ନୂଆଦିଲ୍ଲୀ, ୭।୬: ଭାରତରେ ଦାରିଦ୍ର୍ୟ ହାର ଦ୍ରୁତ ଗତିରେ ହ୍ରାସ ପାଇଛି । ଦାରିଦ୍ର୍ୟ ହାର ୨୭.୧ ରୁ ୫.୩%କୁ ହ୍ରାସ ଖସିଛି । ଅତି ଦାରିଦ୍ର୍ୟରେ ରହୁଥିବା ଲୋକଙ୍କ ସଂଖ୍ୟା ୩୪୪.୪୭ ନିୟୁତରୁ ହ୍ରାସ ପାଇ ୭୫.୨୪ ନିୟୁତକୁ ଖସିଛି । ଏନେଇ ରିପୋର୍ଟ ଦେଇଛି ବିଶ୍ୱ ବ୍ୟାଙ୍କ । ବିଶ୍ୱ ବ୍ୟାଙ୍କ ସମ୍ପ୍ରତି ଏହାର ଦାରିଦ୍ର୍ୟ ସୀମାକୁ ସଂଶୋଧନ କରିଛି, ଏହାକୁ ପ୍ରତିଦିନ $୨.୧୫ରୁ ବୃଦ୍ଧି କରି $୩ କରିଛି । ଏହି ନୂତନ ମାନଦଣ୍ଡ ଅନୁଯାୟୀ, ଭାରତରେ ଅତ୍ୟନ୍ତ ଦାରିଦ୍ର୍ୟ ହାରରେ ଏକ ଉଲ୍ଲେଖନୀୟ ହ୍ରାସ ଘଟିଛି । ବିଶ୍ୱ ବ୍ୟାଙ୍କ ତଥ୍ୟ ଅନୁଯାୟୀ, ୨୦୧୧-୧୨ରେ ୨୭.୧% ଥିବା ଅତି ଦାରିଦ୍ର୍ୟ ହାର ୨୦୨୨-୨୩ରେ ୫.୩% କୁ ହ୍ରାସ ପାଇଛି । ଏହାର ଅର୍ଥ ଅତି ଦାରିଦ୍ର୍ୟରେ ବାସ କରୁଥିବା ଲୋକଙ୍କ ୩୪୪.୪୭ ନିୟୁତରୁ ହ୍ରାସ ପାଇ ୭୫.୨୪ ନିୟୁତକୁ ଖସିଛି ।
ବିଶ୍ୱ ବ୍ୟାଙ୍କର ଦାରିଦ୍ର୍ୟ ଏବଂ ସମାନତା ସଂକ୍ଷିପ୍ତ ବିବରଣୀ ୧୦୦ରୁ ଅଧିକ ବିକାଶଶୀଳ ଦେଶରେ ଦାରିଦ୍ର୍ୟ, ସହଭାଗୀ ସମୃଦ୍ଧି ଏବଂ ଅସମାନତାର ଧାରା ରିପୋର୍ଟ କରେ । ବିଶ୍ୱ ବ୍ୟାଙ୍କ ଗୋଷ୍ଠୀ ଏବଂ ଆନ୍ତର୍ଜାତୀୟ ମୁଦ୍ରା ପାଣ୍ଠି ଏବଂ ବାର୍ଷିକ ବୈଠକ ପାଇଁ ବର୍ଷକୁ ୨ ଥର ଏହି ରିପୋର୍ଟ ପ୍ରକାଶ କରେ । ଏହା ଗୋଟିଏ ଦେଶର ଦାରିଦ୍ର୍ୟ ଏବଂ ଅସମାନତାରର ଏକ ସ୍ନାପସଟ୍ ପ୍ରଦାନ କରେ । ଯାହା ନିଶ୍ଚିତ କରେ ଯେ, ଦାରିଦ୍ର୍ୟ ହ୍ରାସ ବିଶ୍ୱ ପାଇଁ ପ୍ରାଥମିକତା । ଏହି ରିପୋର୍ଟ ଅନୁଯାୟୀ ଗ୍ରାମାଞ୍ଚଳରେ ଅତି ଦାରିଦ୍ର୍ୟ ୨୦୧୧-୧୨ ରେ ୧୮.୪%ରୁ ହ୍ରାସ ପାଇ ୨୦୨୨-୨୩ ରେ ୨.୮ ପ୍ରତିଶତକୁ ଖସିଛି । ଅନ୍ୟପକ୍ଷେ ସହରାଞ୍ଚଳରେ ଅତି ଦାରିଦ୍ର୍ୟ ୧୦.୭%ରୁ ୧.୧%କୁ ଖସିଛି । ଗ୍ରାମାଞ୍ଚଳ ଏବଂ ସହରାଞ୍ଚଳ ଦାରିଦ୍ର୍ୟ ମଧ୍ୟରେ ବ୍ୟବଧାନ ୭.୭% ପଏଣ୍ଟରୁ ୧.୭% ପଏଣ୍ଟକୁ ହ୍ରାସ ପାଇଛି । ୨୦୧୧-୧୨ ଏବଂ ୨୦୨୨-୨୩ ମଧ୍ୟରେ ବାର୍ଷିକ ହ୍ରାସ ହାର ୧୬% ହେବ ।
ବିଶ୍ୱ ବ୍ୟାଙ୍କର ତଥ୍ୟ ଅନୁସାରେ, ଭାରତରେ ନିମ୍ନ-ମଧ୍ୟମ ଆୟ ସ୍ତରରେ ଦାରିଦ୍ର୍ୟ ହ୍ରାସ ହୋଇଛି । ଗ୍ରାମୀଣ ଏବଂ ସହରାଞ୍ଚଳ ଉଭୟ କ୍ଷେତ୍ରରେ ଏହି ବ୍ୟାପକ ଅଭିବୃଦ୍ଧି ଲକ୍ଷ ଲକ୍ଷ ଲୋକଙ୍କୁ ଲାଭ ଦେଇଛି । ନିଯୁକ୍ତି ଅଭିବୃଦ୍ଧିରେ ସକାରାତ୍ମକ ଧାରା ପରିଲକ୍ଷିତ ହୋଇଛି । ବିଶେଷକରି ୨୦୨୧-୨୨ ପରଠାରୁ, ଗ୍ରାମୀଣ ଏବଂ ସହରାଞ୍ଚଳ ଉଭୟରେ ଉଲ୍ଲେଖନୀୟ ଉନ୍ନତି ହୋଇଥିବା ବିଶ୍ୱ ବ୍ୟାଙ୍କ ରିପୋର୍ଟରେ କୁହାଯାଇଛି । ରିପୋର୍ଟରେ କୁହାଯାଇଛି ଯେ, ସାରା ଭାରତରେ ଅତି ଦାରିଦ୍ର୍ୟ ହ୍ରାସ କରିବାରେ ସଫଳତା ମିଳିଛି । ଦାରିଦ୍ର୍ୟ ହ୍ରାସ କରିବାରେ ଉତ୍ତର ପ୍ରଦେଶ, ମହାରାଷ୍ଟ୍ର, ବିହାର, ପଶ୍ଚିମବଙ୍ଗ ଏବଂ ମଧ୍ୟପ୍ରଦେଶ ଆଦି ପ୍ରମୁଖ ଭୂମିକା ଗ୍ରହଣ କରିଛନ୍ତି ।
