଜ୍ୟ ନୀତି ଯୋଗୁ ବିଶ୍ୱ ବଜାରରେ ଅନେକ ଆହ୍ୱାନ ଦେଖାଯିବାର ଆଶଙ୍କା ରହିଛି । ଭାରତୀୟ ଅର୍ଥନୀତିକୁ ନେଇ ସେ ବିଶେଷ କିଛି କହିନାହିଁନ୍ତି ।
ସେ କହିଛନ୍ତି, ଆମେରିକା ଅର୍ଥନୀତି ପୂର୍ବ ତୁଳନାରେ ବେଶ ଭଲ ପ୍ରଦର୍ଶନ କରୁଛି । ବ୍ରାଜିଲ ସର୍ବାଧିକ ମୁଦ୍ରାସ୍ଫୀତି ଚାପ ଦେଇ ଗତି କରୁଛି। ଅନ୍ତରୀଣ ଚାହିଦା ପ୍ରଭାବିତ ଥିବାରୁ ଚୀନ ଚାପର ସାମ୍ନା କରିବ । ଚେଷ୍ଠା ସତ୍ୱେ ନିମ୍ନ ଆୟକାରୀ ରାଷ୍ଟ୍ର ଗୁଡିକ ଚାପରେ ରହିବେ । ଆମେରିକା ନୂଆ ପ୍ରଶାସନ ଟାରିଫ, ଟିକସ, ନୀତିଗତ ପଦକ୍ଷେପ ଏବଂ ସରକାରୀ ଦକ୍ଷତା ଦୃଷ୍ଟିକୋଣରୁ ବିଶ୍ୱ ବଜାର ଲାଗି ବେଶ ଗୁରୁତ୍ୱ ବହନ କରିବ ।
ବିଶ୍ୱ ଅର୍ଥନୀତିକୁ ଦେଖିଲେ ଯୋଗାଣ ଶୃଙ୍ଖଳ କ୍ଷେତ୍ରରେ ଏସିଆର ମଧ୍ୟମ ଆୟ ଅର୍ଥନୀତି ଗୁଡିକ ଆହ୍ୱାନର ସାମ୍ନା କରିବେ। ଚଳିତ ଆର୍ଥିକ ବର୍ଷ ଭାରତୀୟ ଅର୍ଥନୀତିର ଅଭିବୃଦ୍ଧି ୪ ବର୍ଷର ସର୍ବନିମ୍ନ ସ୍ତରରେ ରହିବ ବୋଲି ଅନୁମାନ କରାଯାଇଛି । ଘେରୋଇ ବଜାରର ବିନିର୍ମାଣ ଏବଂ ନିବେଶ ଏବେ ଧିମା ରହିଛି । ତେବେ ଉନ୍ନତ କୃଷି ଉତ୍ପାଦନ ଭାରତ ଲାଗି କିଛିଟା ଆଶ୍ୱସ୍ତି ଆଣିପାରେ ।
ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ)ର ଆଗୁଆ ଆକଳନ ମୁତାବକ ଅର୍ଥନୀତି ୬.୪% ବଢ଼ିବ । ଯାହା ଗତ ଆର୍ଥିକ ବର୍ଷରେ ୮.୨% ଥିଲା । ଯୁଦ୍ଧ ଏବଂ ଅନିଶ୍ଚିତତା ସମୟରେ ଦେଶର ଅର୍ଥନୀତିକୁ ଟ୍ରାକକୁ ଆଣିବାରେ ବଜେଟରେ ସରକାର କିଭଳି ପଦକ୍ଷେପ ଗ୍ରହଣ କରୁଛନ୍ତି ସେ ଉପରେ ଏବେ ସମସ୍ତଙ୍କ ନଜର ରହିଛି ।
